El Tribunal d’Estrasburgu conderga a Rusia pola desapaición de tres chechenos

El Tribunal d’Estrasburgu acaba condergar a Rusia a pagar 130.000 euros pola desapaición nel añu 2000 de tres persones na República de Chechenia, sigún afirma un comunicáu de prensa asoleyáu esti xueves 29 d’Ochobre.

Astur Txetxenia, 30 Ochobre 2009
Traducción: X.A.

El Tribunal d’Estrasburgu acaba condergar a Rusia a pagar 130.000 euros pola desapaición nel añu 2000 de tres persones na República de Chechenia, sigún afirma un comunicáu de prensa asoleyáu esti xueves 29 d’Ochobre.

Los 3 casos referíense a denuncies de los demandantes de que los sus familiares allegaos desapaecieron en Chechenia dempués de ser deteníos por soldaos rusos, informó’l Tribunal Européu de Drechos Humanos.

Mairudin Khantiyev, de 37 años, foi prindáu por un grupu armáu d’homes con uniformes de camuflaxe en Grozni, la capital de Chechenia, n’Avientu del 2000.

 Yusup Sabatayev, de 32 años, y Kazbek Vakhayev, de 35, fueron arrestaos el 23 de Febreru y el 1 d’Agostu de 2000 respectivamente.

Sigún el Tribunal, anque’l Gobiernu rusu admitió la detención tanto de Satabayev como de Vakhayev, nun foi quién a apurrir documentu degún que confirmare los sus arrestos y la posterior detención o puesta en llibertá.

“Los demandantes aseguraron que los sus familiares nunca nun fueron puestos en llibertá, y reconocieron nunes imáxenes de vídeu los cuerpos de los sus familiares, que fueron atopaos cerca de la localidá de Goy-Chu”, afirma’l Tribunal.

El Tribunal acusó a les autoridaes ruses d’un usu inxustificáu de “fuercia lletal polos sus axentes” ya incumplimientu de les sus obligaciones con resultáu de muerte. Tamién atopó que Rusia nun llevó a cabu investigaciones efectives sobre les tres desapaiciones.

Asina, el Tribunal consideró que los demandantes habrán ser indemnizaos con 114.000 euros por daños, y con otros 16.540 euros polos costes y gastos del xuiciu.