[Lxs compañerxs d´El Fielatu ficieron-y una entrevista a David Rivas, candidatu de Andecha Astur pala Xunta Xeneral d´Asturies y voceru d´esta formación, na que puen lleese les valoraciones de David sobro lo asocedio con Fernando y el clima pollíticu xenerao tres la detención ente otres munches rempuestes sobre´l momentu actual n´Asturies.]


E.: Hai un par de selmanes arrestaran a Fernando González, militante hai años d’Andecha. Acúsenlu d’una montonera d’aiciones violentes y ta encarceláu en Madrid.

R.: Dexémosmos d’eufemismos. Acúsenlu, direutamente, de terrorismu.

E.: Andecha, otra vuelta, chiscada.

R.: Sí, claro. Yá lo fixeran hai dos años col mesmu pretestu o con otru asemeyáu.

E.: ¿Coñoz a Fernando González?.

R.: Sí, dende hai tiempu. Yo coñózolu por Fernan, asina, ensín acentu. Ye más, por Fernan siempres tuve apreciu. Cuasi nunca taba d’alcuerdu con elli pero siempres valoré la so coerencia ya’l so saber tar. Ye un home de conviciones firmes, nun ye’l típicu neñu de casa bien enfurruñáu colos padres y cola sociedá. Cuando tuvo presu por insumisión arrenunció a privilexos penitenciarios porque consideraba que taba ellí precisamente por nun querelos, por nun facese falsamente obxetor y resolver la papeleta con un trabayu nuna ONG cualisquiera. Nel pocu tiempu que coincidimos n’Andecha, nun me recuerdo que ganare una votación. Siempres quedaba en minoría, munches vegaes quedaba él solu. Pero, al dí siguiente, executaba la decisión de la mayoría, pesie a que los mesmos estatutos d’Andecha dexen llibres a los militantes de facer o non aquello colo que nun tan d’alcuerdu. N’Andecha pués nun trabayar en dalgo alcordao. Eso sí, nun pués trabayar a la contra. Mentres tuvo n’Andecha, Fernando González fora un militante exemplar ya un bon compañeru, cosa que podrán afirmar los mozos con muncho más coñocimientu que yo.

Dase la circunstancia de qu’esti home inclusu votó contra mí nel conceyu nel que s’elixía candidatu pa les elleiciones. El mió perfil nun yera’l que a elli-y gustaba. Pámeque me tildó de socialdemócrata, lo que, dicho seya de pasu, nun soi. Pero toi comencíu que siempres me tuvo apreciu porque defendo les miós posiciones con tantu afoguín como elli defende les de so. Ya eso aproxima muncho a la xente, hai un talante sentimental que fae de ponte. Amái, dígo-y la verdá, enxamás desprecié la so opinión y tampoco nesi momentu un tanto complicáu de la votación. Ya un día, menses dempués d’aquel conceyu, pidióme que-y echara una mano pa preparar un trabayu de desendolcu caltenible nes biesques. Taba finando los sos estudios. Fíxelo, claro. Hai munchu tiempu que nun lu veo. Nun sé lo que fae dende que marchó d’Andecha –la verdá ye que tampoco sé lo que facía entós, nin lo que faen individualmente los que tan güei, nin ellos lo que faigo yo- pero nun me paez un home violentu. Y, dende lluéu, lo que saliera pelos medios ye poco creyible. Acúsenlu, pente otres coses, de dellos atentaos cometíos, más o menos, a la mesma hora ya en sitios separtaos per munchos kilómetros.

E.: Pero les acusaciones son mui fuertes.

R.: Pamidea que fixeran de Fernando González una cabeza turcu. Nin tansiquier el xuez de l’Audiencia Nacional acoricó les allegaciones policiales, anque caltién el secretu’l sumariu. Pero, dende un puntu d’agüeye políticu, igual lo más importante ye la criminalización d’esta persona y, de pasu, del movimientu que ye más cercanu a él. Y tamién ye valoratible adicar pal comportamientu de la prensa asturiano. Ye sobromanera marielliegu El Comercio, mui particularmente una periodista a la que-y presten como llambedora estos asuntos.

Mentres-y aplicaben a Fernando González la noxante llei antiterrorista, la familia nun fora saber qué-y pasaba, de qué lu acusaben ya ónde taba braeramente. Tampoco lo pudo saber la so abogada. Pero ye que nin tansiquier-ys lo dixo’l delegáu del gobiernu español, Trevín, a dos diputaos d’Esquerra Republicana que falaran cola so oficina pa interesase pol deteníu. Rosa Bonás y Joan Puig respondieran en custión de minutos a la llamada de sofitu que-ys llegare dende Asturies. Por ciertu, qu’eso fixéranlo’l mesmu día del cafarnaún del gallego-asturianu. ¿Pescancia lo qué-y digo?.

Pero’l casu fora qu’El Comercio espublizó nome, apellíos, hestoria personal, cargos, etcétera. Una periodista marielliega arrecibió más información –violando la presunción d’inocencia y cuntiando antecedentes xulgaos y sentenciaos con absolución nel so día- que la familia, los abogaos y dos diputaos. La periodista –por denominala d’alguna forma- emplegaba’l términu fontes consultaes, términu rarucu de llamar a la policía. Fernando González yá ta xulgáu y condergáu mediáticamente.

E.: Nesi contestu la criminalización ye evidente.

R.: Y tan evidente. Y vamos ver más. Alcuérdome agora que, nos años ochenta, condergaron por terrorismu a un xaponés, un tal Omori. La principal prueba de cargu fo que tinía un estintor en casa. Paez una tolada, pero ye qu’esti paisanu yera anarquista. Interesante pal réxime. Como equí. L’otru día, falando d’esti asuntu con unos vecinos de la parroquia, llegamos a una conclusión tremenda. Atienda. Nes furgonetes d’usu industrial ye obligatorio llevar un estintor. Total, que un paisanu que conduz un veículu d’estos va un día al monte a baltar un árbol, pa lo que lleva un bidón de gasolina pa la motosierra ya un hachu. Podría ser inculpáu como presuntu terrorista. Ta claro: llíquidu inflamable, aerosol y arma. Eso ensín entrar en que, daqué mui corriente nel campu, lleve tamién una garrota, una navaya o una escopeta.

E.: ¿Y, como organización, van facer daqué?.

R.: Nada particular. Somos una organización política que xugamos na carril político, polo que namái desiximos que se caltenga la presunción d’inocencia, que se respeten los drechos fundamentales y que haiga un xuiciu xustu y lo más rápidu posible. Nun tenemos otra posición agora que nun tuviéramos enantes, cuando, por exemplu, deteníen o encarcelaben a obreros del naval, asaltaben cases ocupaes, sancionaben por custiones polítiques a emplegaos del ferrocarril o xulgaben a insumisos. El fechu de que Fernando González seya nacionalista nun mos fae tener una postura distinta. La nuesa defensa de les llibertaes y de la disnidá humana ye lo que mos mueve. Por eso mos preocupamos de que un ciudadanu tea sometíu a una incomunicación de cincu díes, ensín ver abogáu, xuez, amigos o familiares. Y agora sigue tando nuna indefensión grande, a quinientos kilómetros de la familia ya embaxo’l secretu sumarial. Y, polo visto, acaben de ordenar el so aisllamientu. Pámeque tan ensañándose innecesariamente con elli. Nun ye chiste eso que-y entrugó un funcionariu prisiones cuando entró na cárcele de Sotu’l Real en condiciones tan esceicionales: chachu, ¿tú qué yes, d’Al-Qaida?. Y agora enterámosmos de que la so integridá física ta en pelligru porque munchos presos camienten que un asturianu con eses acusaciones ye de los implicaos na matanza de Madrid. Hai munchos motivos pa tar preocupaos.

La llei antiterrorista española ye una de les lleis mas custionaes poles organizaciones humanitaries. Ye esa llei la que coloca al reinu d’España nes llistes d’estaos que violen los drechos humanos, unes llistes feches por Amnistía Internacional. Amái ye una llei de calter político, porque aplícase cuando les fuercies de seguridá consideren que hai intencionalidá política. Si consideren que un atentáu ye fechu por gamberros nun l’apliquen. Hai un tiempu unos rapazos supongo que borrachos cuasi quemen media Fresneda y a naide se-y ocurriera aplicá-ys esa llei. Normal. Por embargo, si los mesmos chavales lleguen a tar afiliaos a un grupu políticu, igual diba ser estremao. Asina funciona esa llei. Yo mesmu padecila, na so versión UCD, hai yá d’eso venticincu años.

E.: Esa llei antiterrorista ye criticada pola esquierda dende siempres.

R.: Nun diría yo tanto y menos dempués de ver lo que vimos hai unos díes. El Partido Comunista de España fora un bon avalista de les lleis d’esceición que se fixeron dende la muerte de Franco, anque caminó faza postures más civilizaes nos últimos tiempos, d’Anguita p’acá. Pero la so visión de la represión depende de quién la sufra y si la carez daquién que nun entre nos sos porgüeyos dá-yos igual. Dempués de les agresiones faxistes de Cangues o de la detención d’esti rapaz, ¿vió al socialcristianu Valledor dicir daqué?. ¿Ye qu’el conseyeru de xusticia nun opina sobro esta llei?. ¿Ye que al conseyeru de xusticia d’Asturies nun-y importa la indefensión d’un ciudadanu asturianu o la brutalidá nes cais d’una ciudá asturiana?. Mire, ehí voi recoñocer que Rafael Palacios, col que discrepo en tantes coses, toviera al altor, a lo menos relativamente. Pero los comunistes de Llamazares y d’Iglesias, ¿aú tan?.

Sólo Andecha y la CSI, y más sero tamién el PCPE, manifestaron la so oposición, non al arrestu d’una persona concreta, sinón a una llexislación que permite situaciones como esa. Ye evidente que, escontra estes custiones, sólo se pué tar a favor o en contra. Escontra la opresión, quién nun se manifiesta ye que ta a favor. El silenciu de delles organizaciones ye más que siñificativo, ye un silenciu cómpliz. Eses organizaciones vienen a da-y la razón a Bertrand Russell cuando escribía, nos sos ensayos escéuticos, que tenemos dos tribes de moralidá, la que pedricamos pero nun prauticamos y la que prauticamos pero raramente defendemos. Yo, que soi una persona mui poco estremista, yá teo perfecha idega de qué organizaciones tan cola llibertá y cuáles cola represión. Una custión como la llei antiterrorista, como pudo ser la entrada na OTAN, la oficialidá del asturianu o la defensa de les minoríes, ye una frontiera política. Hai un lláu y hai otru. Nun hai tierra de naide, como la pué haber notros asuntos, o sitiu pa l’abstención. Nun se pué ser indiferente delantre la conculcación de drechos civiles. Equí tres organizaciones tan colos drechos civiles y les demás agusto cola llexislación d’esceición. La esquierda asturiana ta cubierta de gloria.

E.: Pero la criminalización dende la prensa funciona.

R.: Sí, anque sólo relativamente. Esta cabera campaña fora tan burda que cuasi naide la creye. Yo nun taba n’Asturies cuando salieran les primeres noticies y nun ví les reaiciones de la xente a lo primero. Cuando volví unos díes dempués sentí munches vegaes falar d’esti home como Supermán, el Guerreru l’Antifaz, el Capitán Trueno y coses d’esti tenor. Y ye que la xente vía tóo mui desaxerao. Vente atentaos, líder de tola estrema esquierda asturiana, rellacionáu con ETA, el GRAPO ya inclusu l’IRA, militante sindicalista, candidatu al ayuntamientu de Xixón, dirixente de delles organizaciones antifaxistes, manifestante cuasi profesional. Y tovía-y quedaba tiempu pa estudiar y trabayar na hostelería. Pero la verdá ye que daqué de criminalización siempres queda. Pero la principal fuercia de los aparatos d’opresión ta, precisamente, na llerza de los ciudadanos. Nun teamos miéu al faxismu y mataremos les sos frebes, dicíase hai años.

En fín, el casu ye que mos obliguen a perder el tiempu falando de lo milenta vegaes falao. Tol mundiu sabe que Andecha Astur ye una organización política que trabaya nel campu políticu. Na nuesa cadarma nun hai sitiu nin pa la violencia nin pa les posiciones non democrátiques. Ye cuasi una tochez dicir esto porque ta dicho dende l’entamu d’esta organización, pero oblíguenmos a repetilo dacuando en vez. Nun tan nes nueses files los que cortexaron con dellos riesgos, nin los que remanen cal vivo, nin los que van a puticlubes con islamistes, nin los que defendíen les cheques estalinistes. Esos tan notros sitios.

E.: ¿Por qué esi intentu permanente de criminalizar al nacionalismu asturianu?.

R.: El nacionalismu asturianu ye un movimientu creciente y cuando digo esto nun toi refiriéndome a Andecha esclusivamente. Falo xenéricamente, ametiendo equí dende fenómenos musicales hasta plantegamientos antropolóxicos o xuntes d’escritores. Pero esi movimientu qu’espoxiga ta poco politizáu, entendiendo por eso que nun ta organizáu políticamente. Entóncenes, si machaques cola solombra la sospecha a la organización política referencial o, en xeneral, a les organizaciones polítiques nacionalistes, tas torgando que la xente de les rodolaes culturales s’avere. Unos igual creyen eses coses, pocos, pero otros más, ensín creyelo, nun tan dimpuestos a trabayar nun sitiu onde ca dos por tres andes con estes sinagogues.

Cada vegada que sal una cosa d’estes na prensa, a mí nun me pasa nada, más allá del atragantón del momentu. Nin la mió familia nin los miós vecinos m’entruguen nada, pero ye que teo los miós años y tóos ven el tipu vida que llevo. Dan por fecho que nun voi andar poniendo petardos a les puertes de llocales de partíos políticos. Dan por fecho que nin tansiquier esborrio señales de tráfico nin pego cartelos. Y lo mesmo piensen de la xente d’Andecha que suelen ver comigo, que son, normalmente, profesionales cuarentones. La prósima vegada que yo vaiga a una barricada tendrá de ser porque vien, como diz el canciu, la llucha final. Ya eso nun va pasar mañana. Pero si falamos d’un grupu de mozos que tan n’Andecha o en Darréu les coses puén ser estremaes. Ehí esiste’l riesgu de que haiga xente que creya lo que-y cuntia la prensa, porque llueve enriba moyao. D’un lláu ta tola información acumulada sobro l’asuntu bascu, onde tamién se da una criminalización del nacionalismu en xeneral ya iguálase nacionalismu y violencia, y, d’otru, la mocedá ta un tanto criminalizao yá de por sí, col asuntu les drogues, les pastilles, la violencia nes discoteques, los grupos ultras fuboleros, el botellón. Y lluéu tamién ta esi grupu organizáu que vive nun conceyu rural ayenu a lo que pasa nes ciudaes o nes villes industriales y que s’espavoria delantre estes noticies. Puén llegar a pensar, dende Bual o Cabrales, pongo por casu, que igual los sos collacios de Llangréu o d’Avilés faen eses coses. Sumando tóo esto, consíguese frenar un tanto’l xorrecimientu.

E.: Tamién hebo nel pasáu episodios d’esti tipu nel que taben implicaos militantes d’otres organizaciones.

R.: Claro, pero d’eso naide paez alcordase. Vera o Barrionuevo fueron a la cárcele por terrorismu y delitos económicos, y yeren altos cargos d’un gobiernu’l PSOE; un dirixente d’esti mesmu partíu andaba en rellación con islamistes implicaos na matanza de Madrid; un afiliáu a Izquierda Unida puso petardos nun me recuerdo agora onde; xente d’IU, del PSOE y d’otres organizaciones asaltaran la catedral na misa d’Adefonsu II; Roldán o Urralburu, delincuentes económicos a gran escala, yeren del PSOE. Claro, tóo ye pura estadística. N’Andecha naide puede prevaricar dende un gobiernu nin quedase coles perres de la contratación d’una autovía, lo mesmo que un guardia municipal nun pué falsificar les actes de la selectividá. Si una persona d’estrema esquierda pon un petardu y la detienen, ye normal que descubran que tuvo afiliáu a dalgún sitiu que seguramente nun ye’l PP. Eso ensín cuntar que la inmensa mayoría de los violadores, pederastas, maltratadores y estafadores son católicos o, polo menos, tan afiliaos dende pequeños a la ilesia católica. La probabilidá de que un nacionalista, violentu o pacíficu, toviere un día afiliáu al PAS o a Andecha ye alta, pero ye baxa la probabilidá de que toviere afiliáu al sindicatu’l metal de Detroit. Y tamién ye alta la probabilidá de que un profesor de la Sorbona seya francés y mui baxa la probabilidá de que un toreru seya de Bimenes.

E.: De toles formes, lo cierto ye qu’eses aiciones violentes perxudiquen al nacionalismu en xeneral y a Andecha Astur en particular.

R.: Evidentemente. La criminalización del nacionalismu ye sinónimu de criminalización d’Andecha. Más nada nun esiste nesi ámbetu. Si daquién duldia de quién trabaya nesti campu pué despexar esa duldia adicando pa estes coses. Dengún gobiernu pierde’l tiempu acosando a organizaciones que nun esisten. Pero ye que, amái, pola nuesa defensa de les llibertaes ponémosmos otra vuelta nel puntu mira, porque puén dicir: “¿ves, ves como sofiten les aiciones violentes?”. Y lo que tamos ye acoricando los drechos humanos qu’entendemos conculcaos por determinaes lleis y determinaos procedimientos xudiciales. El miéu a que te confundan ye tan evidente que toi seguru que si lo que ta pasando agora equí pasara nel Kurdistán, veríamos a otres organizaciones pretendidamente d’esquierdes glayando peles cais d’Asturies. Pero carecen una patolóxica llerza a contaminase con asuntos que tienen mui poco glamour.

E.: ¿Qué pasaría si estos sucesos se repitieran y tovieran detrás d’ellos militantes nacionalistes?.

R.: ¿Qué quier qué-y diga?. A mí gustaríame qu’eso nun pasare. Pero si pasa tendremos que aguantamos. Si detrás d’esti tipu d’aiciones hai dalguien que se considera nacionalista, debería pensar nes consecuencies que prevoca. Les primeres y más graves pa la propia persona si la garren, anque esto tendralo yá asumío, pero otres pal movimientu en xeneral. Ya otra cosa que-y diría a esi hipotéticu collaciu ye que, si ta afiliáu a dalguna organización como Andecha y quier caminar per otres estratexes, que dexe la organización y que marche al so aire o funde otru grupu con otros obxetivos. Paezme qu’eso ye lo cabal y lo responsable.