Index | Miscelánea
Actualidad
MISCELÁNEA

Sahara

 

 


Confesiones d'un ex soldáu rusu

Aslambek Apaev. Cabezaleru de la ONG “Comité pa la proteición de les personaes desplazaes”. Miembru del Grupu Moscú-Helsinki

Durante la primer y la segunda guerres nel territoriu de Chechenia fuí testigu de dalgunes muertes. Ví muncha xente muerta, munchos feríos y y neños y adultos mutilaos. Namás ví dolor, sangre y llárimes. Y agora, escucho hestories sobre les atrocidaes cometíes poles tropes rusescontra los civiles. Y la mayoría d'estos crímenes cometiéronlos los llamaos “contratistes” (kontratniki), soldaos que faen el so llabor contrataos.

Astur Chechen, viernes, 17 de diciembre, 2010

Durante la primer y la segunda guerres nel territoriu de Chechenia fuí testigu de dalgunes muertes. Ví muncha xente muerta, munchos feríos y y neños y adultos mutilaos. Namás ví dolor, sangre y llárimes.

Y agora, tamién nestos momentos, escucho hestories sobre les atrocidaes cometíes poles tropes ruses contra los civiles. Y la mayoría d'estos crímenes cometiéronlos los llamaos “contratistes” (kontratniki), soldaos que faen el so llabor contrataos. Nun son mozos de 18 o 20 años, sinon homes bastante adultos. Los chechenos llámenlos, davezu, mercenarios. Y na mio opinión, esti términu defínelos meyor. La única razón pola qu'esta xente va a la guerra ye pa matar persones a cambiu de perres. Quieren construyir la so felicidá sobre la sangre y la miseria d'otres persones nes montañes. Sigún tengo entendío, incluso los soldaos que tán faciendo'l serviciu militar obligatoriu odien a estos contratistes.

El branu pasáu, durante una de les conferencies nes que participé en Moscú, víme con un antiguu soldáu rusu que sirvió en Chechenia ente el 99 y el 2000. Tábemos nel mesmu compartimentu del tren, vímonos, falemos y xintemos xuntos. Él taba un poco borrachu y durante la nuesa conversación contóme una hestoria que me dexó plasmáu. Nun-y pidí que falare d'ello, pero'l tema xurdió.

Sigún esti ex soldáu rusu, vamos llamalu Vladimir, nel inviernu de 2000, a finales de Xineru, la unidá na que taba sirviendo llevó a cau una “operación de llimpieza (zachitstky)” na zona de “Berezka”, que tá asitiada onde l'autopista Staropromyslovsky, en Grozni. Había una montonera de mercenarios ente los soldaos. Taben siempres borrachos. N'aquel momentu, había perpocos civiles porque los duros combates pol control de la ciudá tovía siguíen. Les cases y les pertenencies taben abandonaes, la xente dexólo too atrás na so fuxida.

Nuna de les cases que nun taba del too abandonada, los soldaos toparon a una familia de siete persones. Un home y una muyer adultos, un mozu y dos neños fueron asesinaos de la mesma polos soldaos. Namás dexaron con vida a a una neña de 13 o 14 años y a la fía del propietariu de la casa. Saquearon esa vivienda y otres, depués colaron y prendiéron-yos fuéu a toles viviendes. Los soldaos prindaron a la neña, metiérnola nun TBP (Tresporte Blindáu de Personal) y lleváronla al cuartel del so destacamentu na localidá de Zagryazhskaya, nel distritu de Staropromyslovsky.

Vladimir cuntóme que, durante casi una selmana, oficiales de la unidá violaron a la moza. Facíenlo toles nueches y a vegaes durante'l día. La moza sufría humildaciones abondes, y depués los mandos dexáronla en manes de los contratistes. Golpeábenla y violábenla durante delles hores ca día. Y nun sólo lo facía una persona, sinon grupos de delles persones. La moza a vegaes perdía'l conocimientu, y los soldaos echáben-y agua frío pa qu'espabilare. Depués de dellos díes de continues intimidacines, taba medio muerta. La moza podía morrer en cualesquier momentu, y decidieron usala pa un negociu d'última hora sigún aseguró ún d'estos contratistes. Sigún cuntó Vladimir, ella taba medio muerta, desnuda y escolingando d'una viga peles manes, y los pies malpenes tocaben el suelu.

Los soldaos manteníen allí deteníu a un mozu tamién. Durante díes, torturaron y golpearon a esti mozu y desixíen-y que-yos cuntare ónde taben ocultes les armes y cuálu yéra'l paraderu de los guerrilleros. Pero'l mozu manteníase tercamente calláu, pesie a la xabaz tortura. Los contratistes quemaron-y el cuerpu con un fierru ardiendo, apuñaláronlu y ficiéron-y cortes nel cuerpu, golpeáronlu con estaques y coles botes militares, pero'l mozu insistía en que nun tenía nin sabía nada.

Vladimir sabía que nin la mocina nin el mozu deteníu teníen posibilidá denguna de salir vivos d'aquel cuartel.

El contratista ordenó-y a Vladimir que llevare al deteníu a l'habitación onde taba la moza. Cuando taba llevando al mozu, susurró-y que nun diben lliberalu. El mozu, que malpenes se mantenía de pie, foi lleváu a l'habitación y colocáu enfrente la moza crucificada. Los contratistes desixiéron-y otra vegada que-yos dixere onde tenía escondíes les armes o, de lo contrario, diben llevase a la moza. El mozu siguió calláu. Entós ún de los contratistes averóse a la moza y fizó-y un corte nun pechu con un cuchiellu. La mocina glayó xabazmente apavoriada y el mozu, que taba medio muertu, intentó quitar la mirada d'esi espectáculu horrible, pero entamaron a pega-y y a ordená-y que mirare pa la moza, porque lo que-y taba pasando a ella yerá por culpa del so silenciu. Entos el mesmu contratista fizó-y un corte nel otru pechu a la moza y ella perdió'l conocimientu. El mozu pidió-yos a los soldaos que pararen aquella barbaridá y dixo qu'él viera accidentalmente a ún vecín esconder dalgo nuna cañería de desagüe y citó la cai d'esi llugar. Esta confesión-yos paeció la risión a los soldaos. Dixeron “bien, agora, nun vos necesitamos nin a tí nin a ella” y procedieron a rematar l'asesinatu de la moza, que taba casi muerta yá. Primero, separaron les sos piernes con un hachu, cortáron-y les manes, y cuando'l cuerpu ensangrentáu cayó en suelu, cortáron-y la cabeza. Punxeron les pieces del cuerpu nuna caxa xigante, y dempués llevaron esa caxa a la cai, y tamién al mozu deteníu. Lleváronlu a un solar abandonáu, amarráron-y una caxa con TNT, metieron dientro los restos de la moza y voláronlos xuntos pelos aires. Cuando taben preparando esti actu, el mozu taba tovía vivu.

El propiu Vladimir lloró cuando me cuntaba esto. Dixo que “los contratistes constantemente humildaben y mataben xente ensin piedá, ensin distinciones de xéneru, edá y nacionalidá. Incluso los soldaos yéren a vegaes l'oxetivu de les burlles d'estos contratistes”. Vladimir apeóse del tren en Voronezh. Nun lu volví a ver más. Dexóme'l so númberu de teléfonu y garró'l míu, pero nunca nun mos llamemos. ¿Por qué? Porque esa hestoria foi probablemente la peor qu'escuché en toos esos años. Anque, repito, escuché y ví una montonera coses.

Desafortunadamente nun sé los nomes d''aquella moza y d'aquel mozu. Supongo que los sos familiares siguen buscándolos cola esperanza de que dalgún día vuelvan a casa. Toi seguru de que nun imaxinen que les sos muertes fueron tan doloroses y terribles. Pero nun tienen tumbes. Cenciellamente fueron reducíos a cachinos dempués del españíu. Y ésto ficiéronlo soldaos rusos que fueron a Chechenia a “lliberanos” de los “terroristes internacionales”.

Un día lleí en dalguna parte esta frase: “Quien asesina ha ser asesináu; aquellos que dan orden d'asesinar han ser asesinaos...” Espero fervientemente qu'esos monstruos con uniforme militar qu'acabaron brutalmente con xente desarmao, muyeres, neños y ancianos, enantes o depués reciban un castigu polos sos actos. Y si nun ye nesti mundu, polo menos que respuendan énte dios poles sos aiciones.