Carmen despedida de CC.OO.  

 

| Inicio | Principal | Apoyos | Documentos | Prensa |

 


Les Noticies 9 de febreru 2003

ACTUALIDÁ

Perda de derechos llaborales.

Otra trabajadora despidida por CC.OO. denuncia la precariedá nel sindicatu

Carmen Pérez, que cesó por "fin d'obra", modalidá de contratu que tuvo a lo llargo d'ocho años, afirma que'l suyu "nun ye una casu aisláu"

Uviéu, Beatriz R. Viado

La precariedá que Comisiones Obreres (CC.OO.) denuncia como una de les principales causes de la siniestrabilidá llaboral tamién ta presente en cuantes s'atraviesen les puertes del sindicatu. Asina lo denuncia la trabayadora despidida recientemente en CC.OO., Carmen Pérez González, a la que depués d'ocho años y mediu ininterrumpíos nel sindicatu se-y comunicó que se diba prescindir de los sos servicios alegando la finalización de contratu d'obra. La disconformidá de Carmen Pérez con esta decisión dio llugar a un actu de conciliación nel que Comisiones Obreres reconoció la improcedencia del despidu y ufiertó-y una indemnización. La ex-trabayadora del sindicatu nun aceptó la propueta y el casu va llevase a los tribunales.

Esta decisión afítase nel convencimiento de la ex-empleada de que ye necesario que CCOO reconoza la realidá a la que ta sometida la xente que trabaya nel sindicatu y se termine cola precariedá dientro de la mesma entidá: "Otros compañeros y compañeres de CCOO y Forem lleven años trabayando con sucesivos contratos por obra o serviciu".

Esta práctica, tal y como s'espunxo nel actu de conciliación, ye un fraude de llei, yá que según l'Estatutu de los Trabayadores los contratos pa la realización d'una obra o serviciu "deben tener autonomía o sustantividá dientro de la empresa".

Por embargu, Carmen Pérez llevaba realizando les sos funciones en materia de Salú Llaboral dende 1996, ensin qu'ello obedeciese a una actividá autónoma y diferenciada dientro de la empresa, sinon qu'entraba dientro de les xeres normales, cotidianes y permanentes de Comisiones Obreres.

Amás, actualmente la realización del "serviciu" pal que fuere contratada la trabayadora sigui siendo desarrolláu na empresa, de manera que "nun ye cierto que finalizare'l contratu", remarcó la demandante nel testu presentáu ala unidá de mediación.

Otramiente, el procesu siguíu nel despidu de la ex -trabayadora de Salú Llaboral ye chocante enforma teniendo en cuenta les característiques de la entidá. Nuna carta a la Comisión Ejecutiva de CCOO d'Asturies, Carmen Pérez rellata les condiciones nes que se-y anunció'l despidu: "El 13 d'avientu de 2002 infórmaseme de que'l día 31 finaliza'l mio contratu. Valórase positivamente'l mio trabayu y asegúraseme verbalmente que nun plazu, tovía desconocíu, se me va ufiertar un nuevu contratu por obra o serviciu pa realizar les mesmes funciones".

Arriendes d'esti anunciu de fin y comienzu d'obra al mesmu tiempo, el sindicato indicó-y a la ex -asesora de Salú Llaboral que s'esperaba que siguiere realizando llabores "de forma militante" en CCOO mentes se decidía'l so futuru na empresa. Énte toes estes premises Carmen Pérez espresó-y a la empresa'l so plasmu y desalcuerdu pol cese".

A les razones daes pola trabayadora despidida de que nun se produciere ninguna modificación na actividá del so departamento y de qu'entendía qu'aceptar eses condiciones suponía una perda nos sos derechos llaborales y una mayor precariedá na so contratación, dende CCOO contestóse-y que "güei tolos trabajadores somos precarios", cuenta.

Esta respuesta contrasta colos comunicaos enviaos por Comisiones Obreres con motivu de la convocatoria de manifestación contra la siniestralidá'l pasáu xueves 6 de febreru. Nos mesmos, amás de denunciar los cerca de 100.000 accidentes llaborales registraos ente 1999 y 2002 y les 201 muertes nel mesmu periodu, afirmase que "estos accidentes tan en rellación directa coles condiciones cada vez más precaries del mercáu de trabayu y col incumplimiento xeneralizáu de la normativa pela parte de la patronal". Pa finalizar, destaquen la "clamorosa permisividá de l'Alministración, que nun fai nada nin por asegurar el cumplimiento de la llei nin por persiguir el delito contra la seguridá y la salú de los trabayadores".

Estes declaraciones entren en conflicto cola reacción del sindicatu énte la sentencia judicial de nulidá pol despidu d'otra trabayadora l'añu pasáu, Berta Montoya, qu'a la fin tuvo que ser readmitida en CCOO. Na fecha na que se fixo pública la nulidá del cese la entidá interpretó esta decisión como un "ataque al sindicalismo".

Actualmente, Comisiones Obreres tien pendiente esti nuevu casu, nel que Carmen Pérez cuenta col sofitu, ente otra xente, de más d'ochenta persones afiliaes a CCOO, que coinciden na necesidá de que se faiga público y se termine cola precariedá nel trabayu, contra la que'l sindicatu diz lluchar.


Contacta con Carmen en carmela@nodo50.org

 

 

 

| Inicio | Principal | Apoyos | Documentos | Prensa |