Definición

- ¿QUE YE "SOFITU"?

"Sofitu" ye un muerganismu antirrepresivu popular, de cálter independentista, de clas y revolucionariu.

La so xera ye dar una rimpuesta afayaíza a tolos ataques represivos del Estáu español pa cola izquierda dixebriega asturiana, y sofitu a toles persones represaliaes d’esti movimientu.

Asina mesmu, denúnciense la represión, les lleis represives y d’esceición y los cuerpos represivos (Policía, Guardia Civil...), intentando creyar un nuéu discursu antirrepresivu como comunistes ya internacionalistes, tamién daremos sofitu (dientru les nueses posibilidaes) a tolos/es lluchadores anticapitalistes tantu n’Asturies como fuera’l país, onde hai llucha hai represión, y onde hai represión hai solidaridá. Anguañu n’Asturies llamamos a lluchar, por eso fae falta organizase escontra la represión.

- FUNCIONES DEL MUERGANISMU ANTIRREPRESIVU:

 Formación de la militancia pa deprender a defendese, individual y coleutivamente, dientru de la llegalidá vixente de les midíes represives. Midíes de seguridá, drechos que se tién en casu de detención, comu afrontar los interrogatorios, son dalgunos de los pegoyos básicos d’esta formación.

 Ellaboración d’un discursu antirrepresivu nel que se denuncie públicamente y socialícese la esistencia de la represión política n’Asturies. A la escontra del discursu oficial españolista qu’asoleya la so llegalidá xudicial y la so política gubernamental comu llucha escontra’l delitu y que tapez socialmente la represión política hai que presentar el nuesu discursu onde denúnciese públicamente la mengua de drechos y llibertaes, el xorrecimientu del control social y la politización, onde desenmazcárese la represión política esistente y a les istituciones ya axentes que la executen (PSOE, Delegación de Gobiernu, Policía, Guardia Civil, xueces, prensa...), denunciando los sos métodos y oxetivos y les motivaciones polítiques que tienen.

 Asistencia xurídica y acompañamientu a los/es militantes que seyan oxetu de la represión como consecuencia de la so militancia política. esta asistencia cuntará col asesoramientu y defensa xurídica d’abogaos/es pa casos de detención, procesu xudicial, encarcelamientu, denuncies, agresión policial... Asinamesmu ye necesario cubrir el acompañamientu de les persones represaliaes, tantu nel tiempu de detención o encarcelamientu, comu nel seguimientu del casu tando la persona en llibertá.

 Recaudación de fondos p’aportar los medios económicos p’afrontar la represión n’abogaos/es, multes, fiances, ect.

 Solidaridá con otros/es represaliaos/es: Na midía de les nueses posibilidaes, "Sofitu" solidarizarase y collaborará, tantu humana comu económicamente, con otros casos de represión política, n’Asturies ya internacionalmente.

- ENTAMU:

N’Asturies, nos caberos tiempos, tamos viendo como xorrez la represión del Estáu Español sobre’l pueblu trabayaor asturianu. L’Estáu ta faciendo de la violencia "llegal" y la represión l’únicu métodu pa enfrentase a los conflictos xeneraos pola so actuación nel nuesu país. Incapaces de controlar la rempuesta social frente al proyeutu d’Estáu y de sociedá que quieren imponenos escueyen la represión, el poder frente la razón, la ñegación de drechos básicos, tantu como pueblu como clas, la falta total de llibertá d’espresión, política, ideolóxica, la violencia policial, les detenciones, multes, xuicios, aplicación de llei antiterrorista... cá vegada xorrez más. La criminalización de toa llucha, idega o proyeutu que vaiga a la escontra les istituciones polítiques y económiques establecíes ye una rialidá ca vegada más grave.

Trabayadores, mocedá, estudiantes, sindicalistes, antifacistes, dixebriegos/gues, minoríes... toos son ca díi un oxetivu más claru de los operativos políticu-policiales del Estáu y la rialidá d’Asturies y los sos conflictos, tantu culturales, económicos, políticos... pa col Estáu Español, faen preveyer que la represión xorrecerá nos tiempos venideros.

- INDEPENDENTISMU Y REPRESIÓN:

El trabayu antirrepresivu nel nuesu país, nos caberos años, vién faciéndose d’estremaes maneres. Per un lláu casos de represión que son retrucaos namás dende la organización (política, sindical, social...), na que milita la persona represaliada. Otres vegáes entámense coleutivos de familiares y amigos/es pa casos tamién perconcretos. Y pa finar, esisten organizaciones antirrepresives (F.U.S.O.A. dende fae años y "Calecer" que ta entamando la so actividá va bien pocu). Estes organizaciones asamblearies trabayen globalmenti la represión dende un marcu ideolóxicu ampliu, siempres dientru de la izquierda alternativa.

A la fin, los casos de represión n’Asturies, nos caberos años, foros llevaos pel camín de la solidaridá antre inxusticies llaborales o sociales, a vegaes de manera aisllada, y otres dende una denuncia más global. Un númberu perimportante d’estos casos de represión, y la mayoralga los más importantes, vienen sofriéndolos militantes independentistes revolucionarios/es o bien nacionalistes d’izquierdes. Con estos precedentes, les fuercies d’ocupación, col gobiernu españolista d’Asturies (PSOE, IX y BA), siguen exerciendo sobre’l nuesu pueblu, y particularmente sobre’l minorizáu conxuntu de la izquierda dixebriega, una represión ensin precedentes, y más entá cuandu hai un intentu d’espardimientu de les idegues socialistes revolucionaries nel pueblu asturianu. Too esto apunta a un agravamientu d’esta rialidá de la represión española que tamos por vivir nel nuesu país.

Estos fechos, xunto cola mengua de drechos y llibertaes que tamos sofriendo, faen necesariu l’autoorganización antirrepresiva del independentismu revolucionariu asturianu. Más que nunca fáese necesariu trabayar dende’l nuesu marcu ideolóxicu.

Camentamos qu’esta ye una necesidá hestórica, y nun sólo nel tema antirrepresivu, en toles estayes de la vida política asturiana (sindicalismu, muyer, ecoloxía...), fae falta entamar a trabayar dende cadarmes con un calter dixebriegu y comunista dafechu.

- LA REPRESIÓN ANGUAÑU:

La rialidá represiva cola que l’Estáu español controla güei’l xorrecimientu del movimientu independentista asturianu y el so procesu de lliberación nacional y social tá condicionáu por fautores interrellacionaos.

Comu preben los informes policiales y los sumarios xudiciales conocíos (Audiencia Nacional incluyía), la represión española pa col movimientu republicanu asturianu afítase nuna xera de siguimientu, compilación d’información sobro’l movimientu, los/es militantes, alderiques internos, medios de comunicación, actividaes, entornu social, ect...

Xunto a esta llabor, atopamos el tracamundiu y la censura informativa aplicada dende les grandes empreses de comunicación, que se convierten en voceros del Estáu represor (Delegación de Gobiernu, policía, Ministeriu del Interior, PSOE,...). Esti preséu nun ye sólo válidu pa la criminalización, l’Estáu emplégalu tamién como mediu de control social, esfarrapando la nuesa conciencia nacional y de clas, la nuesa cultura, la nuesa memoria hestórica, creyando opinión siempres dende los porgüeyos del capitalsimu español.

L’usu conxuntu d’estes midíes represives, del tracamundiu y la criminalización informativa xunto con aiciones puntuales de fuercia, son más qu’abondes pa los sos oxetivos de represión política escontra’l movimientu dixebriegu asturianu qu’atópase socialmente minorizáu y aislláu y malpenes esiste como fautor de desestabilización pal Estáu español.