La primera pallabra que vos quiero decir ye gracies. Gracies pol vuesu sofitu y la vuesa solidaridá. Dende´l día que salí de la cárcele, voi decatándome pasu ente pasu de tol trabayu, toles aiciones y tol movimientu entamáu pa denunciar la mio situación.

N´Asturies yera dalgo normal, pero cuandu esta solidaridá aporta dende mil kilómetros de distancia, comu ye´l vuesu casu, ye dalgo que m´abluca y que m´enllena d´orguyu.

Amás, sé que nun ye fácil solidarizase con una persona comu yo, criminalizá y acusá de terrorista, porque esti delitu pué llegar a chiscar a la xente que, comu vosotres y vosotros, me sofita. Por tou esto, el mio agradecimientu ye doble.

Anguaño alcuéntrome dende´l 23 d´Avientu en llibertá provisional, dempués de pagar una fianza de diez mil euros. Anque enrriba mín caltengo la llei antiterrorista que m´acusa d´un delitu de tenencia d´artefautos esplosivos y otru de terrorismu, comu presuntu autor de diecinueve atentaos. Asina mesmo, dempués de cuatru meses, el sumariu sigue siendo secretu, ensin que podamos tener accesu al mesmu pa poder entamar la defensa.

Asina y too, quiero decivos que la mio llibertá nun la mercaron diez mil euros, la mio llibertá algamásteisla toes y toos vosotros cola vuesa llucha.

Tamién aprofito pa decivos que nun tengáis mieu a lluchar. La llercia tiénenla ellos y fain usu d´esta llei antiterrorista pa intimidar a toes y toos los que nun tamos d´alcuerdu col sistema que nos imponen y que nos atrevemos a enfrentanos a ellos.

Atrevése a lluchar ye atrevése a vencer.
Enxamás escaeceré la vuesa solidaridá.

Korneyá, a día cincu de xineru de dos mil seis.