Chechenia 1999 - 2009: la guerra invisible de Vladimir Putin

Sara Bicchierini, periodista del Corriere della Sera, especial pa Caucas News

Los rasgos y mecanismos de la "guerra de la información" (information war) nun son esclusivos de los Estaos Xuníos y d'otros gobiernos de países occidentales. Les característiques d'esti tipu de manipulación comunicativa son claramente reconocibles tamién na última guerra ente la Federación Rusa y Chechenia(..)

Conceyu Asturianu de Solidaridá con Chechenia,
http://asturieschechenia.nireblog.com/

Anguañu les guerres nun se combaten namás con armes, sinon tamién asegurándose'l consensu de la opinión pública al traviés de la esbilla de datos y noticies sigún la precisa voluntá y la orientación de los gobiernos nacionales. Por esta razón, en tiempu de conflictu, el mundu de los medios de comunicación tá sometíu, cada día más, a presiones pela parte de les autoridaes.

Dende la Guerra'l Golfu de 1991, cuando los responsables políticos se dieron cuenta de que la (re)presentación de la guerra na pantalla podría determinar los resultaos de la llucha, los conflictos contemporáneos garraron la forma de “guerres televisaes” (TV wars).
Los rasgos y mecanismos de la "guerra de la información" (information war) nun son esclusivos de los Estaos Xuníos y d'otros gobiernos de países occidentales. Les característiques d'esti tipu de manipulación comunicativa –afayada a cada situación nacional particular– son claramente reconocibles tamién na última guerra ente la Federación Rusa y Chechenia, de tal mou que podemos asegurar que se llevó a cau una information war (en rusu, informatsionnaja vojna).
 La nueva estratexa de xestión de noticies.
La Segunda Guerra Chechena, que entamó na seronda de 1999 y acabó definitivamente en 2009 tres dellos anuncios oficiales que negaben la persistencia de los enfrentamientos, tá considerada como ún de los conflictos más herméticos de la hestoria contemporánea pola falta de datos fiables y a la "censura silenciosa" impuesta pol gobiernu de Putin.

La estratexa de xestión de noticies (news management) – llanzada en 2000 pol Kremlin como una acción de "contra-propaganda" pa marxinar los fluxos d'información que llegaben d'Occidente – creó un "vacíu d'información" alrodiu'l conflictu y algamó'l so oxetivu al privar a los ciudadanos del so drechu a ser informaos. La nueva forma de control estatal sobre'l sistema de los medios de comunicación de mases na Federación Rusa combinóse cola vertical del poder, la llínia política promulgada por Putin, d'aquella presidente nel so primer mandatu. Esta estratexa política basábase en colocar a figures cercanes a él en posiciones clave de los estremaos sectores de la sociedá rusa, al mesmu tiempu que abolía les “ramificaciones” o niveles intermedios nel procesu de toma de decisiones col oxetivu de fortalecer el poder central.
 
L'aplicación d'esta visión xerárquica al mundu de la información xunióse en parte a una nueva estatalización, en parte al pasu forzosu hacia grupos económicos privaos cercanos al Kremlin de los medios de comunicación privaos y más independientes. Estos taben en manes d'oligarques millonarios que nun sofitaben les posiciones de Putin, como Borís Berezovsky y Vladímir Gusinsky, que poseíen dos de los mayores canales televisivos, ORT y NTV, respectivamente. Acusaos d'evasión fiscal y otros crímenes financieros, amás de perder la so propiedá, tuvieron que dexar el país y tovía viven nel estranxeru. Alexandr Jodorkovsky, ex presidente de Yukos, un xigante del sector petrolíferu, y propietariu del diariu Moskovskaya Pravda, financió los partíos d'oposición, acariciando tamién la idea de postulase como candidatu nes ellecciones presidenciales contra a Putin. Por esto tá na cárcel dende 2003.
 
El trespasu de propiedá de los medios de comunicación tornóse nun mayor control pela parte'l gobiernu sobre casi tola prensa y la televisión. Como consecuencia de la “verticalización” de los mass media, ex funcionarios del KGB, asina como miembros de les fuercies de seguridá y del exércitu (estos funcionarios militares son conocíos como siloviki), fueron colocaos en puestos importantes en munchos medios de comunicación (por exemplu, en dalgunos de los mayores canales de televisión: ORT, RTR y Kul’tura), mientres que la información taba controlada nun solo pol Ministeriu de Cultura y de Comunicación de Mases, sinon tamién por nuevos órganos políticos creaos pol Kremlin.
 
Nacieron asina'l Centru Rusu pa la Información, dirixíu pol ex voceru presidencial y por un xeneral de FSB (la nueva denominación de KGB), y un grupu interguvernamental pa la coordinación d'informaciones que axuntaba dellos ministerios, como los de Defensa y Xusticia. En particular, el primer órganu, creáu en 1999 (decreto 1538-R) -cuando la guerra acababa d'entamar y Putin tovía yéra Primer Ministru - tuvo parte activa na campaña ellectoral presidencial de 2000, dando instrucciones a los soldaos sobre los términos que tendríen que utilizar pa falar de les operaciones militares y organizando “tour” especiales pa periodistes autorizaos por zones cercanes a los llugares onde teníen llugar los enfrentamientos. Estes escursiones, nes que nun se podía entrevistar a soldaos nin recoyer imáxenes “crueles” del conflictu, yéren l'únicu mou d'acceder a les zones de guerra. Llegar d'otra manera yéra demasiao peligroso y esto contribuyó a un vacíu informacional. Les normes d'acreditación pa los periodistes afitábales una nueva figura (creada por decretu del presidente Putin en 2000): l'asistente presidencial (el primeru que ocupó esti puestu foi Sergéi Yastrzhemski). La so xera consistía en coordinar la información oficial sobre'l Cáucasu y xestionar les relaciones colos periodistes. Ente les normes que afitó, taba la prohibición de difundir informaciones que pudieren “amenazar” l'honor y l'orgullu del exércitu.
 
Les nueves normes d'acreditación recuerden a otres normes ellaboraes pol Pentágonu mientres la Guerra'l Golfu de 1991, como'l documentu Annex Foxtrot, que habíen roblalu tolos periodistes rexistraos pa evitar la pérdida de l'acreditación dientro'l mandu aliáu, na zona de conflictu. Taba prohibío facer semeyes de muertes violentes o de los efectos de la guerra sobre les víctimes, asina como facer entrevistes non autorizaes a los soldaos o difundir información sobre les pérdides aliaes. Obviamente, taba prohibío dafechu dir al frente ensin una escolta militar o fuera de los “tours”.

En Rusia creóse tamién el Centru pa les Relaciones Públiques de les Fuercies Federales de Seguridá (FSB), que representaba la mayor, si non la única, fonte d'información sobre la guerra en Chechenia.

Al mesmu tiempu, unos cambios na llexislación relacionaos colos mass media (por exemplu l'anteproyectu de llei sobre la “Llucha contra la propaganda del terrorismu nos medios de comunicación”, aplicáu xusto dempués de la so aprobación na Duma n'ochobre de 2002) lleváronlos a convertise en víctimes de les nueves normes y de les campañes anti-terroristes. Lo que los periodistes necesitaben yéra una estratexa pa la defensa de los sos intereses y la so integridá frente a la presión del poder estatal. Coles nueves lleis anti-terrorismu, por exemplu, ún de los reporteros televisivos más populares, Leonid Parfénov, perdió'l trabayu. El so error: intentar tresmitir na canal pa la que trabayaba la entrevista cola muyer d'un llíder independentista chechenu. En plena guerra, mientres los tráxicos fechos de la escuela de Beslán (2004), cuando unos rebeldes caucasianos ocuparon l'edificio enllenu de neños, padres y profesores, foi separtáu del so puestu tamién Raf Shakirov, ún de los editores más conocíos del diariu Izvestiya. Publicara unes semeyes que mostraben a neños y a los sos familiares cubiertos de sangre. El diariu taba baxo'l control de la compañía Interros, cercana al Kremlin, que consideró la ellección de Shakirov como inadecuada por nun correspondese cola versión oficial sobre los fechos y sobre la intervención de les fuercies de seguridá. Esto nun foi solo un casu de censura, sinon que amás tamién daría llugar a l'autocensura ente los otros periodistes, cada día más asustaos.
 
Como yá mencioné enantes, les característiques típiques de les guerres de la información contribuyeron a llimitar la llibertá de prensa. Les restricciones nes normes d'acreditación de periodistes y del so accesu a les zones de guerra orixinaron una forma de censura de la fonte pa los medios de comunicación. D'otra parte, el fluxu constante de propaganda de la prensa oficial del Gobiernu rusu ralentizó'l trabayu de los periodistes, que nun teníen tiempu pa verificala nin medios pa facelo por nun tener accesu a otres fontes, lo que contribuyó a la incapacidá del públicu en xeneral pa entender lo que en realidá taba asocediendo nel sur del Cáucasu. Tratábase d'una braera “inundación mediática”. Demasiada información, si nun puede ser ellaborada, crea, como paradoxa, un silenciu informativu.

Nós y Ellos
 
Gracies a l'adopción d'una escala de valores que reconocía la llealtá al poder como dalgo pa ser recompensao, el Gobiernu podía acusar de falta de patriotismu a tolos que nun taben d'alcuerdu cola so estratexa, periodistes incluyíos, trazando una clara distinción ente “collacios y enemigos”, “nós y ellos”. La mesma distinción que separtaba, sigún la prensa y la televisión más cercanes al Gobiernu, a los rusos y a los chechenos nos enfrentamientos.
 
La guerra asimétrica ente les poderoses fuercies ruses y les célules rebeldes de Chechenia, mal organizaes, representóse na televisión rusa como la oposición simplificada del Bien absolutu y del Mal absolutu, personificada como la llucha d'un héroe (Vladímir Putin) contra unos anti-héroes (los llíderes de la insurxencia chechena). Mientres que l'héroe positivu, xóven y fuerte, permanecía siendo'l mesmu, los anti-héroes cambiaben nes diferentes fases del conflictu: primero yéren Khattab y Shamil Basáyev, autores de la invasión de Daguestán que supuestamente fizo españar la guerra en 1999; dempués, fueron Aslan Masjádov, presidente de la República independiente de Chechenia-Ichkeria dende 1997, y señores de la guerra como Salman Radúyev.
 
El conflictu tornara nuna especie de novela bidimensional, descrita ensin dar bastante espaciu a debates nin a desplicaciones.
 
Aumentando la presión sicolóxica sobre la opinión pública, el gobiernu de Putin tamién punxo en marcha campañes que alendaben el racismu y un sentimientu de "caucasofobia" ente los ciudadanos rusos, amás de fomentar el patriotismu. La violencia diaria escontra los ciudadanos d'orixen caucasianu que vivíen n'otres rexones de Rusia empezó como una consecuencia d'esti nueu mou de percibir el Cáucasu y los sos pueblos. Como afirmó'l periodista rusu Sergéi Bajmujametov: “cuando dende arriba les persones que detenten el poder y los periodistes falen de “patriotismu ilumináu”, abaxo, nes cais, empiecen los pogroms”.
 
El papel de los periodistes nesti procesu foi perimportante. Na Primer Guerra Chechena (1994-1996), baxo la presidencia de Borís Yelsin, los medios de comunicación de mases presentaben a los chechenos comparándolos con peligrosos llobos (en rusu, borsí) que habíen ser eliminaos, pero que yéren respetaos. Asina, Aslán Masjádov yéra "el llobu de cara humana", mientres que Shamil Basáeyv y Salman Radúyev yéren, respectivamente, “el llobu solitariu" y "el llobu alloriáu". D'otru mou, nel segundu conflictu, los chechenos pasaron a ser definíos na prensa y na televisión como criminales (bandity), terroristes u homes llobos (oborotni), ye dicir criatures monstruoses cuya esistencia va escontra la naturaleza.
 
Guerra virtual, efectos reales

Les autoridaes utilizaron a los medios de comunicación pa difundir les sos idees y les sos razones pa xustificar una "guerra xusta", a sabiendes de que naide nun diba cuestionar públicamente la so llexitimidá y credibilidá.
 
El conflictu sufrió nel llinguaxe de los voceros del gobiernu y de los medios de comunicación, que agora taben más o menos directamente baxo la influencia del Kremlin, una espectacularización y una tresfiguración. Como nuna película d'aición o nun videoxuegu, la guerra tenía que paecer una operación “fast and light”, rápida y ensin dolor. Col claru oxetivu d'interponer distancia cola primer y desastrosa guerra de Chechenia, les declaraciones describíen los bombardeos como "quirúrxicos" y falaben de l'agresión militar directa "solo" escontra oxetivos militares bien definíos, como l'abellugu de los llíderes chechenos.
Ocultando les imáxenes de sangre y silenciando les voces de los chechenos nos medios de comunicación, el gobiernu algamó tresfigurar la guerra y convirtióla en dalgo "virtual", allonxao, casi una película, un videoxuegu o un espectáculu televisivu. Col nome de “Operación Antiterrorista Policial”, la guerra presentábase, amás, como una aición policial xustificada, de magar los ataques del 11 de setiembre de 2001 en Nueva York, pola guerra internacional escontra'l terror. Anque'l conflictu ente Rusia y Chechenia fuere un problema de política interior.
 
Tres esta fecha, la posición d'Europa y EE.UU. cambió con fuerza: la individualización d'un enemigu común, el terrorismu islámicu, permitió a Vladímir Putin esborriar los contrastes y les feroces crítiques que llegaben dende l'estranxeru sobre les violaciones de drechos humanos en Chechenia. Por embargu, les autoridaes ruses dexaron vivu l'espectru de la longa manus occidental, siempre útil pa enfrentar y facer españar, tratándoles d'anti-rusas, les rares espresiones de disidencia.
 
Los efectos de la desinformación mientres la "guerra invisible" realizada nel Cáucasu alteraron la imaxen del pueblu chechenu na cultura rusa y, polo tanto, contribuyeron a conducir al éxitu final de Putin na guerra d'información sobre Chechenia. La opinión pública rusa reduciérase a un públicu pasivu d'espectadores convidaos a asistir delantre la pantalla a una guerra llonxana que por embargu interesaba al so país.