Chechenos n'Europa y el futuru del conflictu chechenu

Murad Batal Al-Shishani, llicenciáu en Ciencies Polítiques especializáu en movimientos islámicos n'Oriente Mediu y el Cáucasu Norte

El númberu de refuxaos chechenos rexistraos na Unión Europea en 2006 taba estimáu nunes 37.000 persones en dellos Estaos como Austria, Francia, Bélxica, Noruega, Polonia y la República Checa. El mayor númberu de refuxaos taba n'Austria, con unos 10.000.

Astur Chechen, domingu, 26 d’Avientu, 2010
Traducción: Milio Robles Muñíz, Pachin de Melás

El pasáu 9 de payares el web Kavkaz-Center posteó un videu tituláu “Carta de los chechenos exiliaos a los organizadores de les prebes a los muyahidines”, nel que salía xente ensin identificar, uno de los cualos falaba en chechenu. Esti home llanzó un mensaxe en rellación a la reciente dixebra ente los rebeldes chechenos y la renuncia fecha por dellos llíderes rebeldes en Chechenia a los xuramentos de fidelidá a Doku Umarov llíder rebelde del Cáucasu Norte. Esti videu tá siendo interpretáu como una señal de que los chechenos exiliaos alineáronse con Umarov y la facción yihadista opuesta a la facción nacional nel reciente dixebra ente los dos bandos mencionaos. Por embargu, la yá tradicional influencia sobre'l conflictu pela parte de los chechenos asentaos n'Europa ye probable qu'asuma un camín diferente.

Antecedentes

El mensaxe asoleyáu'l 9 de payares critica a los cabezaleros de la facción nacional, al considerar que lo qu'éstos ficieron ye “una cosa pergrave y un gran pecáu”. El mensaxe cuestiona l'argumentu de que “Occidente y los países árabes van ayudanos a consiguir la victoria si abandonamos a Doku”, y afirma que “anque esto pase... esos infieles ya hipócrites nunca nun van ayudar a los muyahidines si nun ye en beneficiu propiu. Cuando los musulmanes entamaron a afitar la Sharia n'Afganistán, estos infieles, hipócrites y apóstates aconceyáronse y mantuviéronse contra los musulmanes. Nun necesitamos estaos democráticos a les órdenes de la OTAN y otros infieles como en Kosovo y Bosnia. Vamos afitar la Sharia, porque ye'l deséu de Dios”.

El conflictu ruso-checheno ye un conflictu armáu de llarga duración en tolos sos términos; dio llugar a tres grandes movimientos migratorios chechenos, el primeru d'ellos nel sieglu XIX. Al acabar les guerres del Iman Shamil (1797-1871) y de Murid (1834-1861), los chechenos migraron a lo que d'aquella yéra l'Imperiu Otomanu y quedaron nel territoriu de lo qu'anguañu ye Turquía, Xordania, Siria ya Iraq. Los chechenos viven güei nesos países como ciudadanos, y preserven la so propia identidá nacional (llingua, vezos, tradiciones, etc...) relativamente bien.

La segunda fola de migración tá venceyada a la deportación del pueblu chechenu, ente otros, pol llíder soviéticu Iosif Stalin, quien acusó a los chechenos de collaborar colos nazis en 1944. La memoria d'esta deportación sigue siendo ún de los componentes fundamentales de la llucha pola independencia del movimientu nacional chechenu. La mayoría d'aquellos desplazaos volvió a Chechenia nos primeros años sesenta, anque munches families tovía continúen n'Asia Central y el Cáucasu.

La tercer fola de migración tá venceyada al españíu de les dos guerres recientes, en 1994 y 1999. Dempués de ca una de les dos guerres, hebio movimientos migratorios dende Chechenia hasta Estaos vecinos dientro la Federación rusa, a Oriente Mediu y a la Unión Europea. Ésta última recibió'l mayor númberu de piticiones d'asilu humanitariu.

La mayoría de los migrantes chechenos d'esta “tercer fola” que colaron a la UE llegaron dempués del entamu de la segunda guerra, mientres que la mayoría de los que lo ficieron al entamu de la primer guerra emigraron a países d'Oriente Mediu, como Xordania y Turquía.

Fechos

El númberu de refuxaos chechenos rexistraos na Unión Europea en 2006 taba estimáu nunes 37.000 persones en dellos Estaos como Austria, Francia, Bélxica, Noruega, Polonia y la República Checa. El mayor númberu de refuxaos taba n'Austria, con unos 10.000. Detrás d'esti país taben Polonia y Francia, con unos 6.000 refuxaos caún, Bélxica con 5.500 y Noruega con 3.000. Les cifres reales son muncho mayores que les oficiales, yá qu'éstes tienen en cuenta namás a aquelles persones que solicitaron l'asilu políticu. Amás, dalunos Estaos de la UE, como Bélxica y Francia, recibieron dos foles migratories dende Chechenia: dempués de la primer guerra ente 1994 y 1997 y dempués de 2002. Estes cifres refiérense namás a la segunda migración. El númberu de chechenos que solicitaron asilu n'Austria creció un 70% ente 2003 y 2007, con unes 2.000 solicitudes añales. Amás, la naturaleza tribal de la sociedá chechena xugó un papel importante na creación d'una rede destinada a apurrir a les persones llegaes de Chechenia la posibilidá de reunise colos sos familiares, especialmente con aquelles persones que tienen miéu a quedar en Chechenia si los familiares tán venceyaos, d'una u otra manera, col movimientu independentista chechenu o l'Emiratu Caucásicu.

Sigún Martin Hoffman y David Reichel, la “rempuesta positiva”, o el porcentaxe d'aceptación d'estes solicitudes, foi de 9 de cada 10 en 2006, lo que sinifica un númberu curiosu de chechenos que s'allugaron n'Europa y crearon una Diáspora de comunidaes que son rellativamente asemeyaes en tamañu, sinon mayores, qu'aquelles d'Oriente Mediu. Los chechenos que migraron a Oriente Mediu na “primer fola” de migración chechena, tuvieron siempre consideraos como una extensión de los chechenos na so patria. Les rellaciones ente los exilaos y los chechenos nativos rexurdieron col colapsu de la Unión Soviética. Les visites mutues y la comunicación ente familiares crecieron. Esta rellación única xugó un importante papel durante la primer guerra en Chechenia. Los chechenos d'Oriente Mediu apurrieron ayuda humanitaria a los sos familiares y defenderon la causa'l llevamientu chechenu nos medios llocales. Estes rellaciones permitieron tamién el movimientu d'idees, especialmente nuna época na que dalgunos llíderes del movimientu independetista chechenu redirixeron la república hacia los círculos islámicos, creando aliances con islamistes llocales envede coles élites soviétiques ya incrementando les visites al mundu musulmán internacional. Yá d'aquella, especialmente durante la segunda guerra chechena en 1999, los conceptos de yihad, califatu, Estáu islámiu, etc... yéren mui comunes en Chechenia. El creciente númberu de chechenos na UE ye probable que xuegue un papel asemeyáu nel prolongáu conflictu ruso-chechenu.

Conclusiones

Obviamente, el fluxu d'idees que pudiere alimentar el conflictu ruso-chechenu diba ser diferente d'aquel que xurdió d'Oriente Mediu nos años 90, dalgunes de les cuales tán expresaes nel mencionáu videu. La mayor proporción de refuxaos chechenos na UE tá afitándose, lo que sinifica que la xeneración más mozo de refuxaos chechenos tá afayándose coles sociedaes nes que s'alluguen n'Europa y n'Occidente en xeneral, menos dalgunos casos d'extradiciones y ocasionales casos de xenofobia. Al mesmu tiempu, por embargu, siguen conectaos cola so patria y la so identidá nacional, bien al traviés de les comunidaes de la diáspora a les que pertenecen, bien al traviés d'internet.

Nesti contextu, pue esperase que la próxima xeneración de chechenos, que va crecer n'Europa y va tener accesu a unes meyores oportunidaes educatives, vaiga asimilar la cultura política europea, que tá asociada a ciertos conceptos como democracia, drechos humanos, nación-Estáu, tresparencia, responsabilidá, etc... Con conceptos como éstos, esta xeneración influirá nel llargu conflictu en Chechenia nes próximes décades, yá que los raigaños d'esti conflictu siguen vixentes, la violencia diaria continúa, y continúa'l riesgu d'una escalada de violencia.

Murad Batal Al-Shishani, llicenciáu en Ciencies Polítiques especializáu en movimientos islámicos n'Oriente Mediu y el Cáucasu Norte. Ye autor del llibru “El movimientu islámicu en Chechenia y el confictu rusu-chechenu (1999-2000)”, asoleyáu n'Amman en 2001.