Gaztekaria Alternatiboa

aniztasuna. Auzokide franko ez ezik, erakunde, sindikatu eta alderdietako ordezkaritza zabalak egin dute bat

Milaka lagun bildu dira Hontza zentroaren eta «gizarte solidarioago» baten alde

Hiritar guzti-guztien oinarrizko giza eskubideak zaindu eta betetzeko eskatu dute 169 gizarte erakundek Bilbon

Iñaki Uriarte/BILBO

Bost mila lagun inguruk erantzun zioten atzo Bilbo Zaharra, San Frantzisko eta Zabalako Berregokipenerako Taldeen Koordinakundeak deitu manifestazioari. Auzokide franko ez ezik, erakunde, sindikatu eta alderdi politikoetako ordezkaritza zabala bildu zen Bilbon; PPkoak izan ezik, beste alderdi guztietakoak han ziren.

Ibilaldi isila bostak eta hamarrean abiatu zen, Jesusen Bihotzaren enparantzatik. Antolatzaileek eta gizarte taldeetako hainbat elkartetako ordezkariek eraman zuten lehen pankarta, «gizarte solidariagoaren alde» daudela berresten zuena. Bigarrenean, alderdi politiko eta sindikatuetako ordezkariak zihoazen. Hontza bai hemen eta edonon irakur zitekeen Nekane Altzelai EAko burukideak eta Bilboko Udaleko zinegotziek zeramaten pankartan. Haien atzetik, alderdi, sindikatu eta erakundeetako ordezkaritza zabala zihoan. Iñaki Azkuna alkateak, Javier Madrazo eta Gabriel Inclan EAEko sailburuek, Mertxe Agundez aratekoak eta Ricardo Ansotegi eta Sabin Arana Bizkaiko diputatuek ez zuten hutsik egin. Txema Urkijo EAEko Giza Eskubideetarako zuzendari berriak ere ez.

PSE-EEko Patxi Lopez eta Begoña Gil; IUko Oscar Matute; Batasuneko Jone Goirizelaia, Josu Urrutikoetxea eta Ibon Arbulu; EAko Nekane Altzelai; ELAko Mikel Noval; eta LABeko Txutxi Ariznabarreta talde berean ikus zitezkeen. Bilboko hamar zinegotzi ere egon ziren Hontzaren aldeko pankartaren atzean.

Atzerago, Athleticen bufanda zeramaten futbolzaleek, erlijiosoek, Unibertsitateko irakasleek eta herritar soilek multzo zabala osoatzen zuten. Baltasar Garzon epaileak legez kanpo utzi berri dituen Segi-k eta Askatasunak ere bat egin zuten deialdiarekin.

Gizarte zuzenago baten alde

Manifestazioa Areatzako parkean amaitu zen. Bertan, Onintza Enbeitak egin zuen ongietorria bertso birekin.

Natxo de Felipe kantariak irakurri zuen agiria. Hiri baten neurria «hiritar guzti-guztien oinarrizko giza eskubideak» zaindu eta betetzeak ematen duela ohartarazi zuen. «Behartsu eta ahulenek gure gizalegearen muga eta jomuga» erakusten dizkigutela azaldu zuen gero. Gizarte bazterketaren aurpegi berriei aurre egiteko, De Felipek «erantzun berriak eta eraginkorrak» eskatu zizkien erakunde publikoei eta gizarte erakundeei.

Drogaren menpean edo aterperik gabe bizi direnek aparteko egoera bizi dutelakoan, beharrezkotzat jo zuen zerbitzuak indartzea eta berriak zabaltzea. Azkenik, elkartasunerako deia egin zuen: «Posible da beste mundu hobe eta zuzenago bat. Horixe da gure ustea eta gure itxaropena».

sabin arana

Ekonomia Sustapenerako diputatua-EA

«Euskal Herrian sare bat behar da»

«Hontza bezalako zentroak beharrezkoak dira gure gizartean. Ez da zentro baten arazoa, Euskal Herrian dauden arazo guztiak artatzeko sare bat behar da. Kasu honetan espero dugu hemendik eta urte bukaerara inolako arazorik gabe joatea, eta beste leku baten zabaltzen denean, ahaleginduko gara arazo gutxiagorekin aurrera ateratzen».

patxi lopez

Bizkaiko PSE-EEren idazkaria

«Behar beste ekimen jarri behar dira abian»

«Hontza ekimen publikotik eta politikotik bideratu behar den lanaren adibide ona da. Hau da, lan eginez okerren daudenak bizitza kalitate hobea izan dezaten. Bilboko jendeak solidario izan behar du gaizki pasatzen ari direnekin. Behar beste ekimen jarri behar dira abian inor ez dadin baztertuta geratu bere bizitzan».

jone goirizelaia

Batasuneko parlamentaria

«Plangintza oso bat egin behar da auzokideekin»

«Bat egiten dugu hemen eskatzen ari denarekin. Ez dugu honetan bakarrik geratu behar, neurri berezi batzuk beharrezkoak dira; ez bakarrik Hontza zentroa, eta ez bakarrik zentro bat. Beharrezkoa da, halaber, horrelako gauzak kontuan hartuko dituen plangintza bat. Garrantzitsuena da auzokideekin egotea eta guztien artean plana egitea da».

javier madrazo

Gizarte Gaietarako sailburua-IU

«Jaurlaritza prest da zentroak bultzatzeko»

«Ezker Batua hiru ziogatik dator manifestazio honetara. Batetik, Hontza zentroko langileei elkartasuna adierazteko. Bestetik, erabiltzaile eta langileak pairatzen ari diren erasoak salatzeko. Eta azkenik, Eusko Jaurlaritza prest dagoelako era horretako zentroak bultzatzeko, Euskadin beharrezko diren leku guztietan».

iñaki azkuna

Bilboko alkatea «Hau ixten denean, beste batzuk zabalduko ditugu» «Elkartasunean sinesten dudalako nago ni hemen. Hontza askok egon beharko du etorkizunean, ezberdintasunak daudelako, bazterketa dagoelako eta badelako gure laguntza behar duen jendea. Erakunde publikoei laguntza hori eman behar diegu. Abenduaren 31n leku batean itxiko dugu eta, tamalez, beste leku batzuetan irekiko».