Era linha de masses entara Reconstitucion deth PC

Eth punt de partida ei era avantgarda, tau com aciu l'auem definida ena prumèra fasa dera Revolucion o etapa de Reconstitucion. Era sua prumèra cometuda - donques que se tracte deth que la definís en prumèra instància coma avantgarda - ei eth de hèr-se valabla e portaira dera ideologia.

En aguest sens, com a ja demorat senhalat, cau aganchar era ideologia en toti es sòns desvolopaments; mès, ath delà, cau enténer que non se tracte d'ua concepcion deth mon mès, senon dera cosmovision mès auançada, precisament, pr'amor que non tracte "d'interpretar eth mon" d'ua manèra naua, senon de "transformar-lo". Era avantgarda ideologica, alara, li cau anar en tot formar-se enes principis dera ideologia - en cas contrari non se diferenciarie des masses es mès auançades dera classa e era madeisha se transformarie en massa - , mès tanben li cau anar en tot hóner aguesti principis damb er objècte de transformacion revolucionària, li cau anar en tot arrevirar es principis ideologics en Linha politica revolucionària, li cau saber aplicar es premisses e es objectius dera teoria revolucionària ara realitat practica dera Revolucion, li cau saber dar responsa as prètzhèts particulars e practiques qu'aguesta impause, li cau saber trapar era estrategia e era tactica adequada entà arténher aqueri objectius, li cau saber calibrar er estat des sues premisses de besonh, eca.

Era Linha politica ei eth "prumèr pas pera practica" dera ideologia e, en aguest sens, eth prumèr gran element dera linha de masses dera politica dera avantgarda, pr'amor que transforme en un discors politic e revolucionari es condicions reaus en que se trapen es masses dera classa en generau. S'eth membre dera avantgarda, en formar-se e educar-se ena ideologia, se forme coma propagandista e, com didie Lenin, "tribú populara" entà difoner-la, en tot consistir en açò era base o eth embrion de tota futura politica entàs masses (linha de masses), era Linha ei eth prumèr pas cap tà dauant dera linha de masses dera politica dera avantgarda, pr'amor qu'ei eth mielhor mejan qu'aguesta se pòt apropar as masses auançades, que pòden veir que, efectivament, eth Comunisme somet era arraïtz prigonda des problèmes que li preocupen e da ua responsa ara sua solucion.

Mès açò ei encara insufisent. Era experiéncia deth Movement Comunista Internacionau ensenhe que non n'i a pro damb proclamar sonque ua politica justa, senon qu'ei de besonh que sigue comprenuda pes masses. Entad açò, ei de besonh qu'era Linha politica s'arrevire en Programa, ei a díder, que contengue non solets era explicacion e era solucion generau des problèmes actuaus des masses, senon tanben era forma e eth mode de resolver-les mejançant era Dictadura deth Proletariat e deth Socialisme.

Açò pressupausa qu'era avantgarda s'a consumit enquia tau punt damb es masses dera classa qu'a artenhut arrevirar es sues reivindicacions immediates en reivindicacions revolucionàries. En aguest moment, era linha de masses revolucionàries artenh eth sòn desvolopament maximal ena Reconstitucion; en aguest moment culmine era Reconstitucion madeisha.

Era forma qu'adòpten era Linha e eth Programa ei era de Tèsis politiques; mès açò ei sonque era forma. Eth sòn contengut ei era linha de masses qu'aplique e desvolòpe era avantgarda coma element fondamentau d'union damb es masses. De hèt, era Linha e eth Programa exprimissen dus estadis disparièrs en desvolopament dera linha politica de masses. Era Linha indique eth prumèr apropament dera ideologia ar estat des masses dera classa, era sua difusion en forma de propaganda, eth sòn prumèr contacte damb es masses auançades. Eth Programa, per contra, signifique era assimilacion dera Linha per part de cèrti sectors d'aguestes masses auançades, agitacion, per medi d'eri, entre es granes masses dirigida pera avantgarda; ei a díder, eth trabalh quotidian, braç a braç, dera avantgarda entre es masses entà atrèir definitiuament ath sòn sector auançat e arrevirar era ideologia e era politica revolucionàries as besonhs des masses.

Era fusion dera avantgarda entenuda e organizada coma avantgarda ideologica damb es masses auançades dera classa s'arrevire en PC, o sigue, en movement revolucionari organizat, en capacitat, per part dera avantgarda, d'influïr o de hèr-se sénter entre es granes masses dera classa. En aguest punt, s'òbre era possibilitat que totes o era majoria d'aguestes masses s'organizen ara manèra revolucionària e se meten darrèr deth sòn Partit. A arribat eth moment de daurir ua naua etapa ena Revolucion.

Eth Programa signifique era culminacion dera Reconstitucion pr'amor que, damb eth, era ideologia se restaque damb es masses dera forma era mès estreta e concrèta possibla, e pr'amor que, entà arribar a eth, era avantgarda li a calgut trapar un lenguatge damb qué exprimir es reivindicacions immediates des masses, li a calgut crear solids ligams damb eres e organizar aguesti ligams, a agut, en definitiva, de crear PC.

Eth PC, atau reconstituït, existís coma unitat entre era avantgarda e es masses dera classa per medi deth sòn Programa, en plan politic, e coma multitud d'organismes que servissen coma correja de transmission dera avantgarda cap as masses, en plan organizatiu. Eth PC, atau reconstituït, existís coma organizacion capabla de dirigir-se as masses e de dirigir-les e, donques, com era sua avantgarda efectiva. Alara, eth PC se pòt encomanar eth prètzhèt de portar a tota era classa enquiath Comunisme, e pòt afrontar, damb gatges de capitada, es dificultats e es obstacles que destorbaran aguest camin tortuós mès de besonh e indefugible.