Fuelga d'estudiantes en Xixón, el díi 30, en sofitu a los sindicalistes Carnero y Morala

Organizaciones moces d'izquierdes convóquela de magar les 10:20 hores.

Delles organizaciones de mocedá con actividá en Xixón y parte de la "Plataforma escontra la represión y poles llibertaes" convoquen a tolos estudiantes del Conceyu a facer fuelga'l prósimu martes día 30 de xineru, día nel que tendrán el primer xuiciu los sindicalistes de CSI, de magar les 10:20 hores. Les organizaciones polítiques de mocedá d'izquierdes Coleutivos de Mocedaes Comunistes, Darréu, Sindicatu d'Estudiantes y Xuventúes Comunistes xunta, la sindical, CSI Mocedá fain llamamientu tamién a dir a la concentración de refuga'l procesu xudicial delantre los Xulgaos de Poniente a les 11:00 hores.


Manifiestu

¡SOLIDARIDÁ CON MORALA Y CARNERO!

EL 30 DE XINERU, TOOS A LA FUELGA XENERAL

VEN A LA CONCENTRACIÓN

El próximu martes, 30 de xineru tendrá llugar el xuicio contra los dos sindicalistes de la CSI, Carnero y Morala. Ambos tan procesaos acusaos de provocar desperfectos mientres les movilizaciones en defensa del futuru del astilleru Naval Xixón. La pena que solicita’l fiscal ye de 6 años y mediu pa caún d’ellos. Con esti xuiciu (el que denunciamos como una farsa, amañáu cola complicidá del Ayuntamientu de Xixón, ensin más pruebes que’l testimoniu de la policía) preténdese amedrentar a tol movimientu obreru.

Hai que remontase prácticamente a la dictadura p’alcontrar unes penes tan dures contra dos trabayadores como les que se tan pidiendoe pa estos compañeros. No ye nenguna casualidá que se pretenda dar un castigu exemplar a dos sindicalistes que a lo llargo de la so trayeutoria destacáronse pola so combatividá y honestidá y la so defensa de los derechos de tolos trabayadores. Nun momentu onde padecemos la precariedá llaboral, les males condiciones nos centros d’estudios, la privatización de la educación y de la sanidá y tantos otros ataques, ye cuando se recrudez la represión contra quienes se movilicen pa cambiar esti estáu de coses.

Una conderga a estos compañeros supón un precedente gravísimu y envalentonará tanto al gobiernu PSOE-IU como a la patronal pa dir contra los trabayadores na llucha utilizando midíes xudiciales. Debemos amosar masivamente la nuesa refuga a esti xuiciu. La mocedá nun somos ayenos a lo que pase nel ámbitu sindical. Tamién son los nuesos futuros puestos de trabayu y les nuestras condiciones llaborales les que tan en xuegu. Poro pedimos que secundes la fuelga a partir de 3ª hora, ello ye a les 10.20 y vaigas a la concentración de protesta que tendrá llugar el mesmu día del xuiciu, a les 11 de la mañana nel xulgáu.

Reiteramos la nuestra solidaridá con ambos compañeros y esiximos la so absolución, y el cese de la escalada represiva contra toos aquellos que traten de lluchar, en ún o otru ámbitu (trabayadores, estudiantes, activistes del movimientu ecoloxista, etc)

CONCENTRACIÓN A LES 11 NOS XULGAOS DE LO PENAL

(XUNTO A PONIENTE)
-------------------------------------------------------------------
Convoquen:
CMC, CSI-Mocedá, DARREU, JCA, UJCE y SE.