Fuercies policiaques franceses persiguieron a entamos de xunetu a refuxaos chechenos ante una visita de Putin a Sarkozy

El Tribunal Européu de Drechos Humanos condergó a Rusia al pagu de 207.000 euros a les families de delles persones que fueron prindaes poles fuercies de seguridá ruses na república norcaucásica de Chechenia

Fontes llocales indicaron que la detención de los solicitantes chechenos d’asilu coincidieron cola reciente visita de Putin a Francia, durante la que Putin y Sarkozy roblaron dellos alcuerdos, ente los que podría haber dalgún rellacionáu colos refuxaos del Cáucasu

Waynakh.com, Kavkazcenter,
RIA Novosti Astur chechenia

Kavkazcenter informó, citando fontes franceses, que la seición antiterrorista de los servicios secretos franceses (DCRI) llevó a cau redaes contra refuxaos chechenos a primeres hores del llunes 5 de Xunetu na llocalidá de Le Mans. Cinco persones fueron arrestaes, tres homes y dos muyeres.

Los miembros de la Seición Antiterrorista de los Servicios Secretos franceses montaron una operación especial a primeres hores de la mañana en cuatro apartamentos de les afueres, nos barrios de Sablons y Glonnières de la llocalidá de Le Mans, y arrestaron a 5 refuxaos chechenos, 3 varones d’ente 21 y 36 años d’edá y 2 muyeres. La operación entamó pela mañana y acabó de tarde, dempués d’intensos rexistros. Los miembros del serviciu secretu incautaron documentación, teléfonos móviles y ordenadores. Les dos muyeres fueron lliberaes durante esi mesmu día, pero los trés homes siguen deteníos nos calabozos de la DCRI en Levallois-Perret, un barriu del noroeste de París.
Sigún el relatu de la esposa d’ún de los deteníos, “a primera hora de la mañana, sobre les 5:00, delles persones enmascaraes y fuertemente armaes picaron na puerte de la nuesa casa y, ensin mediar pallabra, abalanzáronse darréu encima nuestro. Atarónme les manes na espalda y tiráronme al suelu, y al mi maríu esposáronlu y lleváronlu a otra habitación. Dende esi momentu nun volví a velu nin a saber que foi d’él. Los nenos taben mui asustaos y nun mos permitieron movenos. El sentimientu de mieu y desesperación que sentí nesos momentos foi esactamente’l mesmu que tuve en Chechenia cuando mercenarios rusos asaltaron la nuesa casa. Pero yo nun imaxinaba qu’equí en Francia diba esperimentar el mesmu horror. Usaron perros durante la reedada, quitáronnos los móviles y los ordenadores y, dempués d’intensos rexistros, pela tarde lleváronnos a un sitiu desconocíu. Cuando lleguemos lleváronme a un edificiu nel que m’interrogaron hasta la nuechi. L’interrogatoriu tuvo llugar baxo los constantes glayíos de los policíes, que me menaciaron con encarcelame y deportame. Aquella mesma nuechi sacáronme d’aquel edificiu y me dixeron que colare. Díxe-yos que nun sabía ónde taba y que nun tinía perres, pero volvieron a menaciame y a dicime que colare. Devolviéronme’l móvil de la mio hermana, col que pude llamar a dellos collacios que m’ayudaron a volver pa casa. Nun sabemos ónde tán el mi esposu y otres dos persones. Hai informaciones de que tán en prisión en París y que van deportalos. Contra nós nun hai cargos, y a los abogaos nun-yos permiten ver al mi esposu nin a les otres dos persones. Nun sabemos cuálu ye’l su estáu físicu, qué-yos tán faciendo o a qué tortures ya interrogatorios-yos tán sometiendo”.

Hai informaciones tamién de que ún de los refuxaos nun taba en casa’l día de la redada, y que, al avisá-y los sos familiares d’esta redada, acudió darréu a la policía. El Departamentu de Policía de Le Mans informólu de que podríe permanecer deteníu durante 3 meses, yá que la “investigación” nun se sabe cuánto diba durar.

Fontes llocales indicaron que la detención de los solicitantes chechenos d’asilu coincidieron cola reciente visita de Putin a Francia, durante la que Putin y Sarkozy roblaron dellos alcuerdos, ente los que podría haber dalgún rellacionáu colos refuxaos del Cáucasu.

Nun se sabe nada sobre les razones de les detenciones. Tolos refuxaos deteníos permanecen nes instalaciones de la DCRI en Levallois-Perret en París, onde supuestamente van ser xulgaos por un tribunal secretu y ensin abogaos. Les autoridaes franceses un informaron sobre les acusaciones qu’hai contra los refuxaos chechenos. L’axencia de noticies Ouest-France ufrió información sobre la detención de los chechenos. Sigún l’axencia, los refuxaos chechenos tán acusaos de pertenencia a una “organización terrorista”, anque ensin especificar de qué organización falaben. Dempués de 96 hores baxo detención, los refuxaos chechenos foron presentaos énte un tribunal de París, y acusaos de pertenencia a “asociación criminal venceyada a organización terrorista”. L’axencia informó tamién de que la policía busca a al menos otra persona.

El Tribunal Européu de Drechos Humanos condergó a Rusia al pagu de 207.000 euros a les families de delles persones que fueron prindaes poles fuercies de seguridá ruses na república norcaucásica de Chechenia.
 RIA Novosti

Ataques esporádicos y enfrentamientos armaos son habituales nes repúbliques del Cáucasu Norte, onde Rusia llevó a cau dos guerres contra los independentistes en Chechenia.

Un comunicáu asoleyáu esti xueves na web del Tribunal afirma que los demandantes nel primer casu denunciaron que dos familiares suyos, Said-Selim Benyev y Aby Zhanalayev, fueron secuestraos en Setiembre de 2002.
Sigún les evidencies atopaes nel casu, delles persones armaes y enmascaraes secuestraron a los dos homes nes sus cases. Los sus familiares persiguieron a los coches onde se llevaben a los dos homes, pero tuvieron que parar cuando un soldáu salió d’un coche y dixo-yos qu’esos vehículos pertenecíen al Departamentu d’Interior del distritu chechenu d’Urus-Martan, y que los familiares podríen ser tiroteaos si continuaben la persecución de los coches oficiales.

Benyev y Zhnalayev nun volvieron a ser vistos.

Otru ciudadanu chechenu, Artur Akhmatkhanov desapaeció n’Abril de 2003. Taba de compres cola su má cuando ella se dio cuenta que tinía que dir a casa a recoyer un documentu qu’escaeciera. Al llegar a casa sintió un tirotéu nun edificiu cercanu y acercóse al llugar, onde vió que la zona taba acordonada por soldaos rusos. Dalgunos vecinos cuntáron-y dempués que vieron a Artur cerca l’edificiu y qu’un home con una bolsa plásticu sobre la tiesta foi introducíu polos soldaos nun vehículu blindáu.

El Tribunal sentenció que los demandantes apurrieron prebes consistentes sobre los secuestros, y que Rusia nun apurrió tolos documentos que-y solicitó. Añade que les tres persones desapaecíes pueden considerase como muertes como resultáu d’una operación de los soldaos rusos.

Estrasburgu cree que Rusia violó una riestra d’artículos de la Convención de Drechos Humanos, incluyíos el drechu a la vida, el drechu a nun sufrir tratu inhumanu y degradante, contra la detención illegal y el drechu a un recursu efectivu.

La decisión del Tribunal nun ye firme tovía. Baxo la Convención Europea de Drechos Humanos, Rusia y los demandantes tienen tres meses pa recurrir na Gran Cámara del Tribunal.