Index | Miscelánea
Actualidad
MISCELÁNEA

Sahara

 

 


Premiu de la paz pa Putin pola guerra en Chechenia

Edward Wong, The New York Times

El comité chinu que otorgó'l Premiu Confucio de la Paz d'esti añu nun s'andó con rodeos a la hora d'afalagar al ganador, Vladimir V. Putin, primer ministru de Rusia. Tolo contrario, eloxó la so decisión d'embarcase na guerra en Chechenia en 1999.

Conceyu Asturianu de Solidaridá con Chechenia

Kadirov y cia

El comité chinu que otorgó'l Premiu Confucio de la Paz d'esti añu nun s'andó con rodeos a la hora d'afalagar al ganador, Vladimir V. Putin, primer ministru de Rusia. Tolo contrario, eloxó la so decisión d'embarcase na guerra en Chechenia en 1999.

“La mano de fierru y la dureza que reveló nesta guerra impresionó a los rusos enormemente, y tresmitió la so capacidá de conferir seguridá y estabilidá a Rusia,” reza una versión inglesa de la declaración del comité. “Convirtióse nel antiterrorista nº 1 y l'héroe nacional”.

Y nun sólo eso, aplaudiólu por “actuar como'l propagandista de los acontecimientos políticos del so momentu” mientres tovía taba na escuela secundaria, y por ser seleccionáu pa entrar na KGB mientres taba en bachilleratu, “lo cual convirtió en realidá'l so sueñu adolescente d'entrar na KGB”. Muncho más tarde llegó la “campaña militar a gran escala contra les fuerces armaes illegales en Grozni, Chechenia.”

Asina ye como arrancó l'anunciu por parte de 16 eruditos patriotes, otorgando lo que nomen como'l so segundu premiu de la paz añal y “base”. Cuatro miembros del grupu, el Centru Chinu Internacional d'Estudios de la Paz, cellebró una conferencia informativa'l domingu nel Fragrant Hills Park al oeste de Pekín, pero curiosamente hebio poca repercusión sobre'l premiu nos medios de comunicación chinos. Darréu, el martes corrió la voz al traviés de Twitter de que quien s'involucrara en guerres en Chechenia y en Xeorxa, ganara'l premiu, el cual tamién estuviera metíu n'intrigues polítiques nos últimos meses.

“Eses guerres fueron xustificaes”, dixo nuna entrevista telefónica Qiao Damo, quien se describe como cofundador y presidente del comité del Premiu Confucio de la Paz. “El Sr. Putin lluchó pola unificación del so país.”

De fechu, numberoses organizaciones de derechos humanos alcontraron que la campaña en Chechenia llevó a un tropel d'abusos de los derechos humanos por parte de les fuerces de seguridá ruses y de les fuerces chechenes pro-ruses, incluyendo violaciones, tortures y asesinatos.

El Sr. Qiao tamién dixo que'l comité, que votó a favor del Sr. Putin ente ocho nominaos, valoró la so oposición a la guerra. “Él tuvo a la escontra de que la OTAN bombardeare Libia”, manifestó'l Sr. Qiao.

El premiu diose por primer vegada l'añu pasáu como una contestación a la decisión del comité del Premiu Nobel de conceder el Premiu de la Paz a Liu Xiaobo, un escritor disidente encarceláu. El Sr. Qiao dixo que la ceremonia d'esti añu va cellebrase'l 9 d'avientu y que los organizadores esperaben dar una estatuina dorada de Confucio, el sabiu chinu, al Sr. Putin, amás d'un certificáu. L'anunciu del premiu nun mencionó dengún premiu económicu.

Cuando foi contactáu por periodistes estranxeros, el ganador del añu pasáu, Lien Chan, un políticu taiwanés, dixo que nunca oyera falar del premiu. Nun se presentó a la ceremonia, anque'l premiu s'acompañaba del equivalente a 15.000 dólares en metálicu. En cambiu, una moza ensin relación col Sr. Lien aceptó una estatuina y un faxu billetes.

Amás del Sr. Putin, los candidatos pal Premiu Confucio de la Paz d'esti añu incluyíen a Bill Gates, el fundador de Microsoft; Ángela Merkel, canciller d'Alemania; Jacob Zuma, Presidente de Sudáfrica; Kofi Annan, l'antiguu secretariu xeneral de les Naciones Xuníes; Yuan Longping, un científicu chinu; Soong Chu-yu, un políticu taiwanés y un mozu tibetanu nomáu'l Panchen Lama por parte de les autoridaes chines dempués de que se produxere'l raptu d'un candidatu apoyáu pol exiliáu Dalai Lama.

El Sr. Putin recibió nueve de los 16 votos emitíos, el Sr. Yuan seis y la Sra. Merkel unu, contó'l Sr. Qiao.

Ente los 16 miembros del comité votante taba Kong Qingdong, un profesor de lliteratura china de la Universidá de Pekín, quien alardeó ampliamente de tar na septuaxésimotercer xeneración del llinaxe de Confucio. El Sr. Kong tamién ye famosu por insultar a un periodista chinu'l 7 de payares, lo cual provocó que Xinhua, l'axencia estatal de noticies, y los estudiantes de la Universidá de Pekín desixeren el so cese.