REGLAMENTU D’ORGANIZACIÓN DE LA COORDINADORA ANTIFASCISTA D’ASTURIES

REGLAMENTU D’ORGANIZACIÓN DE LA COORDINADORA ANTIFASCISTA D’ASTURIES (MAYU DE 2009)

ENTAMU

Dende qu’entamo a formarse la Coordinadora Antifascista d’Asturies (CAA), dende los primeros aconceyamientos del branu del 2007 hasta esti Conceyu Estraordinariu pasaron dos años de trabayu socio-políticu, de revuelta y movilización na cai.

A lo llargu d’esti tiempu la CAA foi adquiriendo fuercia como vehiculu de protesta social énte’l procesu xudicial de los 14 de Cangues. Y anguañu alcontramonos con qu’esa etapa zarrose y la CAA afronta la posibilidá d’una fuerte crisis en tolos aspectos. De cómo resolvamos ente toos los problemes que se mos presenten o se mos puedan presentar depende’l que la CAA se disuelva contribuyendo a xenerar nueves fractures dientro de la izquierda asturiana, o bien siga como una entidá folclórica que cumplió la so función hestórica quedando erma de conteníos sociales de tala forma que se reduza la so actividá a la manifestación xunitaria del 20 payares, o pola contra madure como movimientu desendolcando propuestes polítiques nidies, una llínia estratéxica realista y granible, y una cadarma organizativa que responda a les necesidaes que mos plantega la nuesa realidá, tanto la esterna (procesos políticos y económicos que se tan dando dientru del marcu socio-hestóricu d’Asturies) como la interna (diversidá de demandes y sensibilidaes qu’inda nun supieron articulase nun proyeutu rialmente xunitariu, siendo dafechu la campaña del 35 lo que fizo que la CAA caltuviera la so xunidá).

Entendiendo qu’igual que’l momentu d’emerxencia de la CAA finó, mesmamente la CAA tién que dexar de ser solo la canal d’aición defensiva y antirrepresiva, siendo urxentes la ellaboración de proyeutos ofensivos y non solo defensivos, la cristalización del potencial políticu acumuláo nun espaciu coleutivo con personalidá autónoma. Asína’l trabayu políticu acumuláu tién que resultar na criación d’una cadarma que se carauterice tanto pola estabilidá y la duración nel tiempu como por una flexibilidá pa recoyer y coordinar una pluralidá d’inquietues y propuestes definíes pol común denominador del “antifascismu”. El presente Reglamentu intenta responder a eses necesidaes coleutives.

TITULU I: L’ASAMBLEA XENERAL

Artículu 1.- El Conceyu Xeneral ye’l muerganu soberanu de la CAA, ye’l que fae y espresa la so voluntá coleutiva, elabora la Llínia d’Actuación del cursu y les sos decisiones, tomaes por mayoría, comprometen por igual a tolos miembros de la CAA. Artículu 2.- El Conceyu Xeneral formenlu tolos miembros de la CAA. Artículu 3.- El Conceyu Xeneral tién de aconceyase lo menos cada 12 meses. El Conceyu Xeneral tién tres formes de convocase: a)La Comisión Permanente saliente de móu ordinariu. b)La Comisión Permanente, si asina lo soliciten per escritu un terciu de los miembros de la CAA o la metá más ún de los Conceyos Autónomos establecíos. En cualesquier casu la convocatoria tién que ser comunicada a tolos miembros de la CAA con un plazu mínimu d’un mes.

TITULU II: L’ALCUENTRU ALMINISTRATIVU

Artículu 4.- L’Alcuentru Alministrativu ye’l muerganu masimu de la CAA ente dos Asamblees Xenerales, encargándose d’afondar no aprebao n’Conceyu Xeneral, a esti respeutu, les sos decisiones enxamás nun podrán dir a la escontra de les resoluciones de dicho Conceyu. La so llabor principal ye’l ser llar d’alcuentru pa aldericar ente toos el como se ta xestionando la Llínia d’Actuación pola parte de la Comisión Permanente y de los Conceyos Autónomos. Asína mesmo tamién podrá decidir aiciones concretes que pola so trescendencia asina lo requieran (siempres dientru lo aprebáu nel C.X.). Artículu 5.- La conformación y convocatoria del Alcuentru Alministrativu atiense a los mesmos criterios que l’C.X. (Art. 2 y 3).

TITULU III: LA COMISIÓN PERMANENTE

Artículu 6.- La Comisión Permanente ye’l muerganu de coordinación y representación de la CAA. Los miembros d’esti muerganu elíxense por mayoría de tres cuartos en Conceyu Xeneral. La Comisión Permanente aprebara si ye’l casu’l so propiu plan de trabayu pa xestionar la Llínia d’Actuación. Artículu 7.- Los aconceyamientos de la C.M. son abiertos, pudiendo asistir a ellos con drechu a voz tolos miembros de la CAA que lo quieran. Artículu 8.- La C.M. tien les siguientes competencias y funciones: a)Convocar el Conceyu Xeneral y los Alcuentros Alministrativos. b)Cumplir y facer cumplir los alcuerdos y mandaos del C.X. y de los Alcuentros Alministrativos. c)Informar a los miembros sobre la marcha y actuación de la C.M. d)Rendir cuentes de la so xestión nel C.X. e)Administrar el padrimoniu y l’ayalgueria de la CAA.

TITULU IV: LOS CONCEYOS AUTÓNOMOS

Artículu 9.- Los Conceyos estructuren la organización de la CAA (ye al travies d’ellos como les persones qu’asína lo quieran pueden integrarse na organización de la CAA), son autónomos dientro’l so ámbitu territorial ensin que’l so trabayu pueda situase al marxe de la Llínia d’Actuación del C.X. de la CAA. Tan compuestos por tolos miembros de la CAA residentes dientro’l so ámbitu territorial. Artículu 10.- Son funciones de los Conceyos Autónomos: a)Execución de la Llínia d’Actuación nel so territoriu. b)Estudiu de la realidá xeneral d’Asturies asína como de la del so territoriu. c)Ellaboración d’un plan de trabayu adaptáu al so entornu llocal. d)Tener un censu de los sos miembros. e)Cualesquier otra que-y pueda encargar la C.M. Artículu 11.- Los CC.AA. tienen d’aconceyase polo menos una vegada cada tres selmanes, llevatando Acta de lo aldericáu y aprebáu nel aconceyamientu.