El gobiernu d'Areces y el omnipresente Villa nin supieron nin algamaron a sacar Asturies del pozu de la crisis resultáu de les males reconversiones (minería, ganadería, pesca...), privatizaciones, especulaciones... Les polítiques arecistes d'autovíes ensin enllaces, campañes publicitaries demagóxiques, negación de la realidá asturiana, macroproyeutos derrochistes ya innecesarios (depósitu Celles, Muselón...).

Frente nós tan los intentos del virrei Cascos por convertimos nel so cotu priváu. Mentantu la mocedá siguimos condenao a la emigración, la precariedá y la siniestralidá llaboral, el consumismu apáticu y refalfiáu; un futuru inciertu ye'l que mos espera cuando finen les prexubilaciones y los, polo xeneral, derrochaos fondos mineros. Les eleiciones retiráron-y la mayoría asolutista a Areces y dexaron perclaro la falta d'un proyeutu verdaderu p'Asturies pel llau d'Ovidio el del pepé. Queda por asumir el papel tresformador d'Izquierda Xunida-Bloque por Asturies.

Ye la hora de dar un vuelcu real a la izquierda, nun sólo no teórico sinon tamién nel día a día de les instituciones, polítiques ya inversiones, col envís d'algamar una solución a les problemátiques d'anguañu: vivienda pública, proteición al mediu ambiente, repartu por el emplegu dignu, reindustrialización sostenible, reforma'l Estatutu y competencies, oficialidá... La sociedá en conxuntu tenemos d'impulsar y garantizar esi vuelcu pa que Areces fine dafechu col so despotismu illustráu de "too pa los asturianos pero ensin los asturianos".