Educar na diversidá afeutivu-sexual:
un retu de futuru

El 17 mayu cellébrase'l Día Internacional escontra la Homofobia y la Tresfobia, una iniciativa que cunta col sofitu de l'Asociación Internacional de Llesbianes y Gais (ILGA) y col de numberosos coleutivos y entidaes presentes en más de 40 países (ente otros la Federación Estatal de Llesbianes, Gais, Tresexuales y Bisexuales -FELGTB-, qu'incorporó a esti día tamién la llucha escontra la bifobia, entendía como refuga a les persones bisexuales).

Con esta dómina alcuérdase que foi el 17 mayu de 1990 cuandu l'Asamblea Xeneral de la Organización Mundial de la Salú (OMS) suprimió definitivamente la homosexualidá de la llista de les enfermedaes mentales, poniendo fin asina a más d'un sieglu d'homofobia médica y de discriminación pretendidamente científica escontra'l coleutivu de llesbianes, gais y bisexuales. Nun fueron razones médiques nin científiques les que llevaren a la consideración de la homosexualidá como una enfermedá. Foi solu la simple homofobia, entendía como un conxuntu de prexuicios y actitúes irracionales de tipu relixosu preferentemente, lo que permitió que dalgunos seutores sociales xustificasen -y sigan xustificando índa en munchos llugares- la discriminación y la intolerancia faza les persones que nun seyan heterosexuales. En cuantu a los homes y muyeres tresexuales, fueron y son vítimes d'actitúes d'asemeyada discriminación ya intolerancia en cuya bas ta la tresfobia, la non aceptación de que en dalgunes persones la so identidá de xéneru nun ye coincidente col so sexu biolóxicu.

Homofobia y tresfobia son dos llacres sociales y dos actitúes que opónense a la diversidá afectivosexual y el llabor de la so erradicación debemos inscribila nel contestu más global de defensa de los Drechos Humanos a nivel planetariu y na llucha pola igualdá. Cellebrar el Día Mundial escontra la Homofobia, la Tresfobia y la Bifobia d'esti añu 2007 nun pue amatagar que nos caberos años hebio avances perimportantes pa llesbianes, gais tresexuales y bisexuales (coleutivu LGTB) nel panorama internacional. Dos tuvieren una especial relevancia y produxéronse nel nuesu país: d'una parte l'aprebación de la llei que permite'l matrimoniu a cualisquier pareya, con independencia del sexu de los sos miembros, un acontecimientu de primer orde nel camín faza la plena igualdá xurídica de tóos los ciudadanos; d'otra, l'aprebación de la nomada Llei d'Identidá de Xéneru, que supón pa les persones tresexuales el reconocer el so drechu a vivir y rializase comu son y elles mesmes siéntense. Y la mesma tendencia positiva constátase n'otros países nos qu'abriose'l debate pa la regulación de les pareyes de gais y llesbianes, con diferentes iniciatives (d'ámbetu llocal, rexonal o estatal). Pero desgraciadamente cada una d'estes iniciatives, dende les más tímides y simbóliques, comu'l proyeutu de xunión civil italianu, fasta les más avanzaes, comu les lleis españoles, enfrentáronse siempres cola oposición frontal y sistemática d'unos seutores políticos, sociales y relixosos que nun acepten nengún tipu de dignidá nin de drechos pa gais, llesbianes, bisexuales y tresexuales.

Y non tóu fueron avances: n'una especie de recuperación de la vieya allianza ente'l tronu y l'altar asistimos, incluso nel mesmu senu de la Xunión Europea, a l'apaición de plantegamientos políticos (el presidente de Polonia ye un bon exemplu d'esta posición) que, cola relixón comu xustificación, propugnen abiertamente la torna a la penalización llegal faza llesbianes y gais. Amás, nun podemos escaecer que la homosexualidá sigui tando penalizada en munchos países y que la relixón, en forma de sharia cuasi siempres, ye la bas que xustifica'l que nún garrapiellu de países isllamistes a llesbianes y a gais se yos castigue cola pena de muerte pol simple fechu de la so orientación sexual.

Avancemos, pero índa queda munchu camín por percorrer y los poderes públicos, si son auténticamente democráticos, tienen de fomentar el respetu faza los Drechos Humanos y faza'l coleutivu GLBT. Non solu elliminando de la llexislación cualaquier forma de discriminación sinon aplicando la llei escontra cualisquier actitú y comportamientu homófobu o tresfóbicu.

Educando na diversidá

La educación ye fundamental pa erradicar la homofobia y la tresfobia y debe poner tóo’l so potencial al serviciu de la formación de ciudadanos y ciudadanes capaces de convivir respetando la diversidá afectivosexual. Los axentes educativos, n’especial les alministraciones educatives, deben implicase a fondu n’esti llabor, rializando estudios sobro la incidencia de la homofobia y la tresfobia na vida de los cientros educativos, y adoptando les necesaries midíes correutores pa garantizar al alumnáu LGBT el drechu a recibir una educación nún ambiente acoyedor y de rispetu, que contemple n’equidá toles orientaciones sexuales, les diferentes identidaes de xéneru, los modelos familiares plurales y la manifestación de cualisquier tipu d’afectividá en públicu.

Les polítiques educatives deberán tener en cuenta l’acosu escolar motiváu pola homofobia y la tresfobia, pues sigún l’estudiu rializáu por COGAM “Homofobia en el sistema educativo”, dos de cada tres mozos o moces gais o llesbianes sufrió la violencia homófoba nos cientros d’estudiu y el 60% d’estos adolescentes siéntese "inseguru" nel so institutu. D’ehí la necesidá de poner en marcha programes pa prevenir esti tipu d’acosu y mecanismos pa erradicalu de los cientros educativos. Nos planes d’estudiu tiénense de reflexar de forma positiva y normalizada la diversidá d’orientaciones ya identidaes sexuales humanes y tien de promovese la formación d’una autoestima positiva non solu al alumnáu o al profesoráu LGBT sinon tamién a les sos families. Esto implica el desterrar del sistema educativu la perceición de la homosexualidá y la tresexualidá comu problemes y la elliminación de los planes d’estudiu de cualaquier conceición relixosa que caltenga plantegamientos discriminatorios o d’odiu faza llesbianes, tresexuales, gais o bisexuales.

Cola cellebración d’esti Día escontra la Homofobia y la Tresfobia, Xente Gai Astur (XEGA) y l’Axencia Asturiana de Cooperación al Desarrollu facemos un llamamientu a tola sociedá -y mui n’especial a les alministraciones educatives- pa que tomen concenxa de la importancia d’una educación nel rispetu a la diversidá afectivosexual y pa qu’implíquense activamente n’una educación llibre d’homofobia y tresfobia o de cualaquier discriminación faza’l coleutivu de llesbianes, gais, tresexuales y bisexuales.

Rafael Palacios García
Direutor de l’Axencia Asturiana de Cooperación al Desarrollu

Valentín Brugos Salas
Coordinador de Xente Gai Astur -XEGA-