Fai! asítiase a la escontra del modelu enerxéticu y social de la FSA en collaboración con IU-BpA-LV, cola instalación de cientos de molinos xeneradores llétricos nel suroccidente asturianu; un modelu nel que namás ganen les concesionaries, onde se multipliquen los escedentes enerxéticos, que nun xenera trabayu y qu'hipoteca'l futuru ambiental y social del país.

Yá mos quedó bien nidio'l futuru que Tini Areces y la FSA quieren pa les sierres y conceyos del occidente asturianu: un finxu atestayáu d'ocalitos y molinos de vientu. O eso ye lo qu'atalantamos tres de saber en setiembre que'l Gobiernu del "Principado" va alxudicar llicencies pa construyir 40 parques eólicos (toos ellos nel occidente) so los 13 yá esistentes. Pero lo más grave ye qu'ún de los parques eólicos tien l'envís d'instalase nes sierres de Carondio y Valledor (Ayande), qu'anque nun son un "paisaxe protexíu" como falsamente apruz nos boletines turísticos, sí consta como una zona "d'esclusión" nel propiu decretu 42/2008 pel que s'apreben les Directrices Sectoriales d'Ordenación del Territoriu, precisamente pal aprovecimientu eólico.

La instalación de los molinos (25 aeroxeneradores de 60m caún) conllevaría la construcción de nueves pistes y llinies d'alta tensión que pondríen en pelligru munches de les 34 xaceés tumbalares (ente elles la d'A Llastra da Filadoira), asina como les del campamentu román de Moyapán y del camín de Santiago primitivu, conocíu equí como La Carreiriega de los Gallegos (arriendes de la turística Braña d'El Campel).

Los argumentos del Gobiernu son qu'estos parques son necesarios p'acelerar el cambéu de modelu enerxéticu y pa que los conceyos del occidente algamen la so autofinanciación. Entós ¿Por qué siguen en marcha más proyeutos de centrales de ciclu combináu nel nuesu país? ¿Cuálu ye'l reclamu turísticu y poro fonte de finanzación d'estos conceyos, el so padremuñu arqueolóxico-paisaxísticu o los parques eólicos y los tendíos llétricos? ¿Ú'l beneficiu p'asturianes y asturianos con esti modelu que nin xenera trabayu y multiplica l'escedente d'enerxía llétrico deficitariamente esportao?

Dende Fai! vemos con esmolición que'l gobiernu d'Areces solo s'alcuerde del occidente d'Asturies pa escalalo y estrozalo ambiental y demográficamente. Poro y en virtú d'estos fechos manifestamos lo que vien darréu:

- Desiximos la paralización de los proyeutos de los mentaos parques eólicos.
- Ufrimos nuesu firme sofitu al manifiestu del Colectivu Ciudadanu pola Conservación de Carondio.
- Encamentamos a les asturianes y asturianos a collaborar na recoyida de firmes escontra esti proyeutu (http://petitions.tigweb.org/SOScarondio)
- Reclamamos la declaración de les sierres de Carondio y Valledor como "paisaxe protexíu" pa garantir la so afayadiza conservación.
- Demandamos más atención de les Intituciones pa col occidente asturianu en materia económica, pero non en cuenta de desaniciar el nuesu padremuñu ambiental y cultural.


¡NON a los parques eólicos!
¡NON al desaniciu de la nuesa tierra!