Radio Sele ye una emisora asturiana independiente que lleva trabayando dende 1986 pol caltenimientu de la llingua asturiana y la difusión de la nuesa cultura. Ye l'únicu mediu qu'anguañu tenemos los asturianos y les asturianes pa escuchar la nuesa llingua nes ondes y una de les ferramientes más importantes pa favorecer la normalización social del nuesu idioma.

El proyeutu de Radio Sele presentóse a un concursu públicu convocáu pol Gobiernu asturianu nel añu 1999 pa la concesión de diez llicencies nueves de radio comercial y l'equipu de valoración del concursu dio-y la meyor puntuación, algamando asina una concesión pa emitir con calter comercial nel 97.9 de la F.M. Pero pocos meses dempués tomó posesión el gobiernu d'Areces y ésti aceutó a trámite'l recursu d'un particular, mui vinculau al P$OE, qu'aspiraba a cuatro emisores na zona central d'Asturies.

El gobiernu aparó la puesta en marcha de les concesiones y anuló'l fallu del concursu. Esti amiguín suyu solicitaba que na puntuación se-y tuviere en cuenta un documentu que nun costaba en dengún de los sos cuatro proyeutos nel momentu de la valoración. Asina qu'apurriólu fraudulentamente fuera'l plazu, dempués entovía d'asoleyaos los resultaos del concursu y sabese perdedor. A la fin, nun solo se-y atendió la reclamación, sinón qu'amás, pa que nun se vieren afeutaos por esa rebaremación los otros tres proyeutos ganadores, en manes yá de grandes grupos mediáticos, el concursu retrotraxóse al iniciu, escontra lo llegalmente afitao. Y por si fuere poco, modificárense-yos les puntuaciones en dellos apartaos del baremu.

El resultáu d'esta riestra d'irregularidaes foi la retirada de la llicencia a Radio Sele porque como yá sabemos al P$OE interésa-y de siempre más la propaganda que la comunicación y pa confirmalo nun hai más qu'alcordase d'aquelles 60 emisores qu'esti partíu concedió cuando taba nel poder y que güei pertenecen a un "gran" empresariu creador d'un fuerte imperiu mediáticu que ye pa toos y toes de sobra conocíu.

Esti atropellu y marxinación a Radio Sele nun ye más qu'otru exemplu de comportamientu caciquil nel senu d'esti partíu que tien la zuna de reprimir a la xente los drechos llingüisticos que mos correspuenden. Hai que lluchar escontra'l vezu dalgunos de robar al so pueblu, amás de les perres, la so dignidá y el so futuru. Nun se puen tolerar yá toles torgues que mos pon esti gobiernu pa poder falar y oyer falar la nuesa llingua. Poro, ante esti atropellu y marxinación a Radio Sele dende la Xuventú Comunista queremos denunciar la corrupción que supón la manipulación fraudulenta d'un concursu públicu de concesiones d'emisores de radio comercial y les aiciones antidemocrátiques d'un gobiernu qu'usa les nueses alministraciones pa dar tratos de favor a grupos mediáticos afines al so partíu y boicotear la criación d'emisores de radio independientes. Amás, convidámoste a participar en toles aiciones empobinaes a la denuncia d'esti fechu llamentable convocaes dende la Plataforma de sofitu a Radio Sele desixiendo que se-yos devuelva la llicencia d'emisión concedida na resolución orixinal y válida del concursu.