RESUME PROGRAMA ELECTORAL

INTRODUCCIÓN

Esti trece de xunu los asturianos y asturianes tamos convocaos a una cita d’especial trescendencia pal futuru inmediatu de la nuestra Comunidá. Esti día tenemos la posibilidá d’elixir a les muyeres y los homes que van a conformar el Parlamentu asturianu, la Xunta Xeneral del Principáu, d’onde surdirá’l Gobiernu d’Asturies.

A diferencia d’otres Comunidaes del Estáu español, n’Asturies estes eleiciones siguen celebrándose a la vez que les eleiciones municipales nel conxuntu los Conceyos asturianos y nes otres partes d’España. Siguimos entós tando obligaos a encariar unes eleiciones onde non sólo se va a falar d’Asturies, sinón que va a pesar una visión estatal nes propuestes y na mesma campaña, cuando amás, esta vez xuntóse a la convocatoria d’eleiciones al Parlamentu européu.

Dende Izquierda Xunida d’Asturies, queremos, en cualisquier casu, presentar una propuesta y xenerar un alderique sobro la nuestra Comunidá, porque de la participación de los asturianos y asturianes, y del sentíu del so votu, dependerá’l cómo y por quién taremos gobernaos, qué polítiques se pondrán en marcha, y, en definitiva aónde s’empobina’l futuru d’Asturies.

El NUESTRU ANALÍS D’ASTURIES

LA FALTA D’UN PROYEUTU POLÍTICU P’ASTURIES

"Los grandes problemes qu’Asturies tien plantegaos anguaño, vienen les más de les veces de la so llamentable inexistencia como Comunidá". Esti diagnósticu que yá se facía enantes de la constitución d’Asturies como Comunidá Autónoma sigue, desgraciadamente, vivu güei depués de los 18 años de l’aprobación del primer Estatutu d’Autonomía d’Asturies.

La constitución de 1978 abrió un procesu de descentralización y desarrollu autonómicu de la forma d’axeitamientu del Estáu qu’a lo llargo de los años ochenta fue llendáu restrictiva y centraliegamente polos gobiernos socialistes. Con mayoríes absolutes n’Asturies y nel Gobiernu Central, retrasaron los trespasos de competencies y torgaron la reforma del nuestru Estatutu col envís de que nun algamáremos l’Autonomía Dafechu. Asina, depués de cumplise los cinco años previstos na Constitución p’asitiar el nuestru finxu políticu y competencial, nun llogremos ponemos nel mesmu nivel que les otres Comunidaes Históriques. 

Yá nos años noventa, la gueta d’alianaces colos partíos nacionalistes conservadores, lleva al PSOE , y agora al PP, a una reinterpretación y rellectura constitucional encontada nos fechos pa "xustificar" la dualización y desigualdá del estáu n’aspeutos políticos, financieros, llingüísticos y de capacidá d’autogobiernu pa les Comunidaes denomaes Históriques.

Na práutica, esti procesu torgó l’Autogobiernu d’Asturies, llendando’l desarrollu de les sos competencies, un desarrollu permanentemente frustráu de les sos instituciones polítiques y una negación constante al reconocimientu d’elementos básicos de la so identidá como la Llingua Asturiana. Asturies vivió estes dos caberes décades un procesu de descentralización, restrinxéndose la so capacidá política a lo alministrativo namás.

La negación del reconocimientu de los mesmos derechos políticos, financieros, llingüísticos, institucionales o competenciales qu’a les otres nacionalidaes históriques, sofítase nuna sólidada posición política de sectores sociales influyentes, grupos empresariales, significativos ámbitos de les empreses de comunicación n’Asturies, asina como nes direiciones polítiques del PSOE y del PP,ensin voluntá y ensin proyeutu políticu axeitáu p’Asturies.

La falta d’un proyeutu políticu p’Asturies queda a la vista, nel contestu actual, na reforma del Estatutu aprobada pol PP y el PSOE en 1998, una reforma que se zarró en falso y naz muerta, pues define un modelu d’Autogobiernu pa la nuestra Comunidá que dexa fuera d’elli a una parte significativa de la sociedá asturiana, a la que siguen negando la so identidá, la so plena capacidá política y los mesmos derechos políticos, llingüísticos, financieros o competenciales qu’a les nacionalidaes históriques del Estáu. Tamién, a lo llargo de los caberos cuatro años, Asturies nun recibió nenguna nueva tresferencia competencial del les yá asumíes estatutariamente y con muncha trescendencia pa la nuestra Comunidá como les relatives a educación o trabayu.

EL DECLIVE ECONÓMICU DE LA NUESTRA COMUNIDÁ.

Magar que se repitienren fonderos procesos d’axuste na economía de la nuestra Comunidá, n’Asturies siguen vixentes les deficiencies estructurales del nuestru aparatu productivu: la so fuerte especialización sectorial en producciones básiques de la primera industrialización, el desequilibriu territorial ente’l centru y les otres fasteres d’Asturies, y la entá deficiente articulación de les nuestres comunicaciones, lo que favorez l’aisllamientu xeográficu y económicu , y d’otra parte, la falta de dinamismu del texíu empresarial asturianu, amás d’unes insuficientes dotaciones d’equipamientos y de tecnolóxía. Dende hai tiempu, calterizóse la cris económica d’Asturies como una cris gobal, al afeutar a los sectores básicos de la nuestra Comunidá: industria, minería, campu y pesca.

La economía asturiana vien afrontando un permanente axuste de capacidá productiva y emplegu con procesos de reconversión y reestructuración na minería del carbón y la siderurxa, asina como n’otra riestra d’estayes como la construcción naval, l’ aluminiu, la metalurxa o los bienes d’equipu. Tamién el campu asturianu ta sometíu a una intensa, anque silente, reconversión. El conxuntu d’indicadores económicos amuesen la permanente decadencia y declive de la nuestra Comunidá: la producción per habitante, la destrucción d’emplegos nos sectores industrial y agrariu, el Productu interior brutu, etc.

Mesmamente, en momentos de crecimientu económicu nel contestu européu y del estáu como‘l d’anguaño, la economía asturiana crez más seliquino y con menos intensidá, lo que confirma una tendencia diverxente que s’espresa con más dramatismu nes cifres de paraos/es en relación a la población activa de la nuestra Comunidá, la más alta del conxuntu d’España. 

Efeutivamente, el principal problema de la sociedá asturiana ye la escasa capacidá pa xenerar actividá económica, asina que la llínea d’esclusión más importante asítiase nel accesu al emplegu y a les oportunidaes d’inserción social qu’ésti supón. Asturies presenta un balance de los más negativos de la Xunión Europea, con un volume de prexubilaos/aes mui importante, la tasa d’actividá de la población n’edá llaboral ta asitiada mui perbaxo de la media española y de la Xunión Europea, y con un desemplegu de la mocedá que supera’l de territorios rurales y emprobecíos del sur européu.

La situación de discriminación de les asturianes amuésase especialmente nel ámbitu económicu llaboral, yá que la tasa d’actividá femenina ta enforma perbaxo de la media europea y del Estáu; a lo qu’hai qu’amesta-y la mayor precarización nel emplegu, y salarios y subsidios más baxos.

Mesmamente, en momentos d’espollete económicu n’Europa y nel Estáu, n’Asturies el númberu de paraos y paraes nun merma, colo que la diverxencia con Europa y l’Estáu ye cada vez más grande. 

Sicasí, la notable cayida de l’actividá económica, l’apavoriante destrucción de puestos de trabayu, la incapacidá de xeneración d’un texíu económicu alternativu que xenerare puestos de trabayu, nun supunxo, de mano, una baxada grande de los niveles de renta, aselando los efeutos de la cris y actuando, a la vez, como amortigañamientu de la sociedá asturiana. Los fluxos de tresferencias públiques en forma de subsidios contribuyeron al caltenimientu de les rentes, lo que nun dexa ver en cierta midida la cris, tapez la so gravedá, aplazando l’esborronamientu económicu, y xenera que la xente nun se dea muncha cuenta de la grave realidá. Como consecuencia d’esta situación los índices demógráficos amuesen un envieyamientu de la población, una tasa de crecimientu vexetativu negativa y más emigración. Ello demuestra la falta d’axuste ente la realidá y la perceición que tien de sí mesma la sociedá asturiana. 

A les polítiques d’axuste aplicaes, cola consiguiente reducción de capacidaes de produccón y emplegos, amiéstase-y el procesu de privatizaciones que, aniciaes colos Gobiernos socialistes, desarrolló‘l Gobiernu del Partíu Popular. Esta política de privatizaciones supón el desentendimientu del sector públicu estatal na reindustrialización d’Asturies y la tresferencia al sector priváu d’importantes recursos.

Les polítiques neolliberales d’axuste y privatización traen con elles una merma grande del sector públicu industrial, lo que supón más torgues pa l’articulación d’una estratexa de desarrollu encontada nel so compromisu cola reactivación y diversificación económica d’Asturies, sobre too, cuando la falta de dinamismu del texíu empresarial asturianu sigue siendo güei una carauterística básica: un empresariáu poco emprendedor y mui xuncíu y dependiente de la subvención y la obra pública. 

L’agricultura y la ganadería asturiana, encontada fundamentalmente na lleche y la carne, tamién pasa per una fondera reconversión que ta llevando al pieslle de miles d’ esplotaciones pequeñes. 

Les llínees fonderes de la política agraria dales anguaño la Política Agraria Comunitaria (PAC). Del principiu d’alcuerdu del Conseyu européu de ministros d’ agricultura de marzu d’esti añu en relación cola Axenda 2000, sólo se pue esperar un agravamientu del procesu d’esaniciu de les pequeñes y medianes esplotaciones agraries y d’esborronamientu del emplegu. Y la fuerte merma nos precios, sólo compensada parcialmente por ayudes a les rentes, actuaría na mesma direición por tener más repercusión nes esplotaciones de mayor dimensión.

UNA IDENTIDÁ EN CRIS, UNA SOCIEDÁ DESVERTEBRADA.

Al fonderu esborronamientu y declive económicu d’Asturies, acompangáu del escasu enraigonamientu y desarrollu de les Instituciones d’Autogobiernu, ye menester amesta-y l’enruinamientu de les referencies d’identidá coleutiva como pueblu, productu de la minimización sistemática de la nuestra llingua y cultura,y consecuencia de la xeneralización d’una cultura y vezos d’uniformización centraos na promoción personal y l’afuxida de los intereses coleutivos.

El desgaste pasu ente pasu de les propuestes alternatives al axuste y les polítiques neolliberales aplicaes n’Asturies, tresformó poco a poco una actitú coleutiva de compromisu y capacidá de rempuesta, en desorientación y resignación. El procesu descritu supón l’enruinamientu d’una clara identidá sociolóxica, política y cultural, que nun tien como única consecuencia l’estrechamientu social de los valores tradicionales de la izquierda asturiana, sinón tamién la frayadura de los ordenadores éticos qu’enllazaben el trabayu, los proyeutos individuales de vida, y la organización del interés y del compromisu en favor de la esfera pública. 

Tolos procesos señalaos inciden nuna sociedá onde l’ausencia de referentes sólidos y de conciencia d’identidá, sorrayen los procesos d’esboroñamientu social que, si bien carauteriza globalmente a les sociedaes modernes, n’Asturies empobínamos a la desarticulación social y tamién a la desvertebración territorial.

Nel contestu socioeconómicu descritu, la falta d’una direición política con un proyeutu de País común, los contrastes internos, los localismos, la incapacidá d’axeitar una política territorial, y, en definitiva la falta de conciencia de País, conduz a una competencia interna polos recursos y non a una xuntura de les estremaes fuercies pa guetar una vía de tresformación y desarollu global y coherente d’Asturies .

L’esborronamientu de la sociedá asturiana tresfórmase asina nun caldu de cultivu inmeyorable pal surdimientu del corporativismu, entendíu ésti como l’agrupación d’intereses particulares al marxe d’un proyeutu común globalizáu r.

LES POLÍTIQUES DESARROLLAES

Les tendencies xenerales que s’apunten nesti curtiu analís de la nuestra Comunidá, nun se corrixeron pola xestión política de la riestra gobiernos asturianos dende la nuestra constitución como Comunidá; más bien fueron el resultáu de les polítiques aplicaes dende los gobiernos d’Asturies y del Estáu, una xestión y unes polítiques incapaces d’enfrentase colos problemes d’Asturies, non sólo dende una perspeutiva global, sinón tamién nos estremaos ámbitos sectoriales, incapaces de construyir una acción de gobiernu qu’implique a la sociedá asturiana, y d’aprovechar los recursos y potencialidaes existentes.

L’escosamientu de les polítiques desarrollaes polos gobiernos socialistes llevaron en 1995 al PP al Gobierno d’Asturies. Del pasu del PP pel Gobiernu y de les polítiques aplicaes podemos sacar dalgunes conclusiones:

*El gobiernu de la derecha n’Asturies foi mui conservador, de talante y actitúes autoritaries. Esta actitú agrávase nel últimu añu y mediu de Gobiernu, onde se pasa de les rocees al insultu y la descalificación de los axentes sociales; de nun facer casu al Parlamentu asturianu a falta-y sistemáticamete al respetu; y del sofitu al tresfuguismu a ser el mesmu Gobiernu’l que lu practica depués de separtase del PP, provocando una cris institucional ensin precedentes n’Asturies.

* Les polítiques de la derecha nun valieron pa solucionar los problemes básicos de la economía asturiana como son la reindustrialización, la creación d’emplegu y un desarrollu integráu y respetuosu col mediu natural; yá qu’ésta sigue separtándose de la economía española y europea en términos de crecimientu, emplegu y rentes. Una política del PP encontada esclusivamente nes privatizaciones, la demonización de lo público, la sacralización del mercáu, la reducción de les alministraciones públiques a la mínima espresión, la cultura del hormigón y el vecerismu.

* Les polítiques de la derecha nun valieron tampoco p’avanzar nel Autogobiernu d’Asturies y nel reconocimientu de la so identidá llingüística y cultural; col apoyu del PSOE, el PP fexo una nueva reforma estatutaria que niega a Asturies el reconocimientu de los mesmos derechos financieros, competenciales, llingüísticos y políticos que les otres nacionalidaes históriques del Estáu. El nuevu modelu de financiación desarrolláu pol PP perxudica gravemente los intereses de la nuestra Comunidá. La derecha, el Partíu Popular, fracasó como fuerza de gobiernu n’Asturies, arrastrando amás a les Instituciones Autonomiques a la inestabilidá y al descréditu.

El fracasu de la derecha y la cris institucional, de llexitimidá democrática, y social que padeció Asturies a lo llargo d’esta llexislatura encontóse tamién nel apoyu emprestáu pol nacionalismu asturianu de derecha (PAS) que caltuvo col so votu les polítiques fracasaes del PP, y pola negativa del PSOE a apoyar una salida rexeneradora dende la izquierda negándose a una Moción de Censura, lo que significó na práutica tener implícitamente pel Gobiernu de Sergio Marqués hasta lo cabero de la llexislatura.

La ruptura del PP, sólo dende la manipulación consciente, pue xustificarse como consecuencia de la defensa del Sr. Marqués de los intereses d’Asturies escontra’l Gobiernu del Estáu. El Gobiernu del Sr.Marqués, primero apoyáu y emponderáu pol PP, desarrolló una acción de gobiernu enforma conservadora, reaccionariu na so política y autoritariu nel exerciciu del poder, al que nun-y importó subvertir les mayoríes na Xunta Xeneral por aciu del tresfuguismu, despreciar al parlamentu asturianu y les instituciones democrátiques, enfrentase a la Ilesia o los sindicatos o despreciar al gobernar los elementos básicos de la identidá y cultura del pueblu asturianu.

L’agravamientu del declive d’Asturies y la degradación política ya institucional provocada pol PP, tien antecedentes nel fracasu de les polítiques de xestión de la cris feches polos anteriores gobiernos del PSOE. El fracasu de la derecha nun garantiza en sí mesmu una nueva etapa n’Asturies, un gobiernu y una política d’izquierdes.

UNA NUEVA ETAPA P’ASTURIES

Dende Izquierda Xunida d’Asturies consideramos imprescindible abrir una nueva etapa n’Asturies. Una nueva etapa superadora de les polítiques que se ficieron lo llargo de la nuestra historia como Comunidá Autónoma. Una nueva etapa que permita diseñar y afrontar el futuru d’Asturies dende nueves perspeutives de desarrollu económicu, social, cultural y de autogobiernu. 

Abrir una nueva etapa n’Asturies dende la izquierda política y social asturiana pa superar y dar alternativa al fracasu de la derecha y al escosamientu de les polítiques aplicaes polos gobiernos socialistes.

Los asturianos y asturianes nun tienen d’atopase esti trece de xunu na disyuntiva de optar ente’l fracasu del PP o la continuidá de la política escosa del PSOE. Caltener una derecha fracasada nel Gobiernu d’Asturies o tornar a lo mesmo de la mano de la política escosa de los socialistes, nun ye la opción pa xenerar un proyeutu políticu asturianu superador del declive y de la imposibilidá de construyir el nuestru autogobiernu.

La mayoría social de la izquierda asturiana tien de puxar por una mayoría programática de la izquierda. Una mayoría programática que tien de construyise dende la renovación y reformulación del pensamientu de la izquierda pa construyir una alternativa qu’encontándose na esperiencia del movimientu social ( sindical, cultural, asociativu,...) asturianu, supere les vieyes formes de facer política pa dar rempuesta a les inquietúes personales y sociales, acordies con un proyeutu global p’Asturies , porque ye a la izquierda asturiana, nun sen más ampliu y plural, a la que-y correspuende camudar el calce de les coses.

El programa d’Izquierda Xunida d’Asturies, ellaboráu teniendo en cuenta a los movimientos sociales asturianos (sindical, asturianista, cultural, campesín,etc.), quier ser una propuesta pa la necesaria rexeneración, renovación y reconstrucción del proyeutu y el programa de la izquierda asturiana. Y, a la vez, la garantía pa que la converxencia de la izquierda asturiana articule y construya la mayoría programática.
 
 

IZQUIERDA XUNIDA D’ASTURIES, LA GARANTÍA D’UNA NUEVA ETAPA

Izquierda Xunida d’Asturies presenta un proyeutu global pa la nuestra Comunidá, un proyeutu que dende la imprescindible concertación y alcuerdu social sea capaz de movilizar non sólo les instituciones de Gobiernu, sinón a la propia sociedá asturiana, devolviendo la illusión y el compromisu pal esfuerzu coleutivu necesariu p’aniciar una nueva etapa en Asturies.

Asturies demanda un finxu de futuru que sólo ye vidable algamar dende la ellaboración y puesta en marcha d’un modelu de desarrollu alternativu que s’enconte y respuenda a la globalidá y especificidá de la cris y declive de la nuestra Comunidá. La nuestra propuesta quier asitiar los núcleos centrales d’axeitamientu d’un nuevu modelu de desarrollu p’Asturies empobináu a la creación d’emplegu, a una distribución equitativa del crecimientu dende’l puntu de vista del equilibriu territorial y social, a la meyora de los servicios y a la Construcción d’Asturies como país, dende’l desarrollu del autogobiernu y de la defensa de la identidá coleutiva como pueblu.

TRABAYAMOS POR ASTURIES

Les eleiciones del 13 de xunu, sedrán una ocasión importante pa que los asturianos y asturianes espresen nes urnes la voluntá d’abrir una nueva etapa n’Asturies. Esta aspiración vendrá de la mano de la confirmación y el fortalecimientu d’Izquierda Xunida d’Asturies como la fuerza que decida, pa poder garantizar la necesaria rexeneración, renovación y reconstrucción del proyeutu y del programa de la izquierda asturiana.

Ésta ye la condición pa convertir la mayoría social d’izquierdes d’Asturies en mayoría programática, en Gobiernu de la izquierda asturiana.

A ello convocámoste: TRABAYEMOS POR ASTURIES.
 
 

PROPUESTES PROGRAMÁTIQUES BÁSIQUES

TRABAYAMOS POLA CONSTRUCCION D’ASTURIES COMO PAÍS.

• El reconocimientu de la plena capacidá política de la Comunidá dándo-y al nuestru Parlamentu el conxuntu d’atribuciones necesaries.

• Axeitamientu de les Instituciones polítiques básiques como’l Defensor del Pueblu, la Sindicatura de Cuentes o’l Conseyu Consultivu.

• L’ampliación de les Competencies esclusives, de desarrollu llexislativu y d’execución, y la tresferencia inmediata de les yá recoyíes nel Estatutu.

• El reconocimientu de la nuestra identidá coleutiva como nacionalidá y Comunidá histórica y la de cooficialidá de la Llingua Asturiana.

• La definición d’un modelu de financiación qu’asegure l’autonomía y la suficiencia financiera de la Comunidá, nel marcu d’una corresponsabilidá fiscal solidaria con mecanismos de nivelación y reducción de les desigualdaes territoriales.

• Puxar pola reforma de la Llei Electoral pa llograr una representación institucional proporcional cola voluntá popular espresada, eliminando les circunscripciones electorales.

• Desarrollu democráticu y vertebración de la Comunidá, treslladando a l’alministración local asturiana competencia y recursos. El pautu local n’Asturies ye l’instrumentu pa lllograr esti procesu.

• Participación d’Asturies na política estatal y europea al traviés de la reforma federalizante del Senáu como cámara de representación territorial. Garantizar la participación del Parlamentu Asturianu nel alderique de les polítiquesde la Xunión Europea qu’afeuten a la nuestra Comunidá Autónoma.

• Creación de la Secretaría de relaciones col Esterior, que desarrolle polítiques de cooperación ya intercambiu económicu, cultural y políticu, de calter Tresnacional, especialmente coles "rexones" del arcu Atlánticu.
• Garantizar la participación ciudadana y la vertebración social nel desarrollu del nuestru programa.

TRABAYAMOS POLA REINDUSTRIALIZACIÓN GLOBAL D’ASTURIES.

• Diseñu y puesta en marcha d’un plan de reindustrialización concertáu colos axentes sociales.

• Reordenación y potenciación de los instrumentos de promoción y de les empreses públiques del Principáu. Reforma del Institutu de Fomentu Rexonal, convirtiérndolu nel Institutu asturianu de Desarrollu (IAD), que sedrá’l muérganu d’execución de la política económica ya industrial.

• El sector financieru d’Asturies debe articulase nel ámbitu territorial de la Comunidá coles polítiques autonómiques. El papel de la Caxa d’Asturies nel procesu de reactivación económica de la Comunidá ye insustituyible; reorientar la so xestión engranándola con una política de desarrollu d’Asturies y definiendo otra vez la so partivcipación n‘empreses.

• Ellaboración consensuada del Plan de Desarrollu Rexonal (PDR), como instrumentu estratéxicu de planificación de La Comunidá .

• Negociación col Gobiernu Central col envís d’establecer un Fondu de reindutrialización p’Asturies.

• Reorientación de los fondos mineros hacia la reindustrialización y reactivación de los conceyos mineros.

 
TRABAYAMOS POL EMPLEGU ESTABLE.

• Un plan d’emplegu integral p’Asturies.

• Puesta en marcha dende la nuestra Comunidá d’iniciatives tendentes al repartu del trabayu nel ámbitu de l’alministración pública autonómica y local, y nos sos respeutivos sectores públicos, y lo mesmo nel sector priváu de la economía, reorientando la política de subvenciones y empobinándoles a la eliminación de les hores estraordinaries y la implantación de la xornada de trenta y cinco hores.

• Reforzar selectivamente les plantiyes de los servicios públicos esenciales y les iniciatives d’emplegu empobinaes a la satisfaición de nueves demandes.

• Collaboración colos conceyos y entidades ensin fines de llucru, orientada a la meyora del emplegu y la inserción llaboral de los coleutivos con especiales torgues (muyeres, mocedá, paráos de llarga duración).

• Creación del Institutu Asturianu d’Emplegu y Formación.

TRABAYAMOS POLA DEFENSA DEL SECTOR PÚBLICU.

• Defensa de lo público y ellaboración d’un nuevu modelu de xestión pública.

• El caltenimientu del sector públicu económicu.

• Paralización de los procesos de privatización y de la xestión privada de los servicios públicos.

TRABAYAMOS POLA DEFENSA DEL CAMPU ASTURIANU.

• Defensa de les esplotaciones familiares agraries y orientación hacia modelos de producción cada vez más encontáu nel aprovechamientu de los nuestros recursos.

• Ellaboración d’una posición conxunta alredor de l’Axenda 2000 pa dar rempuesta a la OCM de la Lleche y de la Carne con criterios de modulación favorables a les esplotaciones familiares agraries.

• Política específica pa producciones artesanales desarrollando les midíes d’apoyu téunicu, de formación permanente o d’apoyu a la comercialización, la inversión y la modernización que demanda’l sector y l’apoyu a les iniciatives d’agricultura biolóxica.

• Promover un marcu llegal afayadizu nel ámbitu del sector forestal y de la industria de la madera. Llei de Montes y Plan Forestal

• Supresión por Llei de la mercantilización de les Cuotes sustituyéndola por un repartu d’elles qu’atienda a criterios que prioricen a ganaderos con cuota escasa, a la incorporación de la mocedá y a les fasteres desfavorecíes.

• Tocántenes a la Carne, distribución de los derechos de primes atendiendo a criterios coherentes col Plan de carne d’Asturies. Potenciación d’ésti incidiendo na comercialización.

• Modulación en xeneral de los pagos compensatorios de forma que favorezan más a les esplotaciones agraries más pequeñes.

• Exixencia de que los planes d’abandonu empobinen a incorporaciones sustanciales de nuevos ganaderos.

• Caltenimientu del emplegu y de la renta agraria.

• Desarrollu de sistemes productivos compatibles cola calidá del mediu ambiente.

• Fomentu del asociacionismu y la economía social.

• Formación, investigación y esperimentación agraria. Potenciación del SERIDA (antigu CIATA). 

TRABAYAMOS POL SECTOR PESQUERU

• Plan específicu de modernización y reestructuración de la nuestra flota artesanal .
• Defensa de los caladeros.

• Diseñu d’una política social que contemple la garantía d’un salariu mínimu, cobertura de desemplegu nos paros estacionales y plan de xubilación específicu atendiendo al altu riesgu.

• Desarrollu d’una industria tresformadora nesti ámbitu (conserves, conxelación...).

• Continuidá de l’Autovía del Cantábricu, completando los tramos entá pendientes pal enllace con Cantabria nos plazos comprometíos; asina como asegurar la so terminación hasta Galicia pel interior p’asegurar les comunicaciones del Occidente asturianu y refugar nuevos impautos medioambientales y estructurales desplazando pal interior el trazáu previstu ente L.luarca y A Veiga .
• Realización de la Variante de Payares, con un trazáu que refugue l’impautu nel valle del Güerna.
• Creación del Consorciu de tresportes nel Área Central d’Asturies, con un diseñu intermodal. 

• El desarrollu de la potencialidá del nuestru complexu portuariu y del tresporte aereu.
• Desarrollu de la Rede de Nueves Tecnoloxíes de la información, garantizando la so implantación nel conxuntu del territoriu de la Comunidá .

• Implantación de planes de desarrollu caltenible nel territoriu del Parque Nacional de los Picos d’Europa, dotáu con recursos asgaya que se puean emplegar de forma integrada.

• Desarrollu y revisión de los instrumentos de proteición de los espacios naturales y de les especies de la fauna asturiana.
• Iguar el proyeutu de Funicular a Bulnes emplegándolu pa la comunicación de los vecinos y vecines, pa dar servicios, y con un usu esclusivu y restrinxíu pa esi menester.
• Plan de recuperación y saneamientu de suelos y plan de residuos refugando la incineración.
• Desarrollu de los planes de sanemientu, priorizando la depuración secundaria y terciaria.
• Terminar coles autorizaciones pa l’apertura de nueves esplotaciones de minería albentestate o ampliación de les qu’hai, decretando que se piesllen les que s’alcuentren en situación irregular.
• Política d’ordenación del territoriu encontada nos principios de la planificación, la participación social y el control democráticu de los oxetivos medioambientales y territoriales, y con sometimientu a evaluaciones d’impautu ambiental o estructural.
• Llei Asturiana d’impautu ambiental.
• Llei del ruiu.
• Creación de la Conseyería de Mediu Ambiente.
• Moratories respeuto a instalaciones o actividaes con fuerte impautu hasta que quede convenientemente regulada la so normativa.
• Llendar el crecimientu urbanu incontroláu. Emplegu del suelu afayáu a les necesidaes sociales y a la escontra de la especulación, y con tresparencia na xestión urbanística.

 TRABAYAMOS POLA IGUALDÁ Y LOS DERECHOS BÁSICOS DE LOS ASTURIANOS Y ASTURIANES.

• Revisión de la Llei de Bienestar Social pa incorporar un modelu de xestión por árees territoriales.
• Plan de llucha contra la esclusión social.

• L’IMI, instrumentu amañosu de la política social, tien menester d’importantes modificaciones na so reglamentación y ampliación, de mou qu’empobine a la integración social y llaboral de los sos beneficiarios. Tien de camudase asina nun pasu firme dica l’establecimientu de la Renta Básica Ciudadana.
• Plan d’atención sociosanitaria que permita reordenar los recursos existentes y poner en marcha nuevos servicios que faciliten una atención integral pa les persones mayores.
• Desarrollu de la Llei del Menor.
• Desarrollu de la carta de derechos de los y les inmigrantes.
• Revisión del Plan de minusvalíes contando cola participación de les organizaciones implicaes.

• Promover na nuestra Comunidá una llexislación propia adaptada a les nuestres especificidaes, qu’incluya, d’un llau, una Llei de Suelu y Ordenación Urbana y, d’otru, una Llei de Viviendes Protexíes y Desaniciu del Chabolismu y la Infravivienda.

• Desarrollar midíes d’apoyu a la autoorganización social de la mocedá en materia de vivienda.

• Desarrollar les conclusiones aprobaes nel Primer Congresu mundial de l’asturianía.
• Revisión de la Llei de l’asturianía.

• Abordar nel marcu de les tresferencies sanitaries, l’alicamientu de los servicios sanitarios, l’avance na calidá de l’atención, y la participación, primando una orientación de salú pública.
• Completar la rede d’atención primaría, desarrollando la so orientación comunitaria.
• Camudar el modelu de xestión del Hospital del Oriente treslladando la so titularidá al Principáu d’Asturies.
• Desarrollar l’atención a la salú mental por aciu de programes y completar la rede de instituciones intermedies.

• Llei sobre drogodependencia.

• Una xestión tresparente y participativa de les tresferenciaes educatives, que tienen de producise hacia xineru del 2000, con una cuantificación amañosa p’asegurar el futuru del modelu d’escuela pública qu’Asturies defina.
• Garantizar una ufierta pública de calidá nel conxuntu del territoriu, pa lo que ye menester la ellaboración de les Lleis de Financiación del Sistema Educativu y de Calidá o Igualdá na Enseñanza.
• Creación del Conseyu autonómicu de Formación profesiónal ya integración de los tres sosistemes d’esa formación.
• Caltener el calter públicu de la enseñanza, llendando los conciertos educativos a la subsidiariedá de la ufierta privada y non concertándola nes etapes non obligatorias.
• Plan pluriañal de saneamientu de la Universidá, entamando con una auditoría integral y comprometiendo a l’Alministración Central pa que corrixa les insuficiencies tresferenciales del Principáu .
• Desarrollu de la Llei del Conseyu Social y aprobación de la Llei de la Universidá asturiana.

• Establecer les llínees xenerales de calter estratéxicu sobre’l papel de la Universidá nel desarrollu de la nuestra Comunidá .

• Planificación que recueya les nueves enseñances y titulaciones, les decisiones de financiación y les inversiones d’infraestructures.

• Una política cultural pa la construcción d’Asturies como país, promoviendo la cultura tradicional, recuperando’l nuestru patrimoniu (Llei del patrimoniu Cultural ya Institutu del Patrimoniu d’Asturies como muérganu de xestión) y definiendo una rede de museos y el Consorciu museísticu d’ Asturies.
• Creación del Archivu Xeneral d’Asturies y el Centru de música tradicional, redefiniendo radicalmente’l RIDEA, y creando’l Centru de Cultura tradicional
• L’apuesta pola creación artística tien de suponer la definición d’una política integral y sectorial (ampliación de la OSPA, creación del Centu Contemporaneu d’arte d’ Asturies.
• Conseyu del Teatru Asturianu y reformulación del ITAE).

• Plan de normalización sociollingüística de la Llingua Asturiana y fomentu del Gallego-asturianu nel so ámbito territorial.

• Creación y puesta en marcha de la Radiotelevisión Asturiana.
• Desarrollu de la implantanción nel conxuntu del territoriu asturianu de la rede de telecomunicaciones.

• Desarrollu de la Llei del deporte..

• Coordinación ente Comunidá Autonóma, Ayuntamientos y Federaciones pa fomentar el deporte de base.

• Potenciar la práutica del deporte tradicional n’Asturies.

• Potenciar la práutica deportiva en tolos cilcos escolares.

• Llei de participación de la mocedá.

• Planes específicos de dinamización del asociacionismu de la mocedá rural.

• Desarrollu de planes d’igualdá d’oportunidaes ente los xéneros. 

• Creación del Conseyu de la Muyer.

• Llei de pareyes de fechu. 

• Derechu de les persones del mesmu sexu a casase polo civil.

• Incorporación como emprestación del sistema sanitariu públicu de los procesos del cambiu de sexu.

TRABAYAMOS POLA PAZ , LA SOLIDARIDÁ Y LOS DERECHOS HUMANOS.

• Ellaboración d’una Llei Asturiana de Cooperación al Desarrollu. Plan cuatriañal de cooperación.

• Asumir la defensa consecuente del 0,7%.
• Dinamizar el Conseyu asturianu de cooperación.

Creación de l’Axencia asturiana de cooperación internacional.