Refuga los intentos de criminalización d'Andecha Astur y apunta al delegáu del gobiernu español comu responsable de los mesmos

15/09/05 Énte lo que paez ser l’aplicación de la llexislación antiterrorista a Fernan González Rodríquez, lo que lu caltién nuna situación d’indefensión dafechu inxustificable nun estáu de drechu, Andecha Astur desixe l’imediatu restablecimientu de les garantíes democrátiques al mesmu, énte lo que considera una situación dafechamente anormal y desproporcionada.

Andecha Astur quier recordar que Fernan González Rodríguez ye presona apreciada y respetada pol so conocíu compromisu social y qu’a lo llargo la so vida tien formao parte del colleutivu d’insumisos asturianos (llegando a carecer prisión pola so coherencia comu insumisu) de sindicatos comu la CSI y d’organizaciones comu’l FUSOA, siendo miembru d’Andecha Astur hai años, pudiendo afirmar que demientres el tiempu que voluntariamente caltuvo la so militancia con nós, siempres destacó pol so nivel de compromisu y pola so calidá humana, coincidiendo nestos años caberos col mesmu n’estremaes movilizaciones, siempres en defensa d’Asturies y el Pueblu Trabayador Asturianu.

Esta rialdá, la militancia temporal n’Andecha Astur, permitió que dende estremaos medios de comunicación se tea faciendo por criminalizar a la nuesa organización, daqué inxustificable dafechu teniendo en cuenta cuala ye la nuesa trayeutoria político y el nuesu reiteráu ya inequívocu posicionamientu en defensa de la vía político comu mediu pa solucionar los conflictos.

Tan absurdo mos abulten los intentes de criminalización a los que se mos pretende someter que namás atopamos desplicación na peculiar zuna del actual Delegáu del gobiernu español n’Asturies (Antonio Trevín) a la escontra de tolo que suene asturiano y d’izquierda, lo qu’al traviés del tiempu derivara n’estremaos enfrentamientos con Andecha Astur.

Nunos intres nos qu’Antonio Trevín el pasáu 8 setiembre desautorizó un manifestamientu por ser solicitáu en llingua asturiana, permite actos facistes apoloxéticos de la dictadura, reprime violentamente la rempuesta social a talu actu facista, rializando inclusu detenciones y nun pon el mínimu enfotu en resolver les recientes denuncies por agresiones facistes a militantes d’organizaciones d’izquierda: el delegáu del gobiernu español n’Asturies descuelgase con esta detención, qu’entendemos arbitraria y que namás contribúi a alteriar inecesaramente’l clima social n’Asturies.

En Xixón a 15 de setiembre de 2005

Xunta Executiva d’Andecha Astur