Tortura y asesinatos en Chechenia

Svetlana Reiter, corresponsal del Bolshoi Gorod y Esquire Russia

Alaudi Sadykov, ancianu profesor de ximnasia (..) trabayaba nun grupu que barría les cais de la capital, Grozni. Un día del añu 2000 taba clasificando montones de basura cuando pasó al so lláu un vehículu blindáu de tresporte. Ésti paró y el conductor entrugó-y por una cai. Sadykov desplicó-yos comó llegar, pero los pasaxeros del vehículu-y dixeron “Non, sube y enseñanos el camín”. (..) Atáronlu a un radiador, cortáron-y la oreya, quemaron-y la palma d'una mano con un fierru caliente y rompiéron-y tolos dientes. Tres meses dempués tiráronlu nuna cuneta. Medio muertu, Sadykov foi quien a llegar gateando a casa y al día siguiente metió un escritu na oficina de la Fiscalía.

OpenDemocracy.
Traducción: Conceyu Asturianu de Solidaridá con Chechenia

Formalmente, les hostilidaes pararon yá en Chechenia, pero continúen los secuestros, tortures y asesinatos de civiles a manes de les autoridaes na rexón. Igor Kalyapin, cabezaleru del Comité contra la tortura, fala con Svetlana Reiter sobre'l destacable y peligrosu trabayu que fae esti colectivu na busca de xusticia pa les víctimes.

El Comité contra la tortura trabaya en cinco rexones de la Federación rusa, ente les que tán les repúbliques de Bashkortostán y Chechenia. En toles rexones el nuesu trabayu consiste n'intentar obligar a les axencies d'investigación criminal (anteriormente llamaes Oficines de la Fiscalía, agora “Comité d'Investigación”) pa qu'investiguen adecuadamente los crímenes cometíos pola policía y los miembros d'otros servicios especiales.

Los investigadores nun tán, na so mayoría, interesaos en llevar a esos delincuentes énte la xusticia y tán bien preparaos p'asegurar que los casos que-yos lleguen nun prosperen. Pero nel Comité contra la tortura tamién conocemos les regles del xuegu y, cuando podemos, evitamos que los investigadores bloqueen los casos. Tenemos creada una serie de procedimientos llegales que permiten a les ONG's llevar alantre les sos propies investigaciones y sumar los resultaos a los procedimientos criminales, anque los investigadores lluchen siempre contra estes investigaciones de toles maneres posibles.

Nes rexones normales el trabayu nunca nun ye fácil pero, por embargu, somos quién a facer llegar a los xulgaos la mayoría de los casos qu'asumimos. Hasta'l momentu llevemos con éxitu 75 denuncies contra funcionarios del Estáu (la mayoría policíes) por usu illegal de la violencia.

En Chechenia tamién algamemos éxitos sinificativos. Antes, cuando'l trabayu taba rellacionáu colos soldaos del exércitu federal, vimos a dalgunos d'ellos xulgaos. Por embargu, anguañu, nel feudu personal del presidente chechenu Ramzan Kadyrov, onde axentes federales fueron entregaos a la policía llocal y los servicios especiales, el trabayu volvióse potencialmente más difícil y los pilancos estraordinarios a la xusticia son cada vez mayores.

Los federales

Un de los nuesos casos en Chechenia concernía a un profesor de ximnasia, Alaudi Sadykov, que nunca nun tuvo implicáu en dengún problema. Esti ancianu trabayaba nun grupu que barría les cais de la capital, Grozni. Un día del añu 2000 taba clasificando montones de basura cuando pasó al so lláu un vehículu blindáu de tresporte. Ésti paró y el conductor entrugó-y por una cai. Sadykov desplicó-yos comó llegar, pero los pasaxeros del vehículu-y dixeron “Non, sube y enseñanos el camín”. Foi tresportáu hasta la comisaría del equipu multidisciplinariu, onde taben policíes de rexones allonxaes como Siberia Central y Khantiy-Mansiisk desplegaos en Grozni. Atáronlu a un radiador, cortáron-y la oreya, quemaron-y la palma d'una mano con un fierru caliente y rompiéron-y tolos dientes. Tres meses dempués tiráronlu nuna cuneta. Medio muertu, Sadykov foi quien a llegar gateando a casa y al día siguiente metió un escritu na oficina de la Fiscalía.

Lo que quinxeron sacar d'él nun tá claro, namás queríen torturalu. Tuvo reteníu nun improvisáu campu de concentración dientro de la comisaría del distritu d'Oktyabrsky, en Grozni. La fiscalía sancionó esta acción y diplomáticos europeos en visita a Chechenia pidiéron-y disculpes.

Los sádicos policíes fueron identificaos -tanto nós como los investigadores oficiales tenemos los sos datos personales- pero toos ellos fueron unviaos de vuelta a Khantiy-Mansiisk y continúen sirviendo na policía. La investigación paralizóse: nun hai datos oficiales que certifiquen qu'estos policíes tuvieren nunca en Chechenia y cuando los investigadores viaxaron a Khantiy-Mansiisk pa identificalos, se-yos dixo que “marchái d'equí poles buenes. Nós nun entregamos a la nuesa xente. Estos mozos son héroes porque tomaron parte nuna operación pa combatir a los contrarrevolucionarios”. El casu llevóse al Tribunal Europeu de Drechos Humanos y Rusia tuvo que compensar a la víctima, Sadykov, con unos 90.000 euros. Asina que nós, los contribuyentes rusos, pagamos poles “acciones audaces” de los héroes de Khantiy-Mansiisk, mientres llamen policíes a xente a la que-y presta cortar oreyes a la xente.

La policía llocal: los homes de Kadyrov

Hai munchu tiempu qu'acabaron les hostilidaes a gran escala nos valles de la República de Chechenia, pero sigue habiendo secuestros nesta rexón aparentemente próspera. Los secuestros antes yéren cosa de la policía federal, que tapaben les matrícules de los sos coches y llevaben pasamontañes pa imposibilitar la so identificación. Agora la identificación nun ye problema: los que cometen estes brutalidaes son casi siempre policíes llocales, y conocemos los sos nomes y a qué comisaría pertenecen. Enseñen los sos documentos cuando saquen de casa y arresten a una persona. En cinco años nin un sólu de los llamaos “policíes de Kadyrov” foi lleváu a un tribunal. La descripción oficial d'estos fechos suel ser la de “secuestru por persones ensin identificar”, anque tol mundu na zona sabemos exactamente quién son eses “persones desconocíes”.

Nun toi seguru de si esti tipu de delitos tá descritu na llei rusa. ¿Secuestru? Non, porque los secuestros fáense clandestinamente, mientres que nos casos de los que falamos too se fae abierta e incluso ostensiblemente. ¿Arrestu? Otra vegada non, porque la detención presupón una serie de midíes llegales: una denuncia, un confinamientu nun llugar estipuláu pola llei, accesu a un abogáu, etc... Por embargu, la llei internacional tién una descripción más adecuada, “desapaición violenta”. Hai dos años Rusia robló la Convención de les Naciones Xuníes relativa a esti tipu de delitos, pero la xente sigue desapaiciendo en Chechenia, igual qu'antes, ensin dexar rastru. Cuando los familiares acuden al Comité d'Investigación ábrese un procesu xudicial, pero'l casu nunca nun s'investiga. A vegaes esti tipu de casos queden archivaos: la organización Memorial calcula qu'esisten 3.000 casos archivaos.

Oficina d'Investigación nb. 2

Un casu relacionáu colos homes de Kadyrov foi, sorprendentemente, investigáu con éxitu. El xuiciu tuvo llugar en 2007 nel Tribunal Supremu de la República de Chechenia, anque los crímenes tuvieron llugar en 2005.

Ruslan Asuyev, Islam Agayev y Aslan Dzhamulayev yéren tres policíes que quinxeron ascender nes sos carreres aumentando'l númberu d'insurxentes eliminaos. El so modus operandi yéra ofrece-y a la xente un empléu como policíes y citando a esa xente a una entrevista. Dempués procedíen a vestir a eses persones con traxes de camuflaxe, armalos y obligalos a echar a correr, pa llueu matalos. Coles armes na mano, podíen presentar a les víctimes como guerrilleros. N'otros casos, secuestraben a muyeres na cai y asesinábenles. Llueu estos policíes poníen-yos un cinturón d'esplosivos col oxetivu d'afirmar que les muyeres yéren guerrilleres tamién.

La “ratio d'efectividá” d'estos policíes yéra, lóxicamente, mui alta y les sos carreres progresaron. Tamién ficieron incursiones en Daguestán e Ingushetia, onde secuestraben a empresarios y desixíen rescate por ellos. Y llueu ellos mesmos los “lliberaben”. La Oficina d'Investigación nb. 2 -cuyos propios funcionarios nun yéren ayenos a la comisión d'abusos a los drechos humanos- descubrió lo que taba faciendo'l grupu d'Asuyev y, sorprendentemente, xulgólos y condergólos. N'aquella época esta Oficina facía casu a los contrarios al presidente Ramzan Kadyrov, y Kadyrov entamó a da-y a la oficina la peor de les reputaciones pa eliminar a los sos competidores de les posiciones d'influencia, consolidando asina'l so total control sobre les estructures verticales de poder.

Estemirova

A mediaos de los 2000 la carta blanca pa llevar a cau violencia illegal foi tresfería gradualmente de los Federales a los representantes llocales de les fuercies de seguridá, controlaes por Kadyrov. Como resultáu d'ello, hai cuatro años entamemos a recibir más denuncies sobre los nuevos policíes de Kadyrov que sobre los Federales. Les denuncies que llegaben a la nuesa oficina apuntaben siempre a ún d'estos tres homes: el diputáu Adam Delimkhanov, el xefe de Gobiernu Magomed Daudov y el cabezaleru de les OMON (fuercies especiales) Alikhan Tsakayev. Cada vez que falaba colos mios compañeros me dexaben claro que si asumíen un casu contra cualesquiera de les tres persones citaes, tanto los mis compañeros como los sos familiares podríen ser víctimes d'intimidaciones, tortures o incluso asesinatos. Como director de la organización llegué a la conclusión de que, cenciellamente, nun teníemos nin la capacidá nin los recursos p'asumir estos casos, y tuvimos que desplicá-ylo a les víctimes que s'averaron a nós.

La xente entamó entoncea a dirixise a Memorial, organización dende la que Natalia Estemirova, ensin dengunos conocimientos previos fonderos nin muncha experiencia, entamó a trabayar con valentía suficiente como p'asumir los casos. Nun foi hasta dempués del so asesinatu cuando descubrí cómo ella y los sos compañeros taben trabayando tan bien nos casos de secuestros. Esti trabayu nun yéra namás atrevíu sinon tamién eficiente. Pero acabó col so asesinatu. Tomé concencia de que'l trabayu qu'ella fizo ye'l que nos refugáremos y que'l nuesu Comité tenía qu'entamar a trabayar sobre nuevos casos de desapaiciones o abandonar Chechenia. Esto polo menos diba ser honesto: zarrar la oficina y dicir que nun yéra posible siguir trabayando equí.

Brigaes móviles conxuntes

Pero decidimos qu'esi nun yera'l camín correctu. Los nuesos abogaos residentes en Chechenia nun podíen encargase d'esi tipu de trabayu -podríen correr la mesma suerte qu'Estemirova-. Asina qu'entamemos a coordinar equipos conxuntos (un funcionamientu que yá fuera probáu n'otres partes de Rusia nes que tamién había abusos contra los drechos humanos). Los nuesos abogaos d'otres rexones entamaron a venir a Chechenia, trabayando en bases itinerantes. Éstes consistíen en grupos de tres persones que permanecíen en Chechenia mientres un mes y dempués yéren remplazaes por otres persones. Alquilemos un pisu nel centru de Grozni pa usalu como oficina. Nelles copiemos el trabayu del Comité d'Investigación oficial: la mayoría de los sos miembros tamién veníen a Chechenia mientres unos pocos meses, trabayando na so sede y abandonando ésta namás en casos d'estrema necesidá, y nunca en solitariu. Cuando viaxaben a entrevistes concertaes mientres una investigación nunca diben menos de tres persones. Na so oficina y nos sos coches teníen equipos de grabación, y con ellos grababen y escribíen too, asegurándose asina un pocu de protección. Nós facíemos tolo que podíemos pa protexer a los miembros de la oficina. Ganemos una reputación en Chechenia gracies al usu de ferramientes d'alta tecnoloxía y esto funcionó como elementu disuasoriu. Pero l a tecnoloxía, por supuestu, nun yéra protección suficiente contra les bales si nos disparaben.

El primeru d'estos equipos llegó a Chechenia'l 30 de payares de 2009, col simple oxetivu de facese cargu d'unos pocos de los nuevos casos de secuestros, e intentar averigüar lo que pasaba dientro del Comité d'Investigación y por qué dengún casu taba siendo investigáu.

Ficímonos cargu de nueve casos y los nuesos abogaos convirtiéronse en participantes oficiales de los xuicios, representando a les víctimes. En tolos casos les acusaciones se ficieron baxo l'artículu 126 del Códigu Penal, que se refier a la responsabilidá por secuestru. Esti artículu cambióse dempués pol artículu 105 (asesinatu), porque ye evidente que si una persona nun apaez dempués d'un llargu períodu de tiempu, tea probablemente muerta. D'estos nueve casos, dos yá tán archivaos: nun casu fuumos quién a demostrar que la desapaición nun tuvo llugar por razones delictives; nel otru casu los familiares de la víctima decidieron llevar alantre acciones contra la nuesa opinión, cosa que ye inesplicable, yá que al facer un comunicáu considerábemos que taben poniéndose en peligru a ellos mesmos. Agora vamos dar dellos puntos de vista sobre dos de los restantes siete casos nos que tamos trabayando anguañu:

El reximientu del petróleu

Estemirova taba trabayando nel casu d'un mozu llamáu Apti Zainalov y llueu asumímoslu nós. Zainalov llegó a Chechenia en 2009 dende Saratov, nel sur de Rusia. Tenía un hestorial llimpiu dafechu: durante un curtiu tiempu participó n'operaciones durante la primer guerra chechena (1994-96) nel bandu independentista, pero ¿quién nun participó d'aquella? Foi amnistiáu y pasó dellos años na rexón de Saratov. Quinxo dir a estudiar a Exiptu, pero nun pudo facelo, asina que decidió volver a casa cola so madre. Nunca nun lo fizo.

Voló a Chechenia'l 26 de xunu de 2009 y garró un taxi nel aeropuertu de Grozni. Llegó hasta la cai Pervomaisky, nel centru de Grozni, onde foi prindáu, obligáu a salir del coche y metese n'otru coche perteneciente al llamáu “reximientu del petróleu” (oficialmente Reximientu Especial de Serviciu de Patrulla del Ministeriu Chechenu del Serviciu de Protección Interior Estradepartamental). Esti serviciu supónse que protexe les instalaciones petrolíferes y los oleoductos, pero lo que foi nun tiempu una enorme infraestructura de procesamientu de petróleu quedaron casi completamente destruyíes durante les guerres chechenes, asina que hai pocu trabayu que facer nesi área. Les divisiones del reximientu faen, por embargu, tolo que quieren: ye un exércitu completu, al contrariu qu'otros, y tá comandáu por Sharip Delimkhanov, l'hermanu d'Adam, el diputáu mencionáu más arriba. El clan Delimkhanov ye mui influyente en Chechenia: Ramzan Kadyrov considera a Adam el so preferíu pa sucedelu, pesie a la presencia d'Adama na llista internacional de persones buscaes.

Apti Zainalov foi deteníu y, cenciellamente, desapaició. La so madre, Aima Makaeva, acudió a la oficina de la Fiscalía y abrióse un casu baxo l'artículu 126, pero nun se fizo denguna investigación. Aima acudió dempués a Memorial y dos selmanes más tarde dellos miembros d'esta organización descubrieron por casualidá que nun de los quirófanos del hospital rexonal central había un paciente con feríes de bala nel estómagu, baxo vixilancia nun aislamientu estrictu, y esti paciente resultó ser Apti. Estemirova acudió al fiscal inter-distritu, que la tuvo esperando dos hores. Mientres esi tiempu Apti foi treslladáu a otru llugar, too ello delantre de la so madre, que taba intentando en vano entrar nel hospital.

Dempués súpose qu'una selmana antes, representantes de la Fiscalía recibieran información de qu'Apti taba nel hospital y fueran a velu pa inspeccionar la situación. El documentu oficial diz: “nun de los quirófanos hai un mozu, d'ente 28 y 32 años d'edá, y d'una altura d'ente 1,80 y 1,85 mts., que permanez allí vixiláu por dos militares non identificaos con uniforme de camuflaxe. Los guardies prohibieron la entrada al quirófanu al fiscal, amenazándolu con dispara-y y matalu”. Esti ye'l documentu internu que recueye la investigación que foi llevada a cau a petición de nueso. Unos persones con uniforme de camuflaxe pueden dici-yos a los miembros de la Fiscalía “un pasu más y táis perdíos”, y los valientes servidores de la llei rusa dan la vuelta y marchen obedientemente.

Dempués d'esti sucesu Zainalov tuvo una selmana más nel hospital y nun pasó nada. El fiscal, dempués de conocer onde taba reteníu la víctima del secuestru, nun movió un deu pa que lu lliberaren. Dempués d'una señal llegada de dalguna parte, la víctima foi treslladada rápidamente. Ye lóxico suponer que Apti yá nun tá vivu, pero tamos trabayando nel so casu y la so madre ye, por supuestu, mui vulnerable. Si unos fiscales bien preparaos se muestren sumisos énte esta xente, tá claro que doblegar a una muyer chechena nun ye problema pa ellos.

Unu que vivió pa contalo

Hai un casu nel que toi bastante esperanzáu. Non porque la investigación fuere llevada a cau correctamente, que nun foi asina, sinon porque de los siete casos nos que tamos trabayando ye l'únicu nel que la víctima del secuestru sobrevivió y va ser un testigu de primer mano. Llámase Islam Umarpashaev.

Los sos padres cuntáronos n'avientu de 2009 que'l so fíu, de 26 años d'edá, foi prindáu en casa y dempués desapaeció. Nun hubo argumentación formal pa la so detención. Visitó una sala de chat d'internet nel so teléfonu móvil y punxo dellos comentarios nada favorables sobre los policíes chechenos. Esti fechu foi interceptáu e Islam foi arrestáu y tuvo reteníu durante 4 meses y encadenáu a una oleductu dientro la base de les OMON (fuercies especiales) en Grozni. Cuando taba nesi acuartelamientu los soldaos nun-y escondieron los planes que teníen preparaos pa él pa la fiesta del 9 de mayu: “vamos ponete un uniforme, date una pistola y matate como a un home”.

Foi lliberáu por delles razones. Primero porque'l nuesu equipu móvil yá taba operando en Chechenia, asina que pronto tuvimos noticia d'esti fechu. Ficimos una apelación al Tribunal Europeu de los Drechos Humanos y reaccionaron bien rápido, coincidiendo cola nuesa campaña d'información. Por eso a los captores-yos diba resultar perdifícil facer pasar a Umarpashaev por un guerrilleru. Y segundo por fuimos quién a consiguir la so factura de teléfonu y afitar rápido ónde tuviera reteníu.

Cuatro meses dempués, el 2 d'abril de 2010, l'investigador de la policía Anzor Dyshniyev, de la comisaría del distritu d'Oktyabrsky en Grozni, sacó a Islam fuera de la base de les OMON. Pero pa lliberalu Dynshniyev tenía que saber ónde tuviera esos cuatro meses. Fizo prometer a Islam que diba escribir un comunicáu nel qu'asegurare que tuvo na rexón de Moscú tou aquel tiempu. Dempués llamó por teléfonu al investigador Isayev, que taba encargáu del casu, pa que viniere y escribiere'l comunicáu. Pero resultó que la conmoción que causó'l casu d'Umarpashaev fizo que'l casu llamare l'atención del fiscal Gaiberkov, que s'encarga de los casos más importantes. Permitió a Islam volver a casa, pero cola condición de que fuere a la comisaría d'Oktyabrsky y ficiere un escritu nel que asegurare que tuviera ausente durante esos cuatro meses y cola condición tamién de que denunciare a la policía.

Afeitaron a Islam, yá que la so barba creciera bastante, y entregáronlu al so padre y al so hermanu, que fueron a recoyelu, y quizás hubiere escrito'l comunicáu sobre la so estancia na rexón de Moscú, pero los sos padres taben asustaos porque se punxere en marcha una conspiración y que los recientes, d'aquella, españíos nel metro de Moscú, que s'atribuyeron a los guerrilleros chechenos, se-y atribuyeran a Islam Umarpashaev. Decidieron pidinos conseyu y tomemos la decisión de sacalu de Chechenia lo antes posible. Esa mesma nuechi punxímoslu nun avión rumbu a Moscú, y una vez allí viaxó en coche a Nizhny Novgorod. Nel camín Islam cuntónos que, anque recibió golpes al principiu del so encarcelamientu, dempués namás recibió maltratu síquicu. Tratáronlu igual que un bon granxeru trata al ganáu: la comida nun yéra mala, porque un guerrilleru tién que paecer que tá en buena forma.

Cuando les OMON chechenes descubrieron qu'Islam desapaeciera, arrestaron al so padre y al so hermanu, y-yos dixeron que nun los diben soltar hasta que volviere Islam. Recibí una llamada en Nizhny Novgorod del investigador Dyshniyev y díxome lo mesmo. Darréu llamé a Alkhanov, ministru chechenu d'Interior, que me prometió que diben soltalos. Nun fueron lliberaos y fice otra llamada pa dici-y a Alkhanov que la policía taba engañándonos tanto a nós como a él yá que nun soltaben a los familiares d'Islam. Dempués supe que ún de los policíes grió-yos al padre y al hermanu d'Islam que “impórtame una mierda Alkhanov, él namás ye un Xeneral y yo soi pariente de Ramzan (Kadyrov). Tengo más influencies qu'Alkhanov”.

Poco dempués empezaron a lleganos peticiones oficiales pa qu'entregáremos a Islam Umarpashaev. Teniendo en cuenta la cantidá de tiempu que tarda una carta en llegar a Chechenia, respondí concenzudamente a cada una d'elles, mientres movíemos a Islam d'un lláu a otru, polo que nun fueron nunca a dar con él. Mientres esti xuegu del gatu y el ratón, lleguemos a un alcuerdu col fiscal Gairbekov pa que-y tomare testimoniu, tal y como-y obliga la llei. Umarpashaev testificó en Nizhny Novgorod y, pola nuesa insistencia, la so detallada narración incluyóse nel sumariu del casu. Pa tener total seguridá, llevemos a Islam a entrevistase col Defensor del Pueblu rusu, Vladimir Lukin, y durante esa entrevista escribimos otra testificación de la que mandemos una copia a Chechenia.

El siguiente pasu yéra que Islam fuere a la base de les OMON y confirmare el llugar esactu del so cautiveriu, pero llévonos más de 6 meses el poder acceder a la base. Gairbekov desplicó que nun-y diben dexar entrar na base y confesónos que “tengo que vivir equí y pueden matame”. Nun dio dengún pasu oficial: namás intento convencenos de que debíemos lleva-y a Umarpashaev pa que lu interrogare. Entendimos la so posición y ficimos una solicitú formal de protección estatal.

A finales de setiembre de 2010 llevemos a Islam a Grozni, pero hubo qu'esperar una selmana a que Gairbekov se viere con él. Islam y los sos padres teníen un guardaespaldes y un día esti guardaespaldes llevó al padre d'Islam a casa d'Alikhan Tsakaev, mandu de les OMON, que-y desixió que retiraren toles acusaciones nun plazu de 24 hores. A cambiu, Tsakaev prometió que les OMON diben dexar tranquila d'ehí p'alantre a la familia.

Lleguemos a la conclusión de que teníemos que llevar a tola familia a un llugar seguru y pasar el casu a instancies superiores o a otra rexón. Y que los investigadores nun tuvieren familiares en Chechenia. Pidimos-y al Comité d'Investigación de la Fiscalía Xeneral de Rusia que garrare'l casu. Rechazáronlo, pero dempués d'una campaña política nuestra, mientres la que mandemos denuncies a les embaxaes y consulaos de la Xunión Europea, y de presionar al Comisariu Europeu de Drechos Humanos, Thomas Hammaberg, el casu pasó a manes d'otra axencia, el Departamentu d'Investigación de Casos Importantes, perteneciente al Departamentu Superior d'Investigación del Distritu del Cáucaso Norte y la Rexón Sur. A mediaos de xineru de 2011, Igor Sobol (un buen home y buen investigador, cabezaleru del grupu qu'investigaba la muerte de Natasha Estemirova) garró'l casu d'Umarpashaev. ¡Por fin una victoria!

El primer pasu de Sobol foi interrogar a Tsakaev, cosa que nun ficiera naide enantes. Yéra obvio que yéra una formalidá y que, probablemente, Tsakaev fuere a dicir que nun conocía a naide apellidáu Umarpashaev. Sobol díxo-y que diba dir al día siguiente con Islam a la bases de les OMON pa verificar el testimoniu de la víctima nel llugar del delitu. Tsakaev entamó a gritar que naide nun diba dir al so territoriu ensin el so permisu y que diba ordena-yos a los sos homes abrir fueu.

Al día siguiente foi a la base con Islam. Naide nun disparó, gracies al cielu, e Islam pudo confirmar el so testimoniu.

Sobol tá faciendo tolo que puede. Si nun llega un informe solicitáu por él, vuelve a pidilu, cada vegada a un instancia superior na cadena de mandu.

Díxonos preocupáu que'l Ministeriu chechenu d'Interior nun diba prolongar la protección oficial, y l'últimu mes tuvimos viviendo nuna república vecina, pero-y pidimos al Ministeriu que nos desplicare esti cambiu. Creo que l'actividá de Sobol inquietó a muncha xente y que dalguien nes altes esferes taba decidíu a silenciar a Islam Umarpashaev. Asina qu'agora la familia tá viviendo nuna casa de monte en dalgún lláu del centru de Rusia, coles comunicaciones cortaes y con una fuerte vixilancia.

El Kremlin y la Chechenia de Kadyrov

Tengo bastante claro que les Fuercies de Trabayu Temporal del Ministeriu rusu del Interior (VOGOiP) y el FSB tienen estrictes instrucciones de nun tocar a Kadyrov nin a la so xente pa nun desestabilizar la situación en Chechenia. Asina que, por orden personal de Putin, Kadyrov tién carta blanca.

El presidente chechenu Ramzan Kadyrov tién carta blanca del Kremlin pa llevar la rexón como'l so feudu personal y busca un camín llealista y anti-independentista. Na práctica esto sinifica que les autoridaes pueden matar a quien quieran y llueu presentalu como un guerrilleru independentista.

El Kremlin considera a Kadyrov la única alternativa a la guerra. Ye un monstruu y un ogru, pero tá manteniendo a los “terroristes” y a los “wahabites” a raya, y si lu llevaren a xuiciu volvería la violencia. Ye un fechu que les amenaces de Kadyrov y la so xente, y la imposibilidá de consiguir xusticia más cerca d'Estrasburgu llevaron a un montón de xente a escapar a les montañes. Tán fartos de tener mieu.

Si la xente que ye responsable de la política de violencia nel Cáucasu Norte cree realmente que cola ayuda de Kadyrov pueden normalizar la situación, tán nun grave error. La situación tá lloñe de ser normal y tá empeorando, non nuna proporción llineal sinon esponencial. Tolos “coroneles chechenos” del círculu cercanu a Kadyrov tienen carta blanca pa facer lo que quieran y tienen un poder absolutu. Los sos guerreros profesionales se consideren a ellos mesmos penriba la llei rusa y gocen d'impunidá absoluta. Controlen partes de la seguridá nes repúbliques vecines y a lo llargo l'Autopista del Don, que llega hasta Moscú. Tán ocupaos mercando tierres y propiedaes inmobiliaries nes ciudaes de Stavropol y Krasnodar, nal sur de Rusia, y afitando los sos propios sistemes neses ciudaes. Tienen accesu a enormes cantidaes de dineru -y non sólo del presupuestu del Estáu, que yá ye considerable (diez veces pér capita más que los presupuestos rexonales del restu de Rusia). Y son casi independientes de Rusia, de la so llei, de los sos organismos llegales, del so sistema xudicial y del so Comité d'Investigación.

En comparación col dinastía actual, el gobiernu independentista de Djokhar Dudayev de los primeros años 90 yéra una banda d'ilusos soñadores.