Nun ye dalgo propio d'equí, puede que seya xeneral y que en tolos llaos la xente de la izquierda rupturista tea na mesma dinámica fata y faltosa que n'Asturies, pero abúltame que nesta tierra la babayada engorda más qu'un gochu celta ensin salir de la corripa.
Chando una güeyada al panorama, da pena ver como l'oxetivu cimeru de la xente que d'una o otra manera milita o simpatiza con les idees rupturistes ye andar más preocupaos d'armar chiringuitos pa engarrase colos de al llau, de discutir de chorraes de guajones ensin xacíu que de afitar de forma seria y curiosa una alternativa de llucha y d'organización escontra'l sistema que mos come. Da igual ver les discusiones ente los nacionaliegos d'izquierdes, los antifas y el Pcpe, los d'Uviéu contra Xixón, los guajes tosquilaos con camisetes coloraes escontra los guajes tosquilaos con camisetes verdes.... los que tienen banderes con cruces contra los que tienen banderes con tres colorinos, que vergüeña......
Tou esti alderique ensin xacíu solo apunta'l nivel de la xente, la poca verdá que hai detrás de tanto palabreru revolucionariu. Paez que lo que de verdá importa ye que cada grupín tenga'l so escañu pa subise y dicir lo que los sos egos inflaos les dicten. Preba d'esto ye que namás qu'unos cuantos se xunten ya armen enseguida toa una cadarma organizativa, sigles, banderines, comisiones, etc etc ensin que debaxo de too esto haiga nada real. Poca humildá y poca autocrítica. Con esti panorama ye normal que la xente mozo eche a correr en cuantes ve lo que hai. A quien pue atraer esto? Paezme que sólo a frikis y chiflaos. Anque pensándolo bien, nun foi siempre asina?..... Igual sí, pero cola sutil diferencia que esos frikis y chiflaos taben na cai armando la grieska y non metíos tol día en conceyos nin en interné.


El morín de la Campa.