Entamu

El 17 de mayu de 1990 l'Asamblea Xeneral de la Organización Mundial de la Salú (OMS) suprimió la homosexualidá de la llista de les enfermedaes mentales. Con esti fechu pretendíase acabar con cuasi qu'un sieglu d'homofobia médica y discriminación sistemática contra llesbianes, gais y bisexuales. Ensin embargo, la realidá internacional pa'l coleutivu GLBT non por eso cambió mucho. Hai que remembrar qu'entá esisten 9 países nel mundu onde se condena cola pena de muerte a les persones homosexuales, bisexuales y transexuales. En más de la mitá de los países la discriminación contra la comuña LGTB rompe tolos alcuerdos internacionales y vulnera dafechu los Drechos Humanos, inclusive los más elementales.

Col reconocimientu d'esti Día Internacional preténdese que'l Altu Comisariáu de Drechos Humanos y la Comisión de Drechos Humanos de les Naciones Xunies condenen igualmente la homofobia y la transfobia nes sos manifestaciones polítiques, sociales y culturales. La decisión de la OMS constitui una data histórica y un símbolu perimportante na llucha pol reconocimientu de la dignidá de llesbianes, gais, bisexuales y transexuales: Por esta razón proponemos esta data del 17 de mayu, como día mundial contra la homofobia y la transfobia.

Hasta'l momentu la única data que dende la comuña LGTB tuvimos reivindicado el nuesu drechu a ser, a amar y ser respetaos en plena igualdá foi'l 28 de xunu, data reconocida y cellebrada nuna minoría de países y que pue llevanos a la confusión. De fecho estos dos acontecimientos deseméyanse xustamente na midía en que son complementarios.

En cuanto a los principios: Les manifestaciones enfótanse na dignidá de les llesbianes, los gais, les muyeres y los homes bisexuales, asina como de les persones transexuales que rechazan la vergoña y l'oprobiu; el día mundial pel so llau asoleya que la verdadera vergoña ye la esistencia de la homofobia y la transfobia na sociedá, y como les llóxiques sociales subyacentes han ser examinaes y combaties nel tarrén.
En cuanto a les práutiques: Al traviés de les manifestaciones del orgullu, salimos a la cai pa facenos oyir pola sociedá civil; al traviés del día Mundial pretendemos entrar na sociedá civil pa llevar l'alderique al senu de les instituciones, les escueles, los pueblos, etc. Trátase polo tanto de dos iniciatives simétriques y complementaries.

Los coleutivos asociaos pa defender esta iniciativa y que representamos a más de 40 países y col apoyu d'organizaciones internacionales como la ILGA sabemos qu'algamar la cellebración d'un Día internacional contra la homofobia y la transfobia permitiranos a grandes rasgos:

Un reconocimientu a nivel Internacional (ONU) de la so esistencia y les sos nefastes consecuencies.
Una ferramienta nueva y ensin desvirtuar pa falar de la homosexualidá, la bisexualidá, la transexualidá y la homofobia.
Un escudu Internacional embaxo'l que difícilmente los gobiernos, dende llueo los que pertenecen a la XE, puedan negase a la cellebración d'un día a la escontra de la discriminación hacia les persones pola so orientación sexual, como yá reconoz el Tratáu de Constitución de la Xunión Europea.
Un día a nivel Internacional col que vamos poder collaborar d'una manera cenciella coles instituciones educatives y sociales pa falar de la homofobia, la transfobia y la realidá LGTB.
Un día qu'al tar lloñe de las cellebraciones llúdiques y de la controversia podremos facer llegar un mensaxe más críticu y educativu a una sociedá de la qu'inda tenemos que desenterrar demasiaos valores negativos hacia la diversidá y qu'encierra mieos énte'l desconocimientu de la realidá homosexual, bisexual y transexual.