AGORA y la Llionpedia

Ante las noticias sobro’l conteníu negacionista del Holocaustu, na páxina de formatu wiki «Llionpedia», dende la organización de la Esquierda Llionesista AGORA País Llionés manifestamos lu que vien arréu:

- El nuesu más firme refugu por esi y outros conteníos negacionistas y filofacistas. Repuna ver como nuna enciclopedia, que diz “buscar el puntu de vista neutral”, na categoría “Historiadores” solo apaeza David Irving, el más destacáu negacionista defensor de la inocencia d’Hitler nel xenocidiu nazi. Condergáu en 2006 a tres años de cárcele n’Austria por ñegar l’Holocaustu y por falsiar la Historia (delitu del que se confesóu culpable) y orador davezu nos círculos neonazis europeos. Ou como na categoría de “Políticos d’Austria” solo apaez el líder del partíu d’estrema-dereita FPÖ, aínda que esi partíu solo algame un 10% de los votos totales.

- Denunciamos la utilización personalista d’esta ferramienta. Sorprende llier artículos como’l de la “llingua llionesa”, onde se cita a Abel Pardo hasta en cincu ocasiones y en dúas fotos, entres que personalidaes de las nuesas lletras como Roberto Álvarez-Quevedo ou Eva González (con calle na Ciudá de Llión) nun apaezan. Como tampoucu asociaciones históricas sofitu del nuesu patrimoniu llingüísticu, como Facendera y Furmientu, entres que sí apaecen las asociaciones pantasmas dirixídas pol conceyal de cultura llionesa. Inclusive’l casu del artículu dedicáu a la Universidá de Llión, onde nun apaez el nome de dengún de los sous rectores, pero sí el del inefable Abel Pardo.

- Denunciamos la utilización partidista de la Pardopedia. La mayoría los artículos respuenden a las tesis non científicas del conceyal de cultura llionesa. Asina la llingua llionesa poucu ou nada tien que ver cola tradicional d’Asturies, el gallegu nunca se falóu en zonas llionesas (nin siquiera n’Aira da Pedra), Conceyu Xoven tien más de mil afiliaos, Abel Pardo ye “doctor”, etc...

- Denunciamos el descreitu de la llingua llionesa na Pardopedia. L’incorreutu usu del sou léxicu, la súa probe ortografía, la eliminación de los topónimos tradicionales llioneses sustituyíos por outros esparataos ya inventaos, la falsía de la realidá llingüística del nuesu país, y l’usu d’una llingua d’un pueblu pal beneficiu particular d’unos poucos.

- Siñalamos la responsabilidá de la Conceyalía de cultura llionesa. Queda a las claras qu’estos feitos envuelven de xeitu direutu a l’alministración de la Llionpedia, ya que’l primer usuariu rexistráu nesta páxina y direutor de la estaya del sou desendolque, “Auslli”, ye amás el responsable de tol conteníu filofacista nesa páxina. Polo tanto, la persona que s’escuende tras esi remote solo puede ser un emplegáu d’esa conceyalía ou’l propiu conceyal. Por ello, denunciamos l’actitú d’Abel Pardo de llanzar cortinas de fumu en forma d’alcuerdos con una asociación xudiga, asina como l’intentu de mirar a un llau del Alcalde-Presidente del Conceyu de Llión, Francisco Fernández.

- Felicitamos a los siete ciudadanos, pertenecientes al movimientu en sofitu del patrimoniu llingüísticu llionés y al llionesismu social, por denunciar estos aborrecibles feitos, y amosar a tola ciudadanía llionesa que la lluita pola cultura popular nun ta reñía colos criterios de racionalidá.