Seminariu al cargu de Santiago Alba Rico
Frutu de la collaboración entre la Rede d’Apoyu Mutuu de Llión (na qu’AGORA participa) y el MUSAC, entámase esti llunes 22 de xunu un seminariu col filósofu Santiago Alba Rico, autor d’obras como “Capitalismo y Nihilismo”, “Cuba: la ilustración y el socialismo” ou “Viva el mal, Viva el capital”.
La xornada emprincipia a las 19 horas con un coloquiu de Santiago Alba, siguida d’una mesa de diálogu, hasta las 22 horas. El tema central sedrá’l tratáu nel sou ensayu “Las reglas del caos”, que toma como entamu la ocupación d’Iraq y las manifestaciones ciudadanas a la escontra.
AGORA celebróu la Fiesta del País Llionés
Esta segunda fin de semana de xunu, cola acordanza de las Cortes llionesas de 1188, las y los miembros de la nuesa organización conmemoramos la nuesa fiesta nacional.
Y lo ficimos, axuntándonos nel marcu de la I Fiesta Cultural del País Llionés, entamada en Santa Croya de Tera.
Ante las eleiciones europeas del 7 de Xunu
N’AGORA País Llionés sabemos que la Unión Europea d’anguañu tien un ampliu calter capitalista ya imperialista. Promuévese un modelu políticu “Made in USA” controláu por grandes grupos de presión, al traviés d’unos 15 mil “lobbistas”, que desixen unos resultaos acordias a los sous intereses ou a la contra buscan xeitos alternativos p’acabar imponiendo la sua voluntá, como se vio col Tratáu pola Constitución Europea, dimpués Tratáu de Lisboa.
Xornadas sobro la Clas Trabayadora y la Crisis
Dende la Rede d’Apoyu Mutuu de Llión (a la que pertenez AGORA), y a comuña col MUSAC, entámanse unas xornadas pa entender la crisis económica d’anguañu, dende’l puntu de vista de la clas obreira y los sectores sociales más desfavorecíos.
Estas xornadas tratarán temáticas como la precariedá, el desemplegu, la responsabilidá social, la situación de los inmigrantes, etc. al traviés d’un ciclu de cine, dellas conferencias y alderiques.
Ante la manipuliación de las eleiciones europeas
Dimpués de l’anulación provisional de la candidatura d’Iniciativa Internacionalista pa las eleiciones europeas del 7 de Xunu, AGORA País Llionés manifiesta lo siguiente:
- El nuesu más fondu repunu pa cola criminalización, por parte la maraña político-mediática del Estáu Español, hacia los proyeutos eleutorales d’Iniciativa Internacionalista, Unidá Nacionalista Asturiana y Coalición por las Repúblicas Soberanas en Europa.
Y, polo tanto, la nuesa más candial solidaridá pa colos sous miembros.
