Sofitu énte les detenciones n’Irlanda

La organización antirepresiva Sofitu espresa un sentimientu de solidaridá pa colos nueve ciudadanos irlandeses deteníos nel territoriu d’esi país ocupáu poles fuerces policiales y militares britániques de resultes de les últimes acciones armaes de la resistencia n’Irlanda; mesmo qu’amosar la so esmolición pol tratu que tean recibiendo a manes de les tropes britániques allugaes nel norte d’Irlanda. Al empar manifestamos un respetu fondu a la llucha desenvuelta pol movimientu republicanu irlandés que resiste inda nos pueblos y ciudades de la isla pol llogru de los oxetivos políticos estratéxicos d’independencia, reunificación y llibertá d’Irlanda.

Sofitu, dende la so perspectiva independentista y d’izquierda, valora como estafa auténtica los conteníos de los llamaos «Acuerdos del vienres santu», dende los principios de respetu y non inxerencia nos asuntos propios d’otros países, pero tamién usando’l derechu d’opinión, facemos por introducir una reflexón en tolos pueblos oprimíos en xeneral y nel d’Asturies en particular, pa calificar otra vuelta de farsa’l procesu de paz protagonizáu por una parte del movimientu republicanu irlandés y el gobiernu británicu en xunto colos sos aliaos unionistes. Un testu, el d’Stormont, enllenu de frases bonales pero ensin nengún tipu de realización práctica, namás qu’un repartu de funciones nel gobiernu norirlandés ente’l Sinn Fein y los unionistes del DUP, reconocimientu del derechu a decidir del norte d’Irlanda pero nun apez tasáu nin en tiempu nin en forma; ello ye, regula’l derechu a decidir d’una manera decorativa y artificial, un puntu ensin concretar y ensin desarrollu de nenguna clase. En resume, pa Sofitu nun reconoz el derechu d’autodetermín, masque sí lu menten en testu. Y ye pola mor d’ello polo que nun soluciona’l conflictu; un acuerdu de paz que nun desate los nuedos gordianos del contenciosu ye una auténtica bomba de reloxería que primero o tarde va provocar un nuevu españíu del conflictu.

Sinn Fein y l’IRA provisional traicionen los oxetivos políticos históricos del movimientu republicanu irlandés, la llucha del so pueblu (de los d’antes y de los d’agora) y al principiu de la isla xunida como ámbitu territorial de decisión, al aceptar colos nuevos acuerdos el derechu a decidir namás que pal norte d’Irlanda, nel marcu del repartu del poder colos unionistes, lo que pal nuestru pensamientu supón una aceptación relativa de la dominación colonial británica, lo que ye inalmisible pal movimientu republicanu irlandés.

Fuera del falsiamientu que’l Sinn Fein y l’IRA provisional faen del derechu d’autodetermín, mención especial merez l’éxitu col que venden esti tipu d’organizaciones la retirada parcial de tropes britániques de la zona en conflictu, nun entrando nel fechu de que’l so despliegue xustificábase na esistencia d’un conflictu armáu qu’una y buenes s’alcanzara una paz cuasique definitiva nel 1998 que permitió esa retirada énte lo innecesario del despliegue, mesmo qu’asocede cola lliberación de presos políticos que nun garró la forma d’amnistía xeneral pa los presos políticos republicanos irlandeses sinón namás pa los militantes d’organizaciones que se dieron ante la farsa.

Puntu cimeru de la cadena de traiciones ye’l llamáu de Gerry Adams y Martin Mc Guinness a la collaboración ciudadana pa facer detenciones, ello ye, en tiempu de paz (pa ellos) esixen represión, tortura y cárcel pa los voluntarios republicanos irlandeses que resisten inda y lluchen pola llibertá del so pueblu. Nel mesmu sen alcuéntrense les calumnies tocántenes tráficu de drogues, corrupción y criminalidá, qu’estos traidores usen contra los voluntarios irlandeses ensin dar nengún tipu de prueba sustituyendo’l trabayu que la policía venía faciendo a la de desprestixar les lluches por una Irlanda xunida y llibre.

¡PUXA IRLANDA LLIBRE Y XUNIDA! ¡PUXA LA LLUCHA!