Quién protexe a quién en Chechenia

Mairbek Vachagáev, especial pa Caucas News

Ye poco probable qu'esistan númberos exactos sobre les fuercies militares y de seguridá qu'operen anguañu en Chechenia, yá que siempre foi ún de los munchos secretos de la presencia militar rusa na república.

http://asturieschechenia.nireblog.com
Traducción: Pachín de Melás

En 1858, el nueu comandante del exércitu ruso nel Cáucasu, el príncipe Bariatinski, tomó la decisión de someter Chechenia d'una vez por toes, utilizando tolos medios al so alcance. P'algamalo, unvió a Chechenia un continxente de 113 mil soldaos que diben enfrentase a los 98 mil chechenos supervivientes. Ensin esta superioridá numérica, l'exércitu rusu nun podría acabar con una llarga resistencia de los pueblos del Cáucasu Noreste, que llevaben oponiéndose a los rusos dende mediaos del sieglu XVIII. Sometía Chechenia, la suerte taba echada: Daguestán cayó cuatro meses dempués y la rexón noroccidental del Cáucasu foi conquistada en tres años.
P'asegurar la so presencia en Chechenia, los rusos fundaron una decena d'aldees cosaques y delles places fortificaes na parte montañosa de la rexón. Eses fortaleces esistieron mientres mediu sieglu. Tou esti tiempu, los sos habitantes vivieron en contínuu estáu de sitiu, hasta que'l nueu gobernador del Cáucasu Vorontsov-Dashkov, decidió salvar a los soldaos supervivientes rusos, zarrando toles fortaleces militares nes montañes chechenes.
Dende aquella, pa mantener la paz na rexón, un importante continxente militar siempre tuvo presente nel Cáucasu. Enantes de la revolución de 1917, yéra la 21ª división d'infantería con cuartel xeneral en Vladikavkaz, ayudada por bien d'unidaes militares cosaques. Dempués del establecimientu del réximen soviéticu, tropes d'infantería motorizada fueron desplegaes na rexón. Dalgunes unidaes estableciéronse na propia Chechenia, por exemplu un reximientu blindáu na ciudá de Shali, que sigue ehí hasta güei, un reximientu na parte montañosa de la república cerca'l pueblu de Borzoi, que tamién sigue ehí, amás de dalgunes unidaes en Vedeno, la rexón de Nozhai-Yurt y na redolada de Grozni. De mou que tanto mientres la Rusia de los zares, como na Unión Soviética, la rexón del Cáucasu Norte recibía una atención especial, yá que toos yéren consientes del eternu rechazu que sintía la población llocal hacia la presencia rusa. L'únicu cambiu qu'introduxo el réximen soviéticu, foi fortificar la base militar de Mozdok (n'Osetia del Norte, na intersección ente Chechenia, Ingushetia, Kabardino-Balkaria, Osetia y la rexón de Stavropol) como base principal en sustitución de la base de Khankala en Grozni.
Nun ye d'estrañar pues que, al empezar el conflictu armáu en Chechenia, les fuercies militares que fueron desplegaes na república, tuvieren preparaes pa esti tipu d'acontecimientos.
Cuando, en marzu de 2010, Ramzán Kadyrov s'opuso a la reducción de los efectivos de la policía chechena, proponiendo, a cambiu, disminuir o eliminar del too l'unvíu d'unidaes provisionales dende otros puntos de Rusia, partía d'una actitú personal de rechazu hacia les numeroses fuercies militares coles qu'había que llidiar y negociar a diario.
Y ye que l'exércitu rusu ye una especie de monstruu de delles cabeces ensin un únicu centru de mandu que coordine los sos movimientos. Mientres les actividaes armaes intenses nel territoriu de la república, a prmeros de los años 2000, los guerrilleros chechenos sabíen perfectamente que, si atacaben un puestu de control del exércitu, podíen cuntar con que nun diba haber nin un sólu disparu en sofitu a los militares pola parte de los servicios de seguridá o la policía, cuyos puestos de control s'atopaben a escasos metros de distancia. Esto ocurría porque nun había dengún tipu de comunicación ente los puestos de control pertenecientes a diferentes ministerios: el FSB (servicios de seguridá), el Ministeriu del Interior y el Ministeriu de Defensa. Pa ponese en contactu colos que s'atopaben a unos metros de distancia, necesitaben llamar primero a les bases centrales de Khankala o Mozdok. El monstruu qu'espardió los sos tentáculos per tol mundu, nun supo establecer una comunicación ente les sos diferentes unidaes, en tol tiempu que pasó dende la primer campaña militar en Chechenia de 1994-1996. Los guerrilleros siempre aprovecharon esta descoordinación nes sos incursiones.
Ésta ye la razón pola que les autoridaes prorruses, representaes na persona de Ramzán Kadyrov, teníen interés en reducir el númberu de militares rusos na república y zarrar los numerosos puestos de control que, al igual que les fortaleces de la Rusia de los zares, nun yéren más que puntos defensivos pa escondese de los ataques de la guerrilla.
Pa los servicios de seguridá y l'exércitu, les nueves fuercies de seguridá creaes poles autoridaes prorruses, representen de fechu la llegalización de los antiguos guerrilleros rebeldes, contra los que tuvieron lluchando. Los kadyrovtsy tampoco sienten confianza hacia l'exércitu y el FSB, y nun los consideren como aliaos na confrontación cola guerrilla.
Esti rechazu mutuu desemboca a vegaes en conflictos abiertos. Puede vese en Youtube una serie de videos nos qu'un grupu de kadyrovtsy maltraten lliteralmente a unos militares rusos y miembros de Spetsnaz, humillándolos y denguneándolos.
Les tropes federales ruses, si nun son consideraes enemigu directu polos kadyrovtsy (anque a vegaes paez que sí hai una clara enemistá), en dengún casu son vistes como fuercies amigues. Tratar con elles nun ye más qu'una necesidá temporal pa los chechenos que se ven obligaos a combatir baxo bandera rusa.
Ye poco probable qu'esistan númberos exactos sobre les fuercies militares y de seguridá qu'operen anguañu en Chechenia, yá que siempre foi ún de los munchos secretos de la presencia militar rusa na república.
Falando pa los informativos d'un canal de televisión chechenu, Ramzán Kadyrov mencionó'l datu de 29 mil policíes chechenos, ye dicir fuercies dependientes del Ministeriu del Interior chechenu.
Ye necesario destacar que les fuercies federales cuenten con cuatro batallones compuestos por chechenos étnicos (dos d'ellos pertenecen al Ministeriu del Interior y dos, al Ministeriu de Defensa). Estos batallones empléense activamente en toles operaciones policiales contra la guerrilla en tol territoriu de la república, polo que representen una fuercia adicional del Ministeriu de Defensa rusu y del Ministeriu del Interior (tropes del interior subordinaes al Ministru del Interior). Esto fáese col oxetivu de dispersar les numeroses fuercies a les órdenes de les autoridaes chechenes prorruses. Anque pa les autoridaes chechenes nun esiste una gran diferencia en cuantes a la subordinación de dichos batallones.
Namás disponemos d'estadístiques relatives al batallón Sever (Norte) que pertenez oficialmente a les fuercies del Interior, cuyos efectivos ascienden a 1200 persones. Si suponemos que los cuatro batallones tienen más o menos el mesmu númberu d'efectivos, falaríemos de 4800 persones baxo bandera federal rusa.
- La 46ª brigada del Ministeriu del Interior con 10000 efectivos (esisten planes de la so ampliación hasta 15 000 efectivos).
- La 42ª división d'infantería motorizada perteneciente al Ministeriu de Defensa algama 15000 efectivos. En febreru de 2006, l'entós llíder prorrusu Alu Aljánov dixo que l'agrupación militar federal, en base a sólo dos brigaes, cuntaba ente 36 y 38 mil militares, y nun hai razón denguna pa poner en dulda esti datu.
- La guardia fronteriza, que pertenez al Serviciu Federal de Seguridá, y tá permanentemente desplegada en Chechenia, tá compuesta por 3000 efectivos.
D'esti mou, llegamos a la cifra de 74800 militares desplegaos na república. Pero hemos tener en cuenta que namás podemos contabilizar una parte de tolos efectivos, yá que los datos sobre les unidaes provisionales unviaes a Chechenia dende toa Rusia, permanecen secretos. Cuando dicimos «de toa Rusia», hai que lo entender lliteralmente: cada seis meses toles rexones del país, ensin escepción, han formar unes unidaes de policía (OMON, Spetsnaz, etc.) que van ser unviaes a Chechenia. Dende hai once años, lleguen a Chechenia unidaes dende Murmansk nel norte de Rusia, o dende Jabárovsk y Najodka, nel Estremu oriente.
Nun son iguales en cuantes al númberu d'efectivos, pero podemos facenos una idea, yá que les unidaes salen nun sólo de les rexones, sinon tamién de dalgunes ciudaes grandes. Por exemplu, Tatarstán unvía una unidá dende Kazán, la capital, pero tamién dende Naberezhnye Chelny, que ye una de les ciudaes más importantes. Si cuntamos que les unidaes suelen componese d'un promediu de 50 militares (normalmente ente 40 y 60), tenemos 4 000 efectivos más na estructura del Ministeriu del Interior rusu. Cada seis meses, los efectivos de les unidaes provisionales remplácense por fuercies nueves de la mesma rexón. Nos informativos, davezu sintimos falar d'un gobernador o xefe de l'alministración rexonal que va visitar les sos tropes desplegaes en Chechenia.
Tampoco nun tenemos datos relativos a les unidaes de seguridá ciudadana, que tamién tán armaes y pueden ser utilizaes poles autoridaes rexonales en casu d'emergencia. Trataríase de dellos miles de policíes.
Deberíemos sumar tamién les unidaes de protección qu'incluyen la seguridá de tolos ministros del gobiernu prorrusu, de tolos imanes y cadíes y, por supuesto, del propiu muftí, y de tolos xefes d'alministraciones llocales.
El total elévase agora a 80000 persones, pero'l númberu paéznos rebaxáu, yá que ye poco probable que les cifras reales que manexa l'exércitu, coincidan colos datos qu'apaecen na prensa.
Podemos suponer, por embargu, que la situación actual en Chechenia nun permite reducir los efectivos militares a los niveles almisibles en tiempos de paz.
Nun hemos olvidar les unidaes desplegaes a lo llargo les fronteres chechenes, que garanticen l'actividá normal de les tropes y unidaes que tán nel interior de la república.
D'esta manera, el númberu total del continxente militar rusu afitáu nun territoriu d'apenes 15 mil kilómetros cuadraos, permite, en gran midía, frenar l'actividá de la guerrilla en Chechenia, pero ye claramente insuficiente pa neutralizala del too.
Podríemos describir la situación actual en Chechenia parafraseando a los clásicos: «les clases altes quieren pero nun pueden, les clases baxes tamién quieren pero tampoco nun pueden». Por agora nun se ve denguna solución, ésta va perfilase seguramente nun futuru prósimu.

Fonte orixinal:
http://asturieschechenia.nireblog.com/post/2011/09/24/quien-protexe-a-quien-en-chechenia