El estáu de la Salu en Chechenia

Karsten Lunze, Medicina Preventiva. Universidá de Boston

Casi 15 años dempués de qu’entamaren les guerres ente los independentistes chechenos y les tropes ruses, Chechenia y la su capital, Grozni, tán viendo nos últimos años unos esfuercios pa la su reconstrucción y una recuperación de la economía que dalgunos califiquen como “l milagru chechenu”.

The Lancet
Traducción al asturianu de Astur-Chechenia

Casi 15 años dempués de qu’entamaren les guerres ente los independentistes chechenos y les tropes ruses, Chechenia y la su capital, Grozni, tán viendo nos últimos años unos esfuercios pa la su reconstrucción y una recuperación de la economía que dalgunos califiquen como “l milagru chechenu”. Mentantu, los incidentes violentos tán siendo, por desgracia, cada vuelta más constantes dende la guerra n’Osetia del Sur ente Xeorxa y Rusia que tuvo llugar n’Agostu. La cifra de muertes violentes comparaes coles del anterior branu casi se dobla, de 84 a 152(1).

El pasáu mes d’Abril les fuercies militares ruses punxeron fin oficialmente a lo que denominaben operación antiterrorista y que les organizaciones de drechos humanos consideraben “un sistema rexonal de tortura, confesiones forzoses y xuicios prefabricaos”.(2) Documentaes poles organizaciones de drechos humanos, asina como pola prensa nacional ya internacional, les fuercies ruses continúen coles sus práctiques de desapaiciones forzoses, tortura y otros tratamientos degradantes a los supuestos terroristes, al mesmu tiempu que les autoridaes ruses tán sufriendo una fola creciente d’asesinatos de los sus representantes pela parte d’insurxentes cada vuelta más organizaos.(3) Hasta’l 29 d’Ochobre de 2009, el Tribunal Européu de Drechos Humanos llevaba xulgaos más de 100 casos de ciudadanos chechenos nos que’l Gobiernu rusu nun acometió una investigación afayaíza nin persiguió los abusos contra los drechos humanos cometíos poles sus fuercies, o atopó a Rusia directamente por violaciones de los drechos humanos que van dende’l tratu inhumanu a detenciones secretes o muertes. Entá hai miles de casos pendientes.

Les actuales violaciones de los drechos humanos por dambes partes en conflictu tiene implicaciones directes pa la salú de la mayoría de checehnos que tovía sufren secueles físiques y mentales causaes pola guerra. Dende que les guerres acabaren oficialmente fai casi 10 años, los informes de les organizaciones nun gubernamentales y de les organizaciones de les Naciones Xuníes espeyen unes condiciones de vida y de salú desesperaes nel Cáucasu Norte, incluso comparándoles con otres rexones desaventaxaes de la Federación Rusa. L’índiz de mortalidá infantil en Chechenia ye polo menos del doble que la media rusa de 13 per cada 1000 nacimientos, a causa principalmente de la diarrea y de les infecciones respiratories, y anque la tendencia tá meyorando, dellos miles de muyeres y neños nun disponen tovía de los servicios sociales básicos.(4)

Dempués de les guerres, l’ineficiente sistema sanitariu en Chechenia quedó sobrecargáu y la su infraestructura lliteralmente bombardeada. Fai 3 años el Kremlin marcóse como política prioritaria’l trabayu de reconstrucción de Chechenia, y el Gobiernu chechenu pro-rusu supuestamente fizo una gran inversión al traviés d’un programa pa instalaciones sanitaries y equipamientu médicu. Les organizaciones internacionales y el Ministeriu chechenu de Sanidá anunciaron oficialmente y entamaron una serie de programes pa sanidá y educación.(4,5)

La imaxen oficial de reconstrucción exitosa del sistema sanitariu, cuyos estándares tán tovía per debaxo de los estándares rusos, especialmente nos cuidaos de les especialidaes, dexa fuera a los munchos profesionales cualificaos que colaron pa Moscú o pa otros llaos a la busca de meyores condiciones llaborales. Los pacientes que necesiten un tratamientu más alló de l’atención primaria tienen que s’apuntar nun sistema de cuotes que provee un númberu llimitáu d’ayudes p’aquelles persones que necesiten un tratamientu especializáu que nun pueden recibir en Chechenia.(6) Les organizaciones internacionales qu’ufren asistencia n’investigaciones sobre los drechos humanos(7) enfréntense a la negativa del gobiernu federal a cooperar(8), y les poques ONG’s operatives en Chechenia vénse obstaculizaes nel su trabayu por una escesivos pilancos alministrativos orixinaos polos nuevos requisitos llegales.(9)

Asinamesmo, aquellos profesionales de la salú que permanencen en Chechenia son reacios a falar sobre les meyores nos servicios sanitarios por miéu a ser calificaos de “non patriotes”, una etiqueta que puede volvese en peligrosa nun contestu d’operaciones antiterroristes. Nun clima social que los espertos consideren ye ún de los más represivos del mundiu,(10) l’asistencia sanitaria  y la programación qu’asiste a les persones enfermes y vulnerables (p.ex. los dirixíos a muyeres y neños, los pacientes de tuberculosis o les 30.000 persones que tovía son desplazaes internes en Chechenia) son tovía un claru desafíu.

Cuando Natalia Estemírova, miembru d’una organización llocal de drechos humanos, foi secuestrada y asesinada en Chechenia en Xunetu d’esti añu(7) dempués d’una serie de secuestros y asesinatos d’activistes de los drechos humanos conocíos y otros non tan conocíos, Memeorial suspendió’l su trabayu allí. L’ausencia de mecanismos de control independiente sobre los llexisladores y les fuercies y cuerpos de seguridá, y la falta d’una atención y rempuesta internacional, puede crear un calvu de cultivu afayaízu pal estremismu. L’espardimientu de la violencia puede convertise nuna menacia más alló de la rexón, y poner en pelligru dende allí la seguridá global.

La violencia tá rexurdiendo en Chechenia(1,3), menaciando la salú y los sistemes sanitarios d’una población abondo castigada yá pola guerra. L’oxetivu lexítimu de controlar la violencia armada y estabilizar una rexón desaventaxada ha cuntar con un respetu a los drechos humanos pa dá-y la vuelta a esta tendencia y consiguir meyores sustanciales nes condiciones sanitaries pa esta sociedá inmersa nun post-conflictu. Nun hai milagru dengún en Chechenia, sinon una situación que requier una presión internacional de les organizaciones académiques, parllamentaries, gubernamentales y non gubernamentales, y de los periodistes.

Notes:

(1)    Mendelson SE, Malarkey M, Moore L. Violencia nel Cáucasu Norte: branu 2009.

http://csis.org/publication/violence-north-caucasus-4.

(2)    Conseyu d’Europa. Soluciones llegales contra les violaciones de los drechos humanos nel Cáucasu Norte.
http://www.reliefweb.int/rw/rwb.nsf/db900sid/MMAH-7DW46X?OpenDocument.

(3)    (3) Conseyu d’Europa. Comité d’Asuntos Llegales y Drechos Humanos, situación na rexón del Cáucasu Norte: seguridá y drechos humanos.
http://assembly.coe.int/CommitteeDocs/2009/ajdoc43_2009.pdf.

(4)    (4) UNICEF. Problemes de la infancia en Rusia.
http://www.unicef.org/infobycountry/russia_background.html.

(5)    Oficina Rexonal de la OMS pa Europa. Primeros resultaos del Programa de Desenrollu y Recuperación de la UE pal Cáucasu Norte, discutíu recién en Kislovodsk. http://www.euro.who.int/emergencies/fieldwork/20080109_4

(6)    OMS. Aición sanitaria nel Cáucasu Norte.
http://www.who.int/hac/crises/rus/sitreps/Health%20Action%20Feb_Mar_2005%20%20.pdf.

(7)    NX. Espertos de les NX ufren ayuda pa investigar asesinatos de defensores de los drechos humanos. Diariu de les NX.
http://www.un.org/news/dh/pdf/english/2009/21072009.pdf.

(8)    Axencia de Noticies RIA. Russia descarta les prebes d’un espertu de les NX sobre l’asesinatu d’un activista chechenu. http://en.rian.ru/russia/20090722/155588682.html.

(9)    Kamhi A. La Llei rusa d’ONG’s: potenciales conflictos cola llexislación internacional, nacional, y estranxera. Int J Not-for-Profit Law 2006; 9: 34-57. PubMed

(10)Freedom House. Lo peor de lo peor: les sociedaes más represives del mundiu 2009.
http://www.freedomhouse.org/uploads/WoW09/WOW%202009.pdf.