Sábado 30 de diciembre de 2023
Tratouse dunha acción simbólica organizada por Galiza por Palestina e BDS Galiza “para que Palestina siga estando presente en todos os ámbitos da sociedade” tamén durante o Nadal.
O Salto Galiza 28 DIC 2023
Este 28 de decembro, a praza do Obradoiro de Compostela enchíase de cadáveres tapados con kufiyas. Tratábase dunha acción organizada por BDS Galiza e Galiza por Palestina para denunciar o esquecemento durante o Nadal do xenocidio palestino.
As organizadoras da acción explican que “no día dos inocentes, pretendemos denunciar a matanza de vítimas civís inocentes ante a pasividade dos gobernos”. Sinalan tamén as cifras de crianzas asasinadas e lembran que “os corpos de milleiros de gazatís enterrados baixo os entullos non entran na cifra oficial”.
Ademais, Galiza por Palestina e BDS Galiza anuncian accións nos vindeiros días: “Nestas datas de Nadal, Palestina ten que estar nas rúas, na nosa casa, nos agasallos. Non só continuamos a campaña oficial de boicote a empresas cómplices do Apartheid israelí, senón que queremos lembrar que a cidade de Belén está na Palestina ocupada, e en liña coa sociedade Palestina lembramos tanto ás persoas crentes como as que non o son que non podemos falar do Nadal sen mencionar o que está a pasar en Gaza e en toda a Palestina”.