Comunicau de solidaridá pa col pueblu vascu

La organización antirrepresiva Sofitu manifiesta:

De mano, la so solidaridá pa col pueblu vascu en xeneral y pa cola izquierda abertzale en particular no tocante a la suspensión d’actividaes decretada polos tribunales españoles contra les candidatures D3M y Askatasuna, y la prohibición qu’ello apareyó pa poder participar nes elecciones al parlamentu vascu de les trés provincies del 1 de marzu.

Segundo, denunciar el calter facista del Estáu español, que se permite’l luxu d’illegalizar candidatures y idees namás que por contradicir el so sistema políticu, y al traviés del usu de la famosa llei de partíos, que con calter ad hoc, garra una condición d’arbitrariedá pal réxime español. A éstes, ye importante’l señalar que nes elecciones del 2005, no que fai al mesmu ámbitu territorial y a la elección de la mesma cámara de Gasteiz citada de riba, la xusticia española prohibió participar nes elecciones a la candidatura Aukera Guztiak que, con un programa abertzale y progresista, buscaba perpasar el periodu de les ilegalizaciones. Por embargu, va ser EHAK la que, col lema «Demokrazia eta Bakea», axunte’l votu de la izquierda abertzale y, llibrando los márxenes estrechos que da la «democracia española», alcance más de 150000 votos y nueve escaños. Sofitu quier destacar el contestu que-y permite a EHAK presentase n’igualdá de condiciones col restu de candidatures; trátase d’un periodu que podíemos denomar como l’antesala d’un procesu negociador, poro, una dómina de conversaciones previes a esi procesu. Ye pola mor d’ello polo qu’EHAK ye a presentar les candidatures, da-y validez a los sos votos y facese coles actes de parlamentarios de los sos nueve representantes. L’Estáu español permitió esti procesu al encruz del gobiernu de Zapatero, porque’l contestu políticu permitíalo y d’esa manera nun se mandaron de la llei de partíos, que talo que vemos apliquen de manera discrecional cuando-yos peta. Como podemos ver otra vuelta, l’Estáu español ye un estáu facista que nun s’axusta pa nada a un estáu de derechu.

Tercero, censurar el papel de PNV, EA, Aralar o EB, que dicen tar contra la proscripción de candidatures, pero al empar válense d’ella pa facer por debilitar a la izquierda abertzale y atrayer los sos votos de manera carroñera al empar que participen con normalidá total nunes elecciones antidemocrátiques a les clares. Sofitu pregúntase ¿qué diba pasar si PNV, EA, Aralar o EB fixeran un plante electoral solidariu cola izquierda abertzale? o diendo más al fondu la cuestión ¿l’Estáu español nun s’aseguraría la participación política y electoral con un calter normalizáu de toos estos partíos políticos o coaliciones, según el casu, una y bona entamada la rueda d’illegalizaciones tanto de partíos políticos como de plataformes electorales, alló pel 2002?

Sofitu refuga tamién la persecución que’l gobiernu d’Ibarretxe, al traviés de la so ertzantza, desenvolvió contra les persones que repartíen propaganda o les que participaron na pasada manifestación nacional de Bilbo n’apoyu a D3M, que llevaron a la identificación y detención de decenes d’abertzales, mesmo que la censura de la mayoria de los medios de comunicación fixeron a la campaña de la candidatura illegalizada.

Pa finar, Sofitu quier amosar la so satisfacción polo más de 100000 votos de resistencia alcanzaos, que son «votos d’oru y de futuru» pa una Euskal Herria llibre nuna Europa de pueblos llibres.

¡PUXA’L PAÍS VASCU LLIBRE Y SOCIALISTA! ¡PUXA ASTURIES LLIBRE Y SOCIALISTA!