El futuru la llingua asturiana ta en pelligru muerte. Dempués d'una progresiva recuperación dende que finaron los tiempos de Pachu, recibió un golpe traicioneru y cobarde pola espalda de manes del Conseyeru ¿d'Educación? Javier Vallina, del Gobiernu Rexonal del pe$oe encabezáu por Tini Areces y de la FSA (Federación de Sinvergüenzas Antiasturianos). Tamién col beneplácitu del pepé y de Mercedes Fernández, delegada del Gobiernu y brazu executor de les denuncies a los ayuntamientos que declararon oficial la nuesa llingua nos sos conceyos.

Principiaron por camuda-y el nome pa que lo que se dexa de nomar nun esista y muerra, amás de tomar otres midíes que tornen la situación de la nuesa llingua venti años atrás, dempués de munches lluches y vindicaciones sociales. Entama a morrer na escuela onde ya nun sedrá voluntaria sinon optativa, quitándo-y el drechu a los nuesos neños a deprender asturianu con toles garantíes ensin discriminación. D'esti mou quedarase onde ellos quieren, n'una cosa del pasáu despreciada y nosotros quedaremos güérfanos ensin identidá cultural nin hestoria. Y asina morremos un poco toos con ella.

La so familia apenada dende Antón de Marirreguera, Xosefa Xovellanos, Teodoro Cuesta, Pepín de Pría, Pachín de Melás, Caveda y Nava. L'Academia onde se recuperó y normalizó dempués de tolos atropellos y caún de los asturianos y asturianes que quieren falar en llibertá rueguen movilizaciones nel so nome pa que esta esquela nunca llegue a facese realidá.