95etik interes pribatu eta asmo handiak izan dira Oianguren inguruan: Dena Sport enpresak hiru urtez izan zuen kontzesioa (Udalak dirutza handia galdu zuen eta Oiangu erabat utzita egon zen); Oianguko lurretan zazpi txalet txikiz osatutako Hotel proiektua aurkeztu zen; hainbat urtetan aterpetxea eta jatetxea izan ditugu, baina ez da izan benetako ekimenik erabilera publikoko aisialdi gune moduan bultzatzeko; zalditegi bat jartzeko proiektua ere aurkeztu zen...
Urte horietan guztietan Udalak erabateko utzikeria izan du Oiangurekiko. Irudimen eza eta lan egiteko gaitasun eza izan ditu. Eta orain, Oiangu hobeto erabili behar dela aitzakia bezala hartuta, beste enpresa bati eman dio 40 urtetarako kontzesioa.
Hitz
gutxitan esanda, enpresa horrek aurkeztutako egitasmoaren funtsa
da golf zelai bat jartzea, baserria hotel eta jatetxe garesti
bihurtzea, eraikin berri bat eraikitzea taberna funtzioa betetzeko,
igerileku txiki bat eraikitzea, paint-ball jolaserako eremu
bat egokitzea, eta erabilera librerako eta meriendalekurako
espazioa izugarri murriztea.
Baina
proiektu horren legezkotasuna eta interesa bera ere oso zalantzan
jartzeko nahikoa arrazoi eta kontu ilun badaude, Udalak
ezkutatu nahi dituenak, eta guk salatu eta ordiziar eta goierritar
guztiei jakinarazi nahi dizkiegunak.
1.
Nola liteke halako baserri eta lur publiko ederrak, goierritar
guztiok disfrutatzeko izan behar dutenak, interes pribatu baten
esku uztea 40 urtez? Oianguren erabilerak beti izan behar du
publikoa. Baina egitasmo honekin pribatizatu egiten da. Izan
ere, egitasmoaren ardatza golf zelai bat da. Golfak lurren
erdia baino gehiago bereganatuko du, eta erabilera libreko
(ordaindu gabeko) espazioa izugarri murriztuko da. Jakina,
golfaren izaera elitista eta minoritarioa da, eta haren funtzionamenduaren
oinarria kuota oso garestiak ordainduko dituzten bazkideak
izango dira.
2.
Kontzesio berri hau emateko Oiangu-Txiki baserriari
Udalak berak beste 20 urtetarako emandako kontzesioa kendu
behar dio. Baina 200 urtez baserri horretan lan egin eta bizi
den familiaren eskubideak zapaltzen eta legeak eskatzen dituen
baldintzak bete gabe (Osoko Bilkura baino lau egun lehenago
izan zuten asmoaren berri).
3. Kontzesioaren lehiaketa IKENA enpresak irabazi du. Baina ez da IKENA izango kontzesio horretaz arduratuko dena, baizik eta geroago sortuko den IKENGU enpresa. Nor da IKENGU? Lehiaketan parte hartu ez duen eta oraindik existitzen ez den IKENGU enpresak, ordea, obrak IKENAri emango dizkio zuzenean, adjudikatzeko lehikaetarik ere egin gabe.
Egin
beharreko obrek 2 milioi eurotik gorako aurrekontua dute. Horretarako mailegua eskatuko dute. Baina abala ez du ez IKENAk, ez IKENGUk, ez eta enpresa horietako bazkideek ere jarriko. Kontzesioa bera hipotekatuko omen da, eta horrela, azken finean Udalak berak abalatu beharko du egitasmo pribatu hau. Gainera, onar al dezake banketxe batek kontzesio baten hipoteka, inolako ondasun higiezinik (bien inmueble delakoa) hipotekatu gabe? Zer gertatuko litzateke esaterako, asmoak porrot egiten badu eta IKENGU desagertzen bada? IKENGU desagertuta, lehiaketa irabazi duen IKENAk ez lioke aurre egingo egoerari. Udalak egin beharko lioke.
Gainera, lehenengo 10 urteetan IKENGUk ez du baserri eta lurren erabileragatik xentimo bakar bat ere ordainduko, eta hurrengo 30 urteetan soilik 30.000 euro urteko.
4. Horrez gain, golfak azken finean landaretza eta fauna aldetik oso aberatsak diren eremuak basamortu berde bihurtzen ditu. Gainera, izugarrizko ur kopuruak eskatzen ditu, eta ur publikoa erabiliko dute; aterpetxea desagertu egingo da jatetxe eta hotel garesti bihurtuz; erabiltzeko ordaindu beharreko igerileku txiki bat eraikiko da.
5. Udalak egitasmo hau erabat ezkutuan eraman du, eta ikusi arren legezkotasunik ez izateko zantzuak daudela, Osoko Bilkuran onartu egin du. Beraz, ikuspegi juridiko batetik baliteke legezkoa ez izatea eta gainera prebarikazioz jokatu izana.
Salatu nahi dugu ere proiektua ezkutuan eraman dela eta halako eragina izan arren herritarrak ez dituztela ezertxotaz ere informatu. Jada duela bi urte inguru hasi ziren asmo hau lantzen eta udalarekin harremanetan, baina ezkutuan, informazio publikorik eman gabe. Proiektuaren neurrira atera al da lehiaketa? Behin egitasmoa aurkeztuta (bakarra) eta epea amaituta, urtarrilaren erdi aldera aurkeztu zitzaigun talde politikooi. Baina soilik Osoko Bilkura baino 3 egun lehenago jakin genuen zein zen akordio proiektua, eta oraindik ere hainbat xehetasun ez dira jakinarazi.
Gauzak honela, hainbat eskaera egin nahi dizkiegu Ordiziako Udalari, IKENA enpresari eta ordiziar guztiei:
1.
Proiektu honek interes pribatu eta elitistak defendatzen dituenez, eta behar bezalako baldintzak betetzen ez dituenez, udalari bertan behera uztea eskatzen diogu. Udalaren ardura izan behar du gauza guztien gainetik Oianguko baserri eta lurrak interes publikoaren zerbitzura jartzea, bereziki behar larrienak eta ahalmen eskasenak izan ditzaketenentzako egokituz. Oianguk beste ezeren gainetik izan behar du haur eta familientzako atseden eta jolastoki; gazteentzako aisialdi alternatiba (prezio egokitako aterpetxe eta jantoki, ingurumen formazio…);
jubilatu eta adinekoentzako pasealeku…
2.
Horrez gain, Udalari eskatzen diogu kasu honetan ez ezik, gainontzeko
hainbatetan ere (Altamirako kirol instalazioak, Apellanizeko
operazioa, San Juanen garapena eta AHTren eragina, aurrekontuak…) gardentasunez joka dezala, herritarrak informatuz, parte hartzeko bideak eskainiz eta
behar den kasuetan kontsultak ere eginez.
3. IKENAri berari ere eskatzen diogu emandako arrazoi guztiengatik atzera egitea eta proiektua erretiratzea, harik eta Udalak eta herritarrok gaia berraztertzen eta egitasmoa berdefinitzen dugun arte.
4.
Azkenik, ordiziarrei eskatzen diegu Udalaren funtzionamendu
eskasaren aurrean ez dezatela etsipenez edo utzikeriaz jokatu.
Pentsakizun bateko edo besteko izan, ordiziarrok herritar aktibo
izan behar dugu, gure agintariei gardentasuna, lana eta herritarrek
parte hartzeko bidea exigitu behar dizkiegu. Horregatik, ordiziarrei
dei egiten diegu Oiangurenen erabilera publikoaren alde sortuko
den plataforman eta ekimenetan parte har dezaten.
Oiangu publiko eta naturala defendatzeko sortu da “Oiangu bizirik eta publikoa”
Oiangu
publiko eta biziaren aldeko manifestua
-
OIANGU PUBLIKOA ETA
BIZIRIK plataformaren inguruan elkartutakook Oianguko Parkearen
izaera publiko eta naturala aldarrikatzen dugu. Halakoxea
sortu zen, eta halakoxea izaten jarraitu behar duela defendatzen
dugu.
-
Beraz, Plataforma honen helburua sinple,
garbia eta erabat positiboa da: gure Oianguko Parkearen izaera
publiko eta natural hori bermatzea. Ez dugu inolako helburu
politiko alderdikoirik, eta ez dugu inolako erakunde edota
enpresaren aurkako asmorik.
-
Parke publikoa izateak ezinbestean eskatzen
du modu libre eta arduratsuan disfrutatu ahal izateko doakoa
izatea, hesirik gabea, guztiona eta guztiontzat; ez negozio
hutsa, elitista eta pribatua. Parke naturala izateak ezinbestean
eskatzen du natur gune bizi gisa zaintzea.
-
Parkearentzat Udalak ontzat eman nahi
duen egitasmoa haren izaera publiko eta naturalaren aurkakoa
dela uste dugu, horrexegatik egitasmo hori bertan behera
uztea eskatzen dugu.
-
Jabetzen gara utzikeriak parkea behar
bezala zaintzea eta disfrutatzea galarazi duela. Horrexegatik
eskatzen dugu guztion artean aztertzea eta aurrera eramatea
bestelako egitasmo bat, parkea babestuko duena, ingurumen
heziketa emango duena eta ordiziar eta bistari guztioi libreki
disfrutatzeko aukera emango diguna. Herritarron eskubidea
da, gainera, egitasmo horien inguruan informazioa jasotzea,
parte hatzeko bideak izatea eta kontsultatuak izatea.
