Váste verbeando ascode la xíriga como cuando contabes la historia d'aquel ñurriu que aparaba las travínculas eszarrapiadas. Váste dempués del deber cumplíu, dempués de buscar los ramos, acompañar la joguera, tocar la misa, facer la procesión y regalanos a todos un Pericote, de los tuyos. Dicen los de Llanes: «Pericotes báilenlos munchos, pero como aquel de Nino el de Pancar...»
Dende agora vamos oyir en San Roque, n' Andrín, en Balmori, en Porrúa y nel Puente la Villa: «Pericotes tóquenlos munchos, pero como aquél de Ignaciu el de San Roque...».
Váste y váse un amigu, un rapaz mozu d' ochenta y cinco años, un collaciu queríu que non escatimó enxamás cariñu, respetu y autenticidá. Porque, los que te queremos, sabémoslo bien; fuisti siempre un paisano auténticu. D' esos que ponderen namás que lo xustu; d´esos pa los que decir «nun ta mal del todo» ye afalagar enforma. D' esos que faense querer entre mozos y vieyos como se quier a ún de los mayores de la propia familia.
Váste serenu, tranquilu, queríu y cuidáu por Manolín el de Poo, por los tos sobrinos, Belén, Ángel y Javi, arrodiáu polos tuyos como se van los paisanos buenos. Zancañeru Ignaciu, el Gaiteru de San Roque. Adiós, hasta siempre.