Index | Palestina 2008
Actualidad
PALESTINA

Palestina

 

 

 

 

 

 

 

COMUNICÁU DEL COMITÉ DE SOLIDARIDÁ COLA CAUSA ÁRABE

Sofitu total al conteníu de la carta unviada por Rafael Palacios al presidente José Luis Rodríguez Zapatero y la nuesa felicitación al comprobar que dende dalgunes instituciones se recueye y espresa lo que constitui una esixencia d'amplios seutores de la sociedá asturiana

La carta sopelexa de manera clara y respetuosa lo que piensa una gran parte de la ciudadanía asturiana, al menos los miles de persones que cola so presencia en concentraciones y manifestaciones, dende'l pasáu 27 d'avientu, condenaron la masacre perpetrada por Israel na faza de Gaza. Nes mentaes movilizaciones fízose patente d'un mou rotundu la esixencia de sanciones comerciales y, de manera especial, el cese de la compraventa d'armes ente España y Israel.

CSCA, Uviéu 6 de Febrero de 2009

Delantre de les declaraciones de la portavoz del Gobiernu asturianu, Ana Rosa Migoya, descalificando la carta unviada pol direutor de l'Axencia Asturiana de Cooperación pal Desarrollu, Rafael Palacios, al presidente del Gobiernu de España, na que pide'l cese del negociu armamentísticu con Israel y Colombia, dende'l Comité de Solidaridá cola Causa
Árabe (CSCA) queremos manifestar:

1. El nuesu sofitu total al conteníu de la carta unviada por Rafael Palacios al presidente José Luis Rodríguez Zapatero y la nuesa felicitación al comprobar que dende dalgunes instituciones se recueye y espresa lo que constitui una esixencia d'amplios seutores de la sociedá asturiana.

2. La carta sopelexa de manera clara y respetuosa lo que piensa una gran parte de la ciudadanía asturiana, al menos los miles de persones que cola so presencia en concentraciones y manifestaciones, dende'l pasáu 27 d'avientu, condenaron la masacre perpetrada por Israel na faza de Gaza. Nes mentaes movilizaciones fízose patente d'un mou rotundu la esixencia de sanciones comerciales y, de manera especial, el cese de la compraventa d'armes ente España y Israel.

3. Lloñe, poro, de perxudicar los intereses de la ciudadanía asturiana, a la escontra de lo que manifiesta de forma ablucante y atrevida la señora Migoya en calidá de portavoz del Gobiernu asturianu –habría d'aclarar qué intereses y de quién se ven afectaos–, el conteníu de la carta del señor Palacios ye una espresión de coherencia ética y política que nun podemos otro qu'aplaudir y pidir que constituya una práutica más usual de los nuesos representantes políticos y institucionales.

4. Les declaraciones de la señora Migoya tán mui acordies cola postura caltenida pol so partíu, el PSOE, demientres la última agresión militar israelí na faza de Gaza. Una postura carauterizada pola pallabrería y la equidistancia, poles beatífiques y abstractes piticiones de paz apoyando les movilizaciones ciudadanes al empar que dende'l Gobiernu compartía les mesmes posiciones que'l restu de potencies occidentales y de los rexímenes árabes reaccionarios. Carauterizada, a la fin, pola esixencia de desarme de la resistencia palestina y el simultaniu negociu d'armes col Estáu agresor d'Israel, como quedó demostrao a les clares.

Dende esti Comité vamos siguir esixendo per toles víes el cumplimientu de la llegalidá internacional n'Oriente Prósimu, el fin de la ocupación en Palestina y Iraq y una paz xusta na rexón, pero tamién el compromisu, la coherencia y la responsabilidá del Gobiernu español y los de la Unión Europea con esos oxetivos.

Uviéu, 7 de febreru de 2009