Comunicáu en solidaridá cola fuelga de los presos politicos palestinos

Esta fuelga, qu’entamó el día 27 de setiembre, tien l’oxetivu d’ameyorar les terribles condiciones qu’el gobiernu israelí impón a los más de 6.000 presos y preses polítiques que s’atopen encarcelaos anguañu

Rede Solidaria contra la Ocupación de Palestina, RESCOP. 13 de ochobre 2011

Les organizaciones miembru de la RESCOP espublizamos esti comunicáu en solidaridá colos alredor de 500 prisioneros politicos palestinos que güéi cumplen 2 selmanes en fuelga de fame en diferentes cárceles israelines, ente mientres la casi totalidá tan sofitando la fuelga 3 díes.

Esta fuelga, qu’entamó el día 27 de setiembre, tien l’oxetivu d’ameyorar les terribles condiciones qu’el gobiernu israelí impón a los más de 6.000 presos y preses polítiques que s’atopen encarcelaos anguañu, de los que 38 son muyeres y 280 menores. Ente ellos, 270 alcuéntrense baxo detención alministrativa.

Les demandes de los presos, en condiciones que nun dexen de deteriorase tres de les nueves midies impuestes fae un mes pol gobiernu Netanyahu, son les que siguen darréu:

1. finar col aislamientu completu a que tan sometíos munchos dellos y delles, demientres 3 años o tovía más, como ye’l casu por exemplu d’Ahmat Saadat (secretariu xeneral del Frente Popular pa la Lliberación de Palestina);
2. permitir la educación de les persones dientru de les prisiones, así como l’usu de llibros;
3. la posibilidá de ver canales de television árabes;
4. ameyorar la tremenda restricción a les visites familiares, así como de los sos abogaos, ente otres.

El gobiernu d’Israel qu’endureció la situación de los prisioneros y prisioneres como midía de castigu, nun sólo nun ta faciendo casu nengún a toes estes peticiones, sinon que a la escontra, ta aplicando el castigu al traviés d’aumentar l’aislamientu, prohibiendo les visites familiares, con castigos físicos qu’amenorguen tovía más la so salú demientres lleven díes ensin inxerir alimentu, el treslláu de prisiones, y otres.

La situación de los prisioneros y prisioneres polítiques palestines ye una amuesa más de la falta de voluntá política d’Israel d’algamar alcuerdu nengún hacia la paz, arriendes de la absoluta negación de too el marcu llexislativu internacional venceyáu a la ocupación, y en particular nesti casu de la situación de los presos, de la IV Convención de Xinebra.

Por esti motivu dende la RESCOP pidimos al gobiernu del Estáu español tomar midíes diplomátiques urxentes, tantu nel casu de la fuelga de fame, pa que los presos y preses palestines puedan algamar les sos llexítimes reivindicaciones, como n’un marcu más xeneral, pa presionar a Israel a cumplir la llexislación internacional, col  resultau bultable de pone-y fin a la ocupación de los Territorios Palestinos, permitiendo-y a la población palestina exercer el derechu al autodetermín pa decidir el so futuru, así como’l derechu al retornu de los refuxaos y refuxaes.

Rede Solidaria contra la Ocupación de Palestina - RESCOP
Asociación Al Quds, (Málaga),  Asociación Hispano Palestina Jerusalén (Madrid), Asociación Paz Ahora, Asociación Paz con Dignidad, Asociación pro Derechos Humanos de Andalucía, Boicot Preventiu (Barcelona), Castelló per Palestina, Comité de Solidaridá cola Causa Árabe (CSCA), Comunidad Palestina de Canarias, Comunidad Palestina de Cataluña, Coordinadora de apoyo a palestina rioja (La rioja), Ecologistas en Acción (Madrid, Valladolid), Acsur Las Segovias, Fundación IEPALA, Fundación Mundubat, Interpueblos (Cantabria), ISM Cataluña / Valencia, Izquierda Anticapitalista, Komite Internazionalistak (Euskadi), MEWANDO (Euskadi), Mujeres en Zona de Conflicto - M.Z.C., Mujeres por la Paz - Acción solidaria con Palestina (Canarias), Palestinarekin Elkartasuna (Euskadi), Plataforma Palestina Ibiza, Plataforma Solidaridad con Palestina (Sevilla), Red de Jóvenes Palestinos, Red de Judíos Antisionistas - IJAN, Sodepau , Sodepaz, Sodepaz Balamil - Valladolid, Taula Per Palestina (Baleares), Xarxa d’enllaÇ amb Palestina (Barcelona), Xarxa Solidaridad Palestina (Valencia).